2
Phun Cio Riahhmun le Lu Hna
1 Bawipa nih Moses le Aaron cu a chawnh hna i hi bangin a ti.
2 “Israel mi hna cu anmah le an alan pawng cio ah, an pupa hmelchunhnak i tar in an um awk a si lai; tonnak thlam cu a zeilei kap paoh in hoih cio ah riahhmun cu an khuar lai.
3 Nichuahlei, ni a hung chuahnak lei kam i a um hngami hna cu Judah riahhmun alan a si lai, an bubu in, Judah mi a hruitu hna cu Amminadab fapa Nahshon a si,
4 amah bu cu an relning ah 74-600 a si.
5 Amah chang ah riahhmun a khuar hnga ding cu Issakhar phun an si lai, Issakhar mi a hruitu hna cu Zuar fapa Nethanel a si,
6 amah bu cu an rel ning ah 54-400 a si.
7 Cu hnuah Zebulun phun an si lai, Zebulun mi a hruitu hna cu Helon fapa Eliab a si,
8 amah bu cu an relning ah 57-400 a si.
9 Judah riahhmun cu a ning piin, an bubu in 186-400 a si. Kal tikah anmah hi a pok hmasa bik an si lai.
10 “Thlanglei kam i a um hnga ding cu Reuben riahhmun alan a si lai, an bubu in, Reuben mi a hruitu hna cu Shedeur fapa Elizur a si,
11 amah bu cu an relning ah 46-500 a si.
12 Cun amah a hun chang ah riahhmun a khuar hnga ding cu Simeon phun an si lai, Simeon mi a hruitu hna cu Zurishaddai fapa Shelumiel a si,
13 amah bu cu an relning ah 59-300 a si.
14 Cu hnuah Gad phun a si lai, Gad mi a hruitu hna cu Reuel fapa Eliasaf a si;
15 amah bu cu an relning ah 45-650 a si.
16 Reuben riahhmun cu a ning piin, an bubu in 151-450 a si. Anmah hi a pokmi a pahnihnak an si lai.
17 “Cun tonnak thlam cu a pok lai, riahhmun hna laifang i Levi mi hna riahhmun he cun; riahhmun an khuar ning te khan an pok lai, anmah le an umnak ning ciote khan, alan pakhat hnu pakhat in.
18 “Nitlaklei kam i a um hnga ding cu Efraim riahhmun alan a si lai, an bubu in, Efraim mi a hruitu hna cu Ammihud fapa Elishama a si,
19 amah bu cu an rel ning ah 40-500 a si.
20 Cun amah chang ah cun Manasseh phun an si lai, Manasseh mi a hruitu hna cu Pedahzur fapa Gamaliel a si,
21 amah bu cu an relning ah 32-200 a si.
22 Cun Benjamin phun an si lai, Benjamin mi a hruitu hna cu Gideoni fapa Abidan a si,
23 amah bu cu an relning ah 35-400 a si.
24 Efraim riahhmun cu a ning piin, an bubu in 108-100 a si. Anmah hi kal tikah a pokmi a pathumnak an si lai.
25 “Chaklei kamah Dan riahhmun alan, an bubu in, a si lai, Dan mi a hruitu hna cu Ammishaddai fapa Ahiezer a si,
26 amah bu cu an relning ah 62-700 a si.
27 Cun amah chang ah riahhmun a khuar hnga ding cu Asher phun an si lai, Asher mi a hruitu hna cu Okhran fapa Pagiel a si,
28 amah bu cu an relning ah 41-500 a si.
29 Cun Naftali phun an si lai, Naftali mi a hruitu hna cu Enan fapa Ahira a si,
30 amah bu cu an relning ah 53-400 a si.
31 Dan riahhmun cu a ning piin 157-600 a si. Anmah hi a pokmi a hmanung bik an si lai; alan pakhat hnu pakhat in.”
32 Mah hihi Israel mi hna cu an phun cio ah rel tikah an si; riahhmun hna ah a ummi vialte an bu cio ah relmi cu 603-500 an si.
33 Sihmanhsehlaw Bawipa nih Moses nawl a pek bangin Levi mi hna cu Israel mi lakah rel an si lo.
34 Cu bangin Israel mi nih an tuah. Bawipa nih Moses nawl a pekmi vialte bantukin, cu bangin an bu cio ah riahhmun an khuar, cun cu bangin an pok, anmah le an chungkhar cio ah, anmah le an phun ning cio ah.