SALM 119
Bawipa Nawlbia
1 An nunning ah soisel awk
zeihmanh a um lo i
Bawipa nawlbia a zulmi cu
milunglawm an si.
2 A nawlbia kha a zul i lungthin
1dihlak in a nawl a ngaimi cu
milunglawm an si.
3 Òhat lonak kha an tuah lo,
Bawipa lam kha an zulh.
4 Na nawlbia kha na kan pek i
zumhawktlak tein
nan zulh lai na kan ti.
5 Na kan pekmi phunglam cu
zumhawktlak tein
zul kho ning law zeitluk in dik
ka vaa lunghmuih hnga!
6 Na nawlbia vialte kha òha tein
kaa zohchih hna ahcun
ningzahnak ka phan lai lo.
7 Na biakhiahnak a dingmi kha
ka hngalh hna lai i
lung thiang in kan thangòhat lai.
8 Na nawlbia kha ka zulh hna lai,
zeitikhmanh ah ka kaltak hlah.
Bawipa Nawl Ngaih Awk A Si
9 Zeitindah tlangval nih thiang tein
a um lai?
Na nawl ngaihnak thawngin
thiang tein a um lai.
10 Ka lungthin a dih-umnak in na rian
òuan kha kaa zuam;
na nawlbia kha zul loin
ka um nakhnga lo ka bawm.
11 Nangmah cungah sualnak ka tuah
nakhnga lo
na nawlbia cu ka lung chungah
kaa chiah.
12 Bawipa, nangmah cu kan thangòhat,
na phunglam cu ka cawnpiak
ko hna.
13 Na kan pekmi nawlbia vialte cu,
fak piin ka chim lengmang hna lai.
14 Chawva tampi ngeih nakin
na nawlbia zulh cu ka duh deuh.
15 Na kan hmuhsakmi thil kha
òha tein ka ngiat hna i
na kan cawnpiakmi thil kha
ka dothlat hna.
16 Na nawlbia cu kaa lawmhnak an si,
na phunglam cu ka philh hna lai lo.
Bawipa Nawlbia Zulh Cu Lawmhnak A Si
17 Na sal cungah hin òhatnak tuah ko,
cuticun ka nung lai i
na cawnpiaknak kha
ka zulh hna lai.
18 Na nawlbia chung i a ummi
khuaruahhar biatak kha
ka hmuh khawh nakhnga,
ka mit ka auter ko.
19 Vawlei cungah hin caan tlawmte
lawng ka um lai,
cucaah na nawlbia kha
ka thuhkanh hna hlah.
20 Na biakhiahnak kha ka lung nih
chunzan in a ngai ko.
21 Miporhlaw kha na chimhhrin hna;
na nawlbia a pialtakmi cu
chiatserhmi an si.
22 Nangmah phunglam kha
ka zulh hna caah
an ka serhsatnak le
an ka nihsawhnak cun
ka luatter ko.
23 Uktu bawi hna nih khan,
keimah hrawhnak khua cu
khang òi lengmang hna
hmanh seh law,
kei na sal cu na nawlbia tu kha
ka ruat camcin ko lai.
24 Na ka cawnpiaknak nih
lawmhnak a ka pek;
fim a ka chimtu a si.
Bawipa Nawlbia Ka Zulh Lai
25 Leidip lakah ka ril ko cang,
bia na ka kamh bang khan
ka nunter òhan ko.
26 Ka tuahmi vialte kha na sinah
ka phuan dih i na ka leh;
na nawlbia kha ka cawnpiak
tuah hna.
27 Na phunglam zulhning kha
ka cawnpiak law
na cawnpiaknak khuaruahhar cu
ka ruat hna lai.
28 Ngaihchiatnak nih a ka hrilh,
bia na ka kamh bang khan thazang
ka pe òhan tuah.
29 Lam ping zulh ka dawn law
na òhatnak thawngin na phunglam
kha ka cawnpiak tuah.
30 Na nawl zulh awkah ka lung
kaa thlek cang;
na phunglam kha òha tein
ka ruat hna.
