62
1 Ngaz rueq Yerusalem muex hunglaungc kuy bomc jungx shaungx;
Ngaz kuex kvruex ghaq palc daungc wvnc rvhumc tueq
nuex httuiuc laz kuiyqshuik httax taungx rvmuq,
Kvruex ghaq rueq taungx wvnc tueq kuex raungwvrx nuex lez yaq wvrnarc ikhoc lez tuex.
2 Yerusalem lex, mnoz rueq taungx wvnc shuiux kuex miqphvnx htenc rueq khiz wuez shuex!
Tsuingshiq hokhvmx bix lotlaz rueq mnoz ngauz vngax kuex khiz wuez shuex.
Mnoz muex Yehowa vpiq pumz maq vmuingc kuq,
Muingc nyalx kuex lvp shuiux.
3 Mnoz kuex Yehowa tvkoc svp hvlc khushec vshiz ikhoc yaungx tuiux.
4 Mnoz kuex mkaq muinz “Vtuip gay
Rvhumc jix Waz,” ngoz tueq gvlc rvhumc tuiux rvmuq,
Mmungtan kuex “Vshurc vruez gay
Juik nyuiuz,” ngoz tueq ngoz muq shex.
Mmuingc vnyalx kuex “Tishox
rueq piq Raungc raq yaq,” ngoz tueq muingc shuex.
Mmungtan kuex “Vkoz vkez maq Vlvmz Nyuiuz,” ngoz shuex,
Yvmx khoc lac ngoz ruiux lec
Yehowa rueq mnoz raungc raq ningkhvnc nuex
Mmungtan kuex vtaungx waz vshiz ikhoc yaungx tuex.
5 Yalx rox waz rueq yalxtux nyuiuz kuex piq tvkoc nyuiuz nyalx
nyuiuz muex tvyaungc yaq ikhoc,
Vpiq rueq mshvmx kuex tvhungx vtueq lvmz kv-phux.
Waz nyalx waz rueq nyuiuz nyalx nyuiuz kuex raungc raq yaq ikhoc,
M-Tishox rueq mnoz kuex raungc raq kv-phux.
6 Yerusalem lex, ngaz rueq mpalx ruk htauk nuex vbvmc jix htenc taq tauk;
Tsuinghez kuex raungnuiyq
raungwvrx kuiyqshuik maq httax tuex rvmuq.
Tsuinghez rueq Yehowa muex vpiq
bomkhvmc htenc kuex rvwvlc tvmaung tvkoc shuimx kaz shuex,
mkaq muinz lauk gay muq tvkoc honc tvsvmc kuq shuex.
7 Vpiq rueq Yerusalem kuex tvjvp
guirx yek ruiux mungkawx rueq tvtsvmc juing ghaqyungx muex
yaungx wvnc nuex httuiuc laz,
tsuinghez rueq vpiq muex nyec tvkuiyq kuq shuex rvmuq.
8 Yehowa rueq vtuemc bomkhvmc taq tueq,
Vpiq luimc vkawc maq vpiq rueq kvruex tvkhic tvdung shuex:
“Mtuiz mtsvmz kuex mralx hez tvkoc lvmx svy muex mkaq muinz yaungx muq shex,
Pungnuk miqsaz htenc rueq
msvpiq tix kuex mkaq muinz nuingx wuez shuex rvmuq shex.
9 Yuq muinz mnoz rueq khic yuingc vtueq vlvp vthuey vngoz ningkhvnc nuex
Wanx phauk saq wuez vtueq Yehowa muex tvtsvmc wuez shuex.
Mnoz rueq penc tsawc vtueq vtvjomx taq svpiq thuey htenc ningkhvnc nuex
Ngvy Shomc Yuimx ruk mungx maq svpiq tix kuex nuingx lvp shuinx.”
10 Yerusalem ghaq wuinz lex, ghaqyungx maq dung kaz wuez kuinz,
Vyek waungc jix mmiqsaz hez tvkoc lvmx kuex tvnc shuinz!
Lvmx laungx tvyoalc shuinz; lung htenc kuex tvsawc gay shuinz!
Miq phvnx htenc rueq tuiuz tvkoc nganc dvmx kuex phauk wuez shuinz.
11 Yehowa rueq ghaq lotlaz nuex vkhoc tvtay jungx yaq:
“Yehowa kuex mnoz palc kay tvkoc httuiuc kaz yaq,
Vpiq rueq vdaungc wvnc miqsaz
htenc kuex vpiq rulc vdvmz nuex shvlx laq yaq, ngoz tueq
Yerusalem ghaq wuinz muex jungx shuiuz.”Ref 62:11 Esa 40:10; Tvkh 22:12
12 Mnoz kuex “Tishox muex Vsawc miqsaz,
Yehowa rueq vpalc wvnc miqsaz,” ngoz tueq ngoz shuex.
Yerusalem kvmuinz “Tishox rueq Lungwawx yaq Ghaqyungx,”
“Tishox rueq Tuip gay Muq Ghaqyungx,” ngoz tueq ngoz shuex.