1 Zeitindah kan ti kun lai? Velngeihnak cu a karh chinchin nakhnga sualnak cu kan tuah chinchin kun lai maw? 2 Tuah naisai hlah! Sualnak ah a thi cangmi kannih cu zeitindah cu chungah cun kan nun khawh rih hnga? 3 Jesuh Khrih chungah baptisma a ingmi kannih vialte cu a thihnak chung zongah baptisma kan ing ve ti nan hngal lo dahra? 4 Baptisma innak in a thihnak ah cun amah he phumchih kan si cang caah Pa sunparnak in Khrih cu thihnak in thawhter a si bang khan kannih zong nunnak thar ah kan nung ve lai.

5 Zeitintiah a thihnak ah amah he pehtlaihter kan si cang ahcun a thawhòhannak zongah amah he kan i pehtlai taktak ko lai. 6 A sualmi pumsa cu hrawh a si nakhnga kan minung hlun cu amah he vailam ah tah chih a si cang caah sualnak nih a kan sal ti lai lo ti cu kan hngalh. 7 Zeitintiah a thimi pa cu sualnak in a luat. 8 Sihmanhsehlaw Khrih he kan thih ahcun amah he kan nung òi lai ti zong kan zumh. 9 Khrih cu thihnak in thawhter a si cang caah a thi òhan bal ti lai lo ti kan hngalh; thihnak nih a cungah nawl a ngei ti lo. 10 A inmi thihnak cu sualnak caah zungzal nguh in a thi, sihmanhsehlaw atu a nunnak cu Pathian caah a nung. 11 Cucaah nannih zong sualnak i a thimi ah i ruat u law Khrih Jesuh thawngin Pathian i a nungmi ah i ruat u. 12 Cucaah thih hmangmi nan pum cu sualnak nih thisa duhnak zulhter awkin uk ti hlah seh. 13 Nan pumsa nan zeihmanh hi òhat lonak hriamnam in sualnak ah hmang ti hlah u; thihnak in nunnak ah thawhtermi bantukin Pathian sinah cun i pe u law nan pumsa nan zeipaoh kha dinnak hriamnam caah Pathian sinah pe ko u. 14 Zeitintiah phung tangah si loin a vel tangah nan um cang caah sualnak nih cun nan cungah nawl a ngei ti lai lo.

15 Cun tah? Phung tangah kan si ti lo i vel tang i kan si caah kan sual ko rih lai maw? 16 Sual naisai hlah! Pakhatkhat sinah a nawlngaimi sal si awkin naa pek ahcun a nawl na ngaihmi pa sal na si, sualnak sal ah naa pek ahcun thihnak ah an hruaih lai i nawlngaihnak sal ah na pek ahcun dinnak ah an hruaih lai ti cu na hngal lo maw? 17 Sihmanhsehlaw sualnak sal a rak si tawnmi nannih cu nan hmuhmi biatak cawnpiaknak kha lungthin tak tein nan zulh; 18 cucaah sualnak in thlah nan si cang i dinnak sal nan si cang caah Pathian cu lawm ko u sih. 19 Nan kotho tlamtlin lonak ruangah minung bia in ka chim. Zeitintiah nan pumsa cheubang hna cu thian lonak le sual chin lengmangnak ah nan rak i pek bal bantukin atu cu thiancheh awk caah dinnak ah cun nan pumsa a zeipaoh kha pe ve cang u. 20 Sualnak sal nan si lioah khan cun dinnak nih an uk hna lo. 21 Sihmanhsehlaw atu i nan zahpimi thil hin a miak zeidah nan hmuh? Cu thil hna an dih donghnak cu thihnak a si ko! 22 Atu tu cun sualnak khan nan luat cang i Pathian sal nan si cang, òhathnemnak nan hmuhmi cu thianchehnak a si i a dihdonghnak cu nuncanghmunhnak a si. 23 Zeitintiah sualnak man cu thihnak a si, sihmanhsehlaw Pathian laksawng cu Khrih Jesuh kan Bawipa thawngin nuncanghmunhnak a si.