31 Bawipa, lam na ka hmuhsakmi kha
ka zulh hna,
hnabei dong in ka umter hlah.
32 Nangmah nih hngalhthiamnak tam
chinchin in na ka pek lai caah,
na nawlbia cu lunglawm tein
ka zulh hna lai.
Bawipa Nawlbia Hngalhthiamnak Ca Thlacamnak
33 Na phunglam an sullam kha
ka cawnpiak hna law
zeitikhmanh ah ka zulh
zungzal hna lai.
34 Na phunglam kha fiang tein
ka chim law ka zulh lai;
ka lungthin a dih-umnak in
ka zulh lai.
35 Na nawlbia chungah khan
lunglawmhnak ka hmuh caah
na nawlbia lam cu ka zulhter ko.
36 Rumnak nakin na nawlbia zulh kha
ka duhter deuh.
37 Santlailo thil kha biapi i ka rel sual
nakhnga lo ka bawm,
bia na ka kamh bang khan
ka cungah òhatnak tuah ko.
38 Nangmah an òihtu hna sinah
biakamnak na tuahmi cu,
na sal keimah cung zongah hin
tlinter ko.
39 Ka òihmi thangchiatnak khan
ka khamh ko;
zeitluk in dah na nawlbia cu a òhat!
40 Nangmah cu na din caah na nawlbia
zulh kha ka duh hna;
ka cungah òhatnak tuah ko.
Bawipa Nawlbia I Bochannak
41 Zeitluk in dah na ka dawt kha
ka hmuhsak law
bia na ka kamh bang khan
ka khamh tuah,
Maw ka Bawipa.
42 Cun na bia kha kaa bochan caah,
a ka nihsawhtu kha
bia ka leh khawh hna lai.
43 Ka rak i ruahchanmi cu
na biakhiahnak kha
a si zungzal caah biatak cu
ka chim zungzal khawh nakhnga
ka bawm.
44 Na phunglam cu ka zulh zungzal lai,
zungzal in zungzal tiang
ka zulh lai.
45 Na nawlbia zulh kha kaa zuam caah
luat ngaiin ka nung lai.
46 Na nawlbia cu siangpahrang kha
ka chimh hna lai i
cu tuah cu ka ning a zak lai lo.
47 Na nawlbia cu ka duh hna caah
na nawlbia zulh cu ka caah a nuam.
48 Na nawlbia cu ka upat hna i
ka duh hna;
na cawnpiaknak cu ka ruat camcin
hna lai.
Bawipa Nawlbia Ruahchannak Hrampi
49 Na sal bia na ka kamhmi kha
philh hlah,
na biakamnak cu ka ruahchannak
hrampi a si.
50 Nganfah ka in hmanh ah
ka hna a ngam,
zeicahtiah na biakamnak nih
nunnak a ka pek.
51 Miporhlaw hna nih an ka zawmhtaih,
sihmanhsehlaw kei cu
na phunglam kha ka kaltak lo.
52 Bawipa, hlan i na rak ka cawnpiakmi
kha ka philh hna lo,
kha nih khan an ka lawmhter.
53 Miòhalo nih na phunglam an hrawh
ka hmuh tikah ka thin a hung.
54 Ka inn in lamhlatpi i
ka umnak hmun ah
na nawlbia kha hla in ka hlawi hna.
55 Bawipa, zan ah nangmah kha
kan ruat i,
na phunglam kha ka zul.
56 Na nawlbia ka zulh hna hi
kaa lawmhnak a si.
Bawipa Nawlbia Ka Tlaihchan
57 Nangmah lawnglawng hi kan duhmi
na si ko, Maw Bawipa;
na phunglam zulh awkah
bia kaa kam.
58 Ka lungthin dihlak in kan nawl,
bia na ka kamh bangin
ka zaangfah tuah!
59 Ka ziaza kha òha tein kaa ruat i
na nawlbia zulh kha bia kaa kam.
60 Rau loin, khulrang in na nawlbia kha
ka zulh hna.
61 Miòhalo nih an hri in an ka òem,
sihmanhsehlaw na phunglam kha
ka philh lo.
