5
1 Cucaah zumhnak in thiamcoh kan si caah kan Bawipa Jesuh Khrih thawngin Pathian he kan i rem cang.
2 Amah thawngin cu velngeihnak ah cun kan lut i cuka ah cun kan nung i Pathian sunparnak hrawm awk kan i ruahchannak ah cun kan tha a nuam.
3 Cu hleiah temhinnak nih in khawhnak a chuahter ti kan hngalh caah kan temhinnak ah cun kan i lawm;
4 in khawhnak nih ziaza a chuahter i ziaza nih ruahchannak a chuahter.
5 Kan sinah pekmi Thiang Thlarau cun kan lungthin chungah Pathian dawtnak kha a toih caah cu ruahchannak nih cun kan lung a donghter lo.
6 Kan derthawm rih ko lioah khan Khrih cu miòha lo hna caah aa tinh chihmi caan ah a thi.
7 A dingmi pa ca i mi pakhat thih cu a bengbai, miòha pa caah cun thih ngamh zong an um phum hnga.
8 Sihmanhsehlaw misual kan si ko rih lioah Khrih cu kan ca i a thihnak in Pathian nih a dawtnak kha kan caah a langhter.
9 Cucaah atu cu a thisen in thiamcoh kan si cang bantukin Pathian thinhunnak cun amah nih a kan khamh chinchin ko lai!
10 Zeitintiah ral kan si ko lio hmanh ah a Fapa thihnak thawngin Pathian he remter kan si ahcun thiamcoh kan si hnu chinchin ah cun zeitluk in dah a nunnak cun a kan khamh deuh lai.
11 Cu lawng cu a si rih lo, atu i remnak a kan petu kan Bawipa Jesuh Khrih thawng cun Pathian cungah kan tha zong a nuam.
12 Cu a si caah sualnak cu mi pakhat ruangah vawlei ah a ra i sualnak ruangah thihnak cu a tlun bantukin mi vialte an sual dih caah thihnak cu mi vialte sinah a tlung.
13 Phung a um hlan hmanh in sualnak cu vawlei ah a rak um cang; sihmanhsehlaw phung a um lonak ahcun sual cu sual ah rel a si lo.
14 Asinain thihnak nih cun Adam chan thok in Moses chan tiang nawl a ngeih. Adam buarsomi sualnak bantuk a ngei lomi hmanh kha a uk ko hna. Adam cu a ra te laimi pa he tahchunh a si.
15 Sihmanhsehlaw man loin pekmi laksawng cu buarsonak he cun aa lo lo, zeicahtiah mi pakhat buarsonak ruangah mi tampi an thih ahcun Pathian velngeihnak le mi pakhat Jesuh Khrih nih mi tampi ca i a vel a pekmi manlo laksawng cu zeitluk in dah a tam chinchin lai.
16 Cu manlo laksawng cu mi pakhat sualnak nih a chuahtermi he cun aa lo lo. Buarsonak pakhat ruangah biaceihnak nih hlawtnak a chuahpi, sihmanhsehlaw buarsonak tampi caah manlo laksawng nih thiamcohnak a chuahpi ve.
17 Mi pakhat buarsonak ruangah cu mi pakhat thawng cun thihnak nih nawl a ngeih ahcun velngeihnak tampi le dinnak laksawng man loin a hmumi hna nih cun Jesuh Khrih pakhat thawngin an nunnak kha tam chinchin in a uk lai.
18 Cun, mi pakhat buarsonak nih mi vialte hlawtnak a chuahter bantukin mi pakhat dinnak tuahmi nih mi vialte caah thiamcohnak le nunnak a chuahpi ve.
19 Zeitintiah mi pakhat nawl ngaih lonak nih mi tampi cu misual ah a canter hna bantukin mi pakhat nawlngaihnak nih mi tampi kha miding ah a canter ve hna lai.
20 Phung cu buarsonak karhter awk caah a ra, sihmanhsehlaw sual a karhnak ah velngeihnak cu a tam chinchin ve;
21 cucaah sualnak nih thihnak a uk bantukin Jesuh Khrih kan Bawipa thawngin dinnak in nuncanghmunhnak ah velngeihnak zong nih a uk ve lai.