2
Nehemiah Cu Jerusalem Ah Thlah A Si
1 Nisan thla, Siangpahrang Artazaksis a bawi kum kulnak ah, a hmaika i mitsur hang a um tikah, mitsur hang cu ka lak i siangpahrang kha ka pek. Hi hlanah cun a hmaiah khan ka ngaih a chia bal lo.
2 Cun siangpahrang nih khan a ka thawh i, “Zeicahdah na hmai a chiat? Na zawt fawn òung lo? Zeidang si loin, na lung chungin na ngaih a chia i a si ko hih,” tiah a ti.
Cun kei cu ka thin a phang ngaingai.
3 Cun siangpahrang cu ka thawh i, “Siangpahrang cu zungzal in nung ko seh! Ka pupa hna thlan umnak khuapi cu a rawh ko i a kutka hna cu mei nih a kangh dih hna tikah hin, zeicahdah hmaichia loin ka um hnga,” tiah ka ti. Ref 2.3: 2Sia 25.8-10; 2Cha 36.19; Jer 52.12-14
4 Cun siangpahrang nih cun a ka thawh i, “Zeidah na ka hal duhmi a si?” tiah a ti.
Cucaah vancung Pathian sinah khan thla ka cam.
5 Cun siangpahrang cu ka thawh i, “Siangpahrang duhnak a si i na hmaiah na sal nih hin mithmai òha ka hmuh a si ahcun, ka va remh nakhnga, Judah ram ka pupa hna thlan umnak khuapi ah cun ka kalter tuah,” tiah ka ti.
6 Cun siangpahrang nih cun a ka thawh i (siangpahrang bawinu cu a pawngah khan a òhu), “Zei can dah na rauh hnga, cun zei tikah dah na ra kir òhan hnga?” tiah a ti. Cuticun siangpahrang nih keimah kalter kha a duhmi a si i kei nih caan cu ka tuk.
7 Cun siangpahrang sinah cun, “Siangpahrang duhnak a si ahcun, Tiva Ral ram a uktu hna cu va pek awkah, Judah ram ka phak tiangin an ka lanhter lengmang nakhnga, ca ka pe;
8 cun biakinn kulhnak kutka ca kaan le khua kulhnak vampang caah le keimah umnak ding inn caah thing a ka pek nakhnga, siangpahrang tupi uktu Asaf cu va pek awkah ca pakhat in ka pe fawn,” tiah ka ti. Cun ka Pathian velngeihnak cu ka sinah a um caah ka halmi cu siangpahrang nih a ka pek.
9 Cun Tiva Ral ram a uktu bawi hna sinah cun ka va phan i siangpahrang ca cu ka pek hna. Siangpahrang nih keimah sinah cun ralkapbu ralbawi hna le rangcung ralkap hna kha a kalter hna.
10 Sihmanhsehlaw Horon mi Sanballat le a sinum Tobiah, Ammon mi kha, Israel fale hna kha an nunnuamhnak kawlpiak awkah mi a ra, ti an theih tikah lungnuam lo ngaiin an um.
Kulhnak Vampang Remhnak
11 Cuticun Jerusalem khua cu ka phan i khika ah ni thum ka um.
12 Cun zan ah keimah sin i a ummi mi tlawmpal he khan ka tho; sihmanhsehlaw Jerusalem khua ca i tuah awkah Pathian nih ka lung chungah a chuahtermi tu cu ahohmanh ka chim hna lo. Kaa citmi saòil dah ti lo cu ka sinah saòil zeihmanh an um lo.
13 Zan ah kaa chawk i Nelrawn Kutka in Cenghngia Tikhor tiang, cun Hnawmpon Kutka tiang ka kal i Jerusalem kulhnak vampang a cimmi hna le mei nih a hrawhmi a kutka hna cu ka zoh hna.
14 Cun Cerhti Kutka le Siangpahrang Tili tiang kha ka va kal, sihmanhsehlaw kaa citmi saòil caah khan lanh khawhnak lam a um lo.
15 Cun zan ah cun nelrawn kam cun ka hung kal i kulhnak vampang kha ka zoh; cun hnulei ah kaa mer i Nelrawn Kutka khan ka lut i ka kir.
16 Cun bawi pawl nih khan khuazei i ka kal siseh, zei ka tuah siseh, an hngal lo; cun rian a òuan hnga ding Judah mi le tlangbawi hna le tuavon hna le bawi hna le midang hna kha ka chim rih fawn hna lo.
17 Annih cu ka thawh hna i, “Zei bantuk harnak chungah dah kan um i zeitindah Jerusalem cu a rawk ningin a um ko i a kutka hna cu an kangh dih ti kha nan hngalh. Kannih nih ningzah hmaichiat kan in ti nakhnga lo, ra u law, Jerusalem kulhnak vampang cu remh hna u sih,” tiah ka ti.
18 Cun ka Pathian kut ka cung i òhatnak caah a ummi le siangpahrang nih ka sinah a chimmi bia hna kha annih cu ka chimh hna.
Cun annih nih an i thawh i, “Tho u si law sa u sih,” an ti. Cuticun rian òha òuan awk caah cun an kut cu an i òhawnter.
19 Sihmanhsehlaw Horon mi Sanballat le Ammon mi Tobiah, a sinum le, Arab mi Geshum nih mah cucu an theih tikah an kan nihsawh i an kan serhsat i, “Mah hi nan tuahmi hi zeidah a si? Siangpahrang maw nan doh?” tiah an kan ti.
20 Khi tikah kei nih ka leh hna i, “Vancung Pathian nih khua awng a kan pemhter lai i kannih a sal hna nih hin kan tho lai i kan sak lai; sihmanhsehlaw nannih cu Jerusalem ah hin covo siseh, tinvo siseh, hngalh camcinnak siseh, nan ngei lai lo,” tiah ka ti.