62 Na biakhiahnak an din ruangah khan
zanòim i ka hun i hlauh tikah
nangmah cu kan thangòhat.
63 Na rian a òuanmi hna cu ahohmanh
an si ah ka hawikom an si,
na phunglam a zulmi hna i
an hawikom ka si.
64 Bawipa, vawlei hi a fekmi
na dawtnak in a khat;
na nawlbia cu keimah kha
ka cawnpiak tuah hna.
Bawipa Nawlbia A Òhathnemnak
65 Bawipa, na biakam kha
na zulh i
na sal ka cungah hin na òha ko.
66 Na nawlbia kha
kaa bochan hna caah
fimnak le hngalhnak ka pe ko.
67 Dan na ka tat hlanah cun
a ping ah ka kal tawn,
sihmanhsehlaw atu cu
na bia kha ka ngaih.
68 Zeitluk in dah na òhat i
zeitluk in dah vel na ngeih!
Na nawlbia cu ka cawnpiak
tuah hna.
69 Miporhlaw hna nih lih in
ka thang an ka chiat,
sihmanhsehlaw kei nih cun
ka lungthin dihlak in
na nawlbia kha ka zulh hna.
70 Hi mi hna cu hngalhnak
a ngei lomi an si,
sihmanhsehlaw
kei cu na nawlbia ah kaa lawm.
71 Dantatnak ka inmi cu
ka caah a òha,
zeicahtiah na nawlbia kha
a ka hngalhter.
72 Na ka pekmi nawlbia cu
ka caah vawlei cung tangka vialte
nakin a òha deuh.
Bawipa Nawlbia Cu A Ding
73 Nangmah nih na ka ser i
nangmah nih him tein
na ka umter;
na nawlbia kha ka hngalh khawh
hna nakhnga
hngalhthiamnak ka pe ko.
74 Na biakamnak kha
kaa bochan caah nangmah
an òihmi nih an ka hmuh tikah
an lung aa lawm lai.
75 Bawipa, na nawlbia kha
an ding ti ka hngalh i
zumhawktlakmi na si caah
dan na ka tat cu a si.
76 Kei na sal hi bia
na ka kamh bantukin
a fekmi na dawtnak nih cun
ka lung ka lawmhter ko seh.
77 Na phunglam kha kaa lawmhnak
a si caah
ka cungah zaangfahnak ngei law
ka nung lai.
78 Lih in sual an ka puh caah
miporhlaw pawl cu,
ningzahnak phan hna seh,
kei tu cu na nawlbia kha
ka ruat ko hna lai.
79 Nangmah an òihmi le na nawlbia
a hngalmi cu
ka sinah ra hna seh.
80 Raltuknak i sungh ningzahnak khan
ka luat nakhnga,
na nawlbia cu tlamtling tein
ka zulhter ko.
Luatnak Ca Thlacam
81 Maw Bawipa, na khamhnak
ka hngahnak ah hin
ka ba tuk hringhran cang;
na bia cu kaa bochanmi a si.
82 “Zeitik ah dah na ka bawmh lai?” ti
lengmang in ka um i
na ka kamhmi ka cuanhnak ah hin
ka mithram a fak tuk cang.
83 Kei cu an hlonhmi saphaw cua
bantukin santlailo ka si,
asinain na nawlbia cu
ka philh hna lo.
84 Zei can dah ka ngan a herh rih lai?
A ka hremtu kha zeitik ah dah
dan na tat hna lai?
85 Na nawlbia a zul duh lomi
miruamkai pawl nih khan,
ka tlaknak dingah khor an cawh.
86 Na nawlbia cu zumhawktlak
an si dih,
mi nih lih in an ka hrem,
ka bawm tuah!
87 An ka thah khawh ciaomau,
sihmanhsehlaw na nawlbia kha
ka daithlanh hna lo.
88 Na dawtnak fek ruangah
ka cungah òha ko,
cuticun na phunglam kha
ka zulh khawh hna lai.
