TVTSVMC 21
1 O Yehowa lex, mnoz rueq hokhvmx waz muex hungc vlaungc kuy ningkhvnc nuex piq kokez yaq;
mnoz rueq piq muex tvtaungx kuy
ningkhvnc nuex piq kuex pinhtumc kokez yaq.
2 Piq thuinz vmungx maq raungc raq yaq kuex mnoz rueq kuq toq;
piq rueq thoz yaq kvmuinz mnoz rueq tvralc kuq toq.
3 Mnoz rueq yunghvlc ruimrix htenc kuex laq vtueq piq kox nuex kaz toq,
piq khux nuex kuimshawx khushec tvbuz kuq toq.
4 Piq rueq rullungx thoz tueq rulc rv-ngvlc mnoz rueq kuq toq,
kvruex kuex rullungx vluz nuiyc pattup rullungx rvtueq.
5 Mnoz rueq romc kuy ningkhvnc
nuex piq ngauz vngax yungx yaq;
mnoz rueq piq muex muingc jungc
nuiyc shvmhvlc svp vrvp kuex kuq toq.
6 Mjoalc moalc ruimrix kuex piq rulc vdvmz mkaq muinz httax yaq;
Mnoz ngauz vngax maq piq muex vkoz vkez maq tvmvrc kuq toq.
7 Hokhvmx waz kuex Tvphaungc Tvsuip Yehowa muex tvluimc yaq;
phaungx ngaungx hvlc Yehowa lungwawc thuinz httaz ning-khvnc nuex
piq kuex mkaq muinz kvwungx httax lvp tuex.
8 Hokhvmx waz rueq piq ralx lotlaz kuex lvp gay shuex;
piq muex shuiuc pac jix htenc muinz lvp gay shuex.
9 Piq httuiuc kaz tuex nuex vtul maq kvtenc yaq wvrluic ikhoc
tsuingshiq kuex tvbac gay shuex.
Yehowa thuinkhvy dung vtueq tsuingshiq kuex tvbac gay shuex,
wvr rueq muinz tsuingshiq kuex khamc gay shuex.
10 Tsuingshiq suiuz vsaz htenc kuex vshiz muinz tvraungx tuex rvmuq;
hokhvmx waz rueq tsuingshiq lotlaz kuex thvt gay tsuiyc shuex.
11 Tsuingshiq rueq tsuingshiq kv-mungx lvmz kuex shuimx vtueq,
vbac lvmz maq piq kuex kv-mungx ruiux muinz,
tsuingshiq rueq taungx wvnc shuex rvmuq.
12 Piq rueq piq laqsvnz htenc maq tsuingshiq kuex gap shuex,
tsuingshiq kuex yayix nuex kvroz yuz wvnc wuez tuex.
13 Yehowa lex, mnoz yunghvlc hungc vlaungc ningkhvnc nuex
nuiyshiq rueq mnoz muex tvtsvmc vphix!
Nuiyshiq rueq mnoz luimc vkawc kuex tvtsvmc wuez vphix.