5
(Mat 8:28-34; Luk 8:26-39)
1 Rili ral khatlei Gerasa mi hna ram ah an va kal.
2 Lawng chungin a hung chuah ah khin thlarau thur nih a tuahmi pakhat, thlan in a rami nih khan a rak fuh.
3 Cu pa cu thlan ah khan khua a sa tawn i ahohmanh nih thir cikcin zongin an hren khawh ti lomi a si;
4 cikcin in an hren i hreng an khenhchih hmanh ah cikcin cu a chah i a hreng zong cu a khiah a hmal dih tawn. Ahohmanh nih an tlaihkhip kho lo.
5 A chun a zan in thlan lak le tlang cungah a au i amah le amah hi lung in aa cum aa su tawn.
6 Lam hlapi in Jesuh a hei hmuh i a hei tlik hnawh i a biak.
7 Fakpi in a au i, “Jesuh, Cung Nung Bik Pathian Fapa, kan kongah run i thlak maw naa timh? Na ka hrem lonak dingah Pathian min in kan nawl,” a ti.
8 Zeitintiah Jesuh nih khan, “Thlarau thur, kha pa chung khan chuak,” a rak ti caah a si.
9 Jesuh nih cun, “Na min ahodah a si?” tiah a hal. “Ka min cu bupi a si; zeitintiah kan tampi,” tiah a leh.
10 Cuka ram in chuahter lo dingin a nawl chih len ko.
11 Cuka tlangpang ah cun vok rualpi an tlong len ko.
12 “Vok rual sinah kan kalter; an chungah lut u sih,” tiah an nawl.
13 Cucaah kalnak nawl a pek hna. Cun thlarau thur cu an chuak i vok chungah cun an lut. Vok rual cu thong hnih hrawng an si; an dihlakin khumpang ah an zuang i rili ah an tla i an thi dih.
14 Vok cawngtu hna cu an zam i khuapi he khuate he an va chim. Zei ko dah a si hnga ti zoh awkah mi an ra.
15 Jesuh sinah an ra i khuachia tuahmi thlarau thur tampi a ngeimi pa cu thilpuan òha tein aa hruk i lungfim tein a rak òhut kha an va hmuh i an òih ngaingai.
16 A hmumi hna nih cun thlarau thur tuahmi pa cung i thil umtuning le vok kong te hna cu an rak chimh hna.
17 Cu hna nih cun Jesuh cu an ram in chuah dingah an nawl.
18 Jesuh cu lawng cung i kai aa timh lioah khan khuachia tuahmi pa nih khan a sin um awkah a rak nawl;
19 sihmanhsehlaw a sianh lo, “Na inn ah va òin law na hawile sinah Bawipa nih zeidah an tuahpiakmi le an zaangfahnak kha va chim deuh hna,” a ti.
20 A kal i Dekapolis hrawngah khan Jesuh nih zeitluk tiang dah a tuahpiak ti kha a va thanh; mi vialte an khuaruah a har dih.
(Mat 9:18-26; Luk 8:40-54)
21 Jesuh cu ral khatlei i lawng in a kal òhan ah khan mi tampi nih an but hnawh, cucu rili kamah a si.
22 Sinakok uktu lak i pakhat, Jairu timi a ra i a hmuh cun a ke hramah a bawk, “Ka fanute a thi dengmang.
23 Ra law a cungah na kut chuang law cu a dam hnga i a nung ko hnga,” tiah a ra nawl.
24 Cuticun cu pa sinah cun a kal.
Mi tampi nih an zulh i a pawngkam ah cun a khah in an khat.
25 Cuka ah cun kum hleihnih chung thi chuah in a ngormi nu pakhat a rak um;
26 sibawi tampi nih an thlopbul tuk cang i a ngeih vialte zong a hmang dih nain òhat lei panh loin a zual chin.
27 Jesuh thawngpang a theih cun a hnulei in mi karlakah a hun i tenh i a puan a hun tawngh.
28 “A puan lawng hmanh tawng ning law ka dam ko lai,” a ti.
29 A thi cu chikkhatte ah a pit; a zawtnak a dam kha amahte nih a taksa in aa hngalh.
30 Jesuh nih a chungin thil ti khawhnak huham a chuah kha a hngalh i zapi lei hoih in aa her zau i, “Ahodah ka puan a tawng?” tiah a ti.
31 A hnuzul hna nih, “Hi vialte minung nih an in hnorsuan lulhmalh na thei ko nain, ‘Ahodah a ka tawng?’ na ti rih,” an ti.
32 Ahodah a si hnga tiah aa her i a zoh. Minu nih a cung i thil a tlungmi kha a hngalh i ther le phang lengmang buin a hung chuak;
33 a hmaiah a bawk i zeizong vialte kha hman tein a chimh dih.
34 Anih nih “Ka fanu, na zumhnak nih an damter, dai tein va kal law na rai cun va dam ko,” tiah a ti.
35 Cuti bia a chim len ko lioah cun Jairu inn in a rami zualko nih khan, “Na fanu cu a thi cang. Zeicahdah cawnpiaktu cu hna na hnawh leen ko rih?” a hung ti.
36 Jesuh nih i theihter duh loin, sinakok uktu cu, “Òih hlah, a zumh tu zum ko,” a ti.
37 Peter, Jeim le Jeim unau Johan dah ti lo cu a dang aa zulhter duh hna lo.
38 Sinakok uktu inn an va phanh tikah i tuai lulh in fakpi i an òah le an ai kio kha a va hmuh hna.
39 Inn chungah a vung lut i, “Zeicahdah nan i tuai lulh i nan òah? Ngakchia hi a thi lo, aa hngilh,” a ti hna.
40 An nihsawh men ko. Sihmanhsehlaw lengah a chuahter dih hna i ngakchia a nu le a pa, a hnuzul hnale tiah ngakchia umnak ah cun an va lut.
41 A kut in a tlaih i ngakchianu te cu, “Talitha kumi” a ti, cucu, “Nute, tho kan ti,” tinak a si.
42 Chikkhatte ah ngakchianu te cu a hung tho i a kal; (amah cu kum hleihnih mi a si) an khuaruah a har ko.
43 Ahohmanh hngalhter lo dingah bia a beoh hna i ngakchia nu cu ei awk pek a fial hna.