Bawipa Nawlbia Zumhawktlak A si
89 Bawipa, na bia cu zungzal in
a hmun lai;
vancung ah khin fek tein a um.
90 Zumhawktlak na sinak cu
chan vialte tiangin a hmun,
vawlei cu a umnak ah na chiah i
cuka ah cun a um peng ko.
91 Nangmah nawlbia thawngin zeizong
vialte hi nihin ni tiang an hmun,
zeicahtiah zeizong vialte cu
an dihlak in na sal an si.
92 Na nawlbia hi kaa lawmhnak
hram rak si hlah seh law,
ka dantatnak inmi ah hin
ka thi diam cang hnga.
93 Na nawlbia cu ka daithlanh
bal hna lai lo,
zeicahtiah anmah nih cun pei
an ka nunter cu.
94 Kei cu nangmah ta ka si,
ka khamh ko sawh.
Na nawlbia zulh kha
kaa zuam lengmang ko.
95 Miòhalo pawl nih thah awkah
an ka bawh ko,
sihmanhsehlaw kei cu
na phunglam kha ka ruat ko hna lai.
96 Zei thil hmanh hi a tlingmi
a um lo ti kha ka hngalh cang,
asinain na nawlbia cu
donghnak a ngei lo.
Bawipa Nawlbia Ka Duh
97 Zeitluk in dah na phunglam cu
ka duh,
chun nitlak cu lawng cu ka ruat ko.
98 Na nawlbia nih
a ka umpi zungzal i
ka ral vialte hna nakin
a ka fimter deuh.
99 Na cawnpiaknak kha
ka ruah hna caah,
ka sayate vialte nakin
ka hngal deuh.
100 Na nawlbia kha ka zulh hna caah
tar nakin fimnak ka ngei deuh.
101 Na bia zulh kha ka duh caah
ziaza òhalo vialte kha
ka hrial hna.
102 Na cawnpiaknak kha
zeirello in ka um hna lo,
zeicahtiah a ka cawnpiaktu cu
nangmah na si.
103 Zeitluk in dah na nawlbia cu
an thlum,
khuaihliti nakin an thlum deuh.
104 Na nawlbia in fimnak ka hmuh,
cucaah ziaza òhalo vialte kha
ka huat hna.
Bawipa Nawlbia Ceunak A Si
105 Na bia cu ka ke caah meiinn a si,
ka lam ah ceunak a si.
106 Na ka cawnpiaknak a dingmi,
ka zulh hna lai, tiah
bia kaa kammi kha,
ka zulh taktak hna lai.
107 Maw Bawipa, ka temhinnak hi
a fak tuk hringhran,
bia na ka kamh bangin
ka nunter ko sawh.
108 Maw Bawipa, ka lunglawmhnak
thlacamnak cu ka cohlang law,
na nawlbia kha ka cawnpiak
tuah hna.
109 Nifate thinphang zungzal in
ka um ko,
sihmanhsehlaw na nawlbia cu
ka philh lo.
110 Miòhalo nih keimah foihnak caah
rap an chiah,
sihmanhsehlaw na nawl
zul loin ka um lo.
111 Na nawlbia cu zungzal ka ro an si,
ka lung a ka lawmhtertu an si.
112 Ka thih ni tiangin na nawlbia cu
ka zulh zungzal ko hna lai.
Bawipa Nawlbia Himnak A Si
113 Na sinah zumhawktlak in
a um lomi cu ka huat hna,
sihmanhsehlaw kei cu
na phunglam kha ka duh.
114 Nangmah cu a ka khamhtu le
a ka hupphengtu na si,
na biakam cu kaa bochan.
115 Nannih misual mi hna, ka kaltak u,
kei cu ka Pathian nawlbia kha
ka zul lai.
116 Bia na ka kamh bangin thazang
ka pe law ka nung lai;
kaa ruahchannak ah hin
hnabeidong in ka umter hlah.
117 Ka domh law ka him lai,
na nawlbia cu zungzal in
ka ruat hna lai.
118 Na phunglam a zul duh lomi vialte
kha na hlawt hna,
zernak in khua an khanmi
vialte cu pakpalawng a si.
