TVTSVMC 20
1 Mnoz kuilc daz rvhumc tuiux nuex Yehowa rueq mnoz muex mtay kuq kv-phux!
Yaku Tishox rueq mnoz muex mtvkhup wungx kuq kv-phux!
2 Vpiq rueq mnoz muex vpiq Shomc Yuimx maq romc kuy lvmz mtvkaz shueq,
Zion Kanx maq mnoz muex romc lawc lvmz mkuq kv-phux.
3 Mnoz rueq shomc kuq vshuiux lotlaz kuex vpiq rueq mlvp wvnc shueq,
mnoz rueq shomc nawk kuq vshuiux lotlaz kvmuinz mraungc raq wvnc shueq.
4 Mnoz rueq roc vshuiux phvnx yvmx yuq muinz vpiq rueq mnoz muex mkuq kv-phux,
mnoz rueq kvmungx vshuiux lotlaz kvmuinz mtvtaungx kuq kv-phux.
5 Kvkaq mnoz rueq taungx wvnc toq ningkhvnc nuex nuiyshiq vkoz vkez maq guyc sez wuez vtix,
nuiyshiq Tishox muex tvtsvmc kvmc vtueq
mnoz rueq taungx wvnc toq tvtsuingc tvy moalx tvhungx vshix.
Mnoz rueq thoz shuiux lotlaz kuex
Yehowa rueq mtay kuq kv-phux.
6 Yehowa vpiq rueq vthvl taq hokhvmx waz muex taungx wvnc lvmz kuq tueq kuex
majuiuc ngaz rueq tuiuz vshaungx;
vpiq rueq vsawc raungmungx maq piq muex tvralc kuq yaq nuiyc
vpiq luimc vkawc maq piq muex yunghvlc taungx wvnc lvmz htenc kuq tueq.
7 Wvyvmc kuex tsuingshiq ralx khvt juing renc htenc,
kvmaq wvyvmc kuex tsuingshiq ngaungc yaq mvre htenc muex tvluimc wuez yaq,
yuq muinz naungshiq kuex Yehowa naungshiq Tishox muex tvluimc wuez vshix.
8 Tsuingshiq kuex kvhtuip vtueq rul wvnc wuez tuex,
yuq muinz naungshiq kuex kvtenc vtueq phaungx duingduing jvp vtix.
9 O Yehowa lex, hokhvmx waz muex taungx wvnc juing kuq shuiuz;
nuiyshiq rueq gvl ruiux yuq, nuiyshiq muex tvralc kuq koq.