1 ?Dai Madu nanhte a Karai Kasang nanhte hpe jaw nga ai mungdan na yi sun langai mi hta masha sat da ai hpe mu hkrup nna kadai sat kau da ai hpe n chye ai rai myit yang, 2 nanhte a ningbaw ni hte tara agyi ni pru sa nhtawm, si mang taw ai shara kaw na grup yin mare shagu hpe shadawn na rai myit dai. 3 Dai hpang si mang taw ai shara hte ni htum ai mare ningbaw ni mahtang bungli garai n shangun yu ai dumsu upra langai hpe lata san da na rai ma ai. 4 Shanhte gaw dai hpe nli galoi mung n gat hkai yu ai shara hte hka shi alwi nga ai shara makau de dun sa wa nhtawm dai yang e du abyen daw ya na rai ma ai. 5 Dai Madu nanhte a Karai Kasang gaw shi hpe daw jau na hte shi a mying ningsang hta shaman ya na matu, Lewi hkinjawng ni hpe lata la nu ai rai nna kashun kashe du daw sai hkaw pru wa ai amu shagu hpe daw dan hparan ya ra nga ai majaw dai shara de shanhte sa na rai ma ai. 6 Dai hpang masha sat da ai shara hpe mu tawn ai shara hte ni htum ai mare na ningbaw ni yawng nga upra a ntsa e shanhte a lata shin kau let, 7 ?Anhte gaw ndai masha wa hpe n sat ga ai, ndai amu kadai galaw shapraw ai hpe mung anhte n chye ga ai. 8 Madu e, Egutu mung kaw nna nang hkrang shaw la nit dai Israela amyu masha ni a yubak mara ni hpe raw dat ya u. Anhte hpe mara raw dat ya mi. Ndai mara n kap ai masha wa sat kau hkrum ai a majaw anhte hpe mara hkum shagun mi law,? ngu nna tsun na rai ma ai. 9 Dai rai nna dai Madu ngu ai hte maren galaw jang, masha sat amu hte mara shagun hkrum na myit dai n rai.

10 ?Dai Madu nanhte a Karai Kasang gaw majan pa e nanhte hpe awng padang jaw nna bawng masha ni hpe rim la lu ai shaloi, 11 shanhte hta na ahpraw tsawm ai numsha hpe mu nna shi hpe tsaw ra hkungran la mayu ai rai yang, 12 shi hpe na a nta de woi wa let, shi a kara shangun, lamyin matep, hpun palawng galai kau ya na rai ndai. 13 Shing rai shi gaw na a nta e nga nga let, kanu kawa ni hpe marit ai majaw shata mi tup sharung shayawt nga na rai wu ai. Dai hpang shi hpe nang hkungran la mai nga ai. 14 Rai tim, nang shi hpe loi mi mung n tsaw n ra mayu mat ai rai yang, shi hpe shalawt kau dat lu na rai ndai. Nang shi hte kanawn kau dat nit dai majaw mayam langai mi hpe zawn shi hpe shangun sha nna dut kau lu na n rai.

15 ?Lasha langai gaw shi hta num lahkawng lu ai ngu ga; shan lahkawng hta shadang sha shaprat ma ti mung kasha alat mahtang shi tsaw ra ai madu jan a kasha n rai nga ai majaw 16 shi a ma yan hpe sut gan sali wunli kaning rai karan jaw na lam shi daw dan ai shaloi shawng na kasha alat madu la ang ai sali wunli hpe shi tsaw ra ai madu jan a shadang sha hpe jaw let myi man pa shangun lu na n rai. 17 Shi tsaw ra ai madu jan a kasha n rai nga ti mung, shawng na shi a shadang sha alat hpe mahtang tara shang kasha rai nga ai majaw shi hpe sali wunli htam lahkawng jaw nhtawm kasha alat hku yin la lu na rai wu ai.

18 ?Kanu kawa e ari jaw nna sharin achyin ti mung n madat n mara ai hte myit shaja nna gumlau chye ai shadang sha lu ai rai yang, 19 kanu yan kawa gaw shi nga ai mare a ningbaw ni a man de woi sa nna jeyang shangun na rai nga ai. 20 Kanu yan kawa gaw shanhte hpe, ?An a shadang sha gaw myit ja nna gumlau chye ai hte an a sharin shaga ai ga n madat ai wa rai nga ai; gumhpraw pagawn mi jai shama nna tsa chyaru lu nang ai wa mung rai nga ai,? ngu nna tsun dan na rai ma ai. 21 Shaloi mare na lasha nlang shi hpe nlung hte kabai sat kau na rai ma ai. Shing rai dai zawn n hkru n shawp ai amu hpe yeng seng kau na rai myit dai. Shing re ai lam a majaw dai shiga na ai Israela amyu masha shagu hkrit gari nga na mara ai.

22 ?Masha langai ngai si ging ai yubak galaw hkrup ai a majaw sat kau hkrum nhtawm shi a si mang hpe hpun hta noi da ai rai yang, 23 Karai Kasang kaw na dagam dala, dai mungdan hta hkrum hkra chye nga ai majaw, hpun hta shana tup noi da lu na n rai; dai shani jang lup makoi kau lu na rai myit dai. Dai Madu nanhte a Karai Kasang nanhte hpe jaw ai mungdan hta awu asin n hkrum nga myit ga gaw, si mang lup kau lu na rai myit dai. Ref 21:23: Gal 3:13.