119 Nang na mit hmuh ah cun
vawleicung miòhalo vialte hi
hmunthur men an si dih,
cucaah kei cu na nawlbia kha
ka duh.
120 Nangmah kan òih caah
a ther in ka ther,
na biakhiahmi hmaiah cun
khuaruahhar in ka dir.
Bawipa Nawlbia Zulh Awk A Si
121 A dingmi le a òhami thil kha ka tuah,
ka ral hna sinah ka chia ta hlah.
122 Na sal kha, kan bawmh lai, tiah
biakamnak ka pe tuah,
miruamkai hna nih hin harnak
ka pe hna hlah seh.
123 Na khamhnak hi ka mit hram
fak in ka cuan,
na ka kamhmi luatnak cu.
124 A fekmi na dawtnak ningin
ka cungah òuan law
na nawlbia cu hung ka cawnpiak
ko hna.
125 Kei cu na sal ka si,
cucaah cun hngalhthiamnak
ka pe law
na ka cawnpiakmi kha
ka hngalh khawh hna lai.
126 Mi nih na phunglam kha
an zulh duh ti lo caah
atu caan hi na cawlcangh caan
a si awk a hau.
127 Na nawlbia cu sui nakin
ka duh deuh hna,
sui òha bik nakin ka duh deuh hna.
128 Cucaah cun na cawnpiaknak kha
ka zulh hna i
lam hmaanlo vialte kha
ka huat hna.
Bawipa Nawlbia Zulh Ka Duh
129 Na kan cawnpiaknak cu
khuaruahhar an si;
ka lungthin a dih-umnak in
ka zulh hna.
130 Na kan cawnpiaknak fianternak
nih khan ceunak a chuahpi,
hngalhnak a tlawmmi kha
fimnak a pek hna.
131 Na nawlbia kha
ka duh tuk hna caah,
ka kaa kaa an i ka thaw aa su.
132 Na dawtmi hna cu
na merhnawh hna i an cungah
zaangfahnak na ngeih bantukin
kei zong ka merhnawh ve law
ka zaangfah ve ko sawh.
133 Bia na ka kamh bantukin tlu loin
ka khamh law
òhat lonak nih khan ka tei sawh
hlah seh.
134 A ka hremtu hna kut chung khan
ka khamh tuah,
cuticun na nawlbia kha
ka zulh hna lai.
135 Na sal cungah hin na hmai kha
tlanter law,
na phunglam kha ka cawnpiak ko.
136 Mi nih na phunglam kha zulh
an duh lo caah
ka mitthli cu tiva bangin a luang.
Bawipa Nawlbia Cu Nawlbia Ding A Si
137 Bawipa, nang cu na ding i
na nawlbia zong a ding.
138 Nangmah pekmi nawlbia cu
an hmaan i an ding.
139 Ka ral nih na nawlbia cu
zei ah an rel hna lo caah
ka thin cu meialh in a alh.
140 Zeitluk in dah na biakam cu
a hmaan!
Zeitluk in dah na sal nih ka duh!
141 Kei cu santlailo le zeirello mi ka si,
sihmanhsehlaw na nawlbia cu
ka daithlanh hna lo.
142 Na dinnak cu zungzal in a hmun lai,
na phunglam cu ahmaan
zungzal ko.
143 Harnak le lung retheihnak in
ka khat,
sihmanhsehlaw na nawlbia nih
an ka lawmhter.
144 Na kan cawnpiaknak cu
zungzal in a ding,
hngalhthiamnak ka pe law
ka nung lai.
Luatnak Ca Thlacam
145 Ka lungthin dihlak in nangmah cu
kan auh,
Maw Bawipa ka let law
na nawlbia cu ka zulh hna lai.
146 Nangmah kha kan auh,
ka khamh law na nawlbia kha
ka zulh hna lai.
147 Ni a chuah hlanah nangmah cu
bawmhnak hal duh ah kan auh,
na biakamnak kha
kaa bochanmi cu a si.
