TVTSVMC 143
1 Yehowa lex, ngvy vjux thoz kvjaz kuex tay shuiuz!
Mnoz tsuingrux lvmx maq ngaz rueq kvmenc jenc thoz vphaungx kuex tay kuq koq;
mnoz tvmtuing maq ngaz muex tvralc koq.
2 Mnvrc waz ngaz kuex khac phoc nuex nauk tvrvhumc vkueq;
mkhaungkac nuex mvrax kop muq miq vshiz muinz vguez.Ref 143:2 Rom 3:20; Gal 2:16
3 Ngvy ralx rueq ngaz kuex yurc vtueq lauz wvnc vphuex,
ngaz kuex tvsawc ric ruez vtueq taungx gay phuex.
Piq rueq ngaz kuex nyauk hvlc baung nuex shuiuz gay vtueq,
mvnnuex jauz vthueyc wvnc jix hez ikhoc ngaz yaungx vtaungx.
4 Kvkhoc rvtueq ngaz rueq vsumx
kuy gay tvkoc tvyoalc yoalx httax vtaungx;
ngvy thuinz ngvy tharc htumx rvhumc vtaungx.
5 Ngaz rueq lvy wvnc vtuex wawc
raungnuiyq htenc kuex rvwvl lvp vshaungx;
mnoz rueq shuimx wvnc toq yauk shuimc lotlaz kuex
ngaz rueq rvwvl thvt vshaungx,
m-yauk shuimc lotlaz kuex ngaz rueq rvwvl thvt vshaungx.
6 Ngvy yauk kuex mnoz kox nuex
tvlanc vtueq vjux thoz vphaungx;
httuiz rawk yaq ghaq rueq yuix muex rvnx yaq ikhoc ngvy
siyac kuex mnoz muex sac yaq.
7 Yehowa lex, ngaz muex majuiuc dvyx tvralc kuq koq!
Ngvy thuinz tvluimc juing lotlaz htumx wvnc vtuex.
Mhtvlx kuex ngvy kox wawc nauk
phel wvnc kaz, kvkhoc ruiux yuq wulumx mungx nuex
kay wvnc jix rulc ngaz muinz lomx wvnc taungx.
8 Mnoz muex ngaz rueq tvluimc
vphaungx ningkhvnc nuex wvraungx nvpnvp mnoz
phaungx ngaungx yaq lungwawc kuex ngaz muex tvkhic kuq koq.
Ngvy vjux thoz bomc kuex mnoz kox nuex duiz wvnc vtueq,
ngvy khuemc shamc aungx yaq lvmx ngaz muex tvkhic kuq koq;
9 Yehowa lex, mnoz kox nuex
kvwungx tvkoc mhep nuex kvnvp kaz raungx;
ngvy ralx htenc yauk wawc ngaz kuex palc wvnc koq.
10 Mnoz kuex ngvy Tishox rvtoq;
mthuinroc shuimc kay tvkoc ngaz muex tvluing kuq koq.
Vhvlx lvmx tvkhic vtueq, kuiyq-
shuik lvmx nuex shvlx wvnc koq.
11 Yehowa lex, mbomkhvmc rulc rv-ngvlc ngaz kuex tvguing koq;
mnoz vhvlx lvmx kvyuq ngaz kuilc daz vtaungx wawc ngaz kuex palc wvnc koq.
12 Ngaz kuex mnoz rueq lungwawx
vphux ningkhvnc nuex ngvy ralx htenc kuex thvt gay shuiuz,
ngaz kuex mnvrc waz rvtauk ningkhvnc nuex,
ngvy tuinghtuing jix htenc lotlaz kuex thvt gay shuiuz.