148 Zan khuadei mit cungtang chin loin
ka um,
cucu na cawnpiakmi ka ruahnak ah
a si.
149 A fekmi na dawtnak thawngin,
Maw Bawipa, ka thlacamnak cu
ka theihpiak ko,
na òhatnak thawngin ka nunnak cu
ka zuahpiak ko.
150 A ka hremtu mipuarhrang hna
nih khan
an ka naih chin lengmang,
annih cu na phunglam a zul duh bal
lomi kha an si.
151 Sihmanhsehlaw maw Bawipa,
nang nih cun
lamnai tein na ka umpi i
na biakamnak cu a si taktakmi
an si.
152 Na kan cawnpiaknak cu hlanlio piin
ka rak hngalh cang,
zungzal hmun dingin na ser hna.
Khamhnak Ca Thlacam
153 Ka temhinnak hi ka zohpiak law
ka khamh tuah,
zeicahtiah na phunglam cu
zeirello in ka um hna lo.
154 Ka bia ka chimpiak law
ka luatter tuah,
bia na ka kamh bang khan
ka khamh tuah.
155 Na nawlbia kha miòhalo mi nih cun
an zulh hna lo caah
annih cu khamhnak an hmu lai lo,
156 sihmanhsehlaw Bawipa
na zaangfahnak cu a ngan caah
na biakhiahnak bantukin
ka khamh ko.
157 Ral tampi le hremtu tampi ka ngei,
Sihmanhsehlaw na phunglam
zulh cu ka tlolh lo.
158 Khi mirawitu hna khi ka zoh hna
tikah ka luak an chuak,
zeicahtiah na nawlbia kha
an zul duh lo.
159 Bawipa, zeitluk in dah
na cawnpiaknak ka duh cu
hngal ko.
A fekmi na dawtnak thawngin
ka khamh ko!
160 Na phunglam a chung muru cu
biatak a si,
a dingmi na nawlbia vialte cu
zungzal in an hmun.
Bawipa Nawlbia Zulh Ka Duh
161 Miòhawng nih ding lo piin
an ka serhsat,
sihmanhsehlaw na phunglam cu
ka hmaizah.
162 Bia na kammi thawngin
zeitluk in dah
ka lung aa lawmh,
rochaw aa hmuhmi bantukin
kaa lawm.
163 Lih cu ka huat hna i ka fih hna,
sihmanhsehlaw na phunglam cu
ka duh.
164 A dingmi na biakhiahnak ruangah
ni khat ah voi sarih lengmang
kan lawmh.
165 Na phunglam a duhmi cu
him tein khua an sa i
a tlukter khotu hna zeihmanh
a um lo.
166 Maw Bawipa, na khamhnak cu
kaa ruahchan i
nawl na ka pekmi cu ka tuah hna.
167 Na nawlbia cu ka zulh hna;
ka lungthin dihlak in ka duh hna.
168 Na nawlbia le na cawnpiaknak cu
ka zulh hna;
ka tuahmi vialte cu na hmuh dih.
Bawmh Halnak Thlacam
169 Maw Bawipa, nangmah
bawmh hal in ka aunak cu
na sin phakter ko.
Bia na ka kamh bangin hngalhnak
ka pe ko.
170 Ka thlacamnak cu na hmaika
phan seh law
bia na ka kamh bangin
ka khamh tuah.
171 Na phunglam cu na ka cawnpiak
hna caah
kan thangòhat zungzal ko lai.
172 Na nawlbia cu an din caah
na phunglam cu hla in ka sak lai.
173 Na nawlbia cu ka zulh hna caah
a zungzal in ka bawm ko.
174 Zeitluk in dah na khamhnak
hmuh cu ka duh, Maw Bawipa!
Na phunglam zulh hi
kaa lawmhnak a si.
175 Kan thangòhat khawh nakhnga,
nunnak ka pe tuah!
Na cawnpiaknak nih
ka bawm hna seh.
176 Tuu tlau bantukin ka vai;
cucaah ra law na sal hi
ka kawl tuah,
zeicahtiah na phunglam cu
zeirello in ka um hna lo.