16
Ahaz Pennak
(2Cha 28.1-27)
1 Remaliah fapa Pekah a bawi kum 17nak ah, Judah siangpahrang Jotham fapa Ahaz cu bawi hram aa thawk.
2 Pen hram aa thawk tikah Ahaz cu kum kul a si i Jerusalem in kum 16 a pen hna. A pu David nih a rak tuah bangkhan, Bawipa a Pathian mithmuh ah a dikmi thil a tuah lo,
3 sihmanhsehlaw Israel siangpahrang hna lam kha a zul ve. Israel mi hna hmai in Bawipa nih a rak dawimi hna miphun nih thil fihnung an rak tuah bantuk khan, amah nih cun a fapa hmanh kha raithawinak caah a khangh. Ref 16.3: Deu 12.31
4 Khuahrum bo ah khan le tlang le a hringmi thingkung kip toiah khan raithawinak a tuah hna i zihmui kha a khangh hna.
5 Khi tikah Siria siangpahrang Rezin le Israel siangpahrang Remaliah fapa Pekah nih Jerusalem kha doh awkah an ra, Ahaz cu an dum, sihmanhsehlaw an tei kho lo. Ref 16.5: Isa 7.1
6 Kha caan ah khan Edom siangpahrang nih Edom caah Elath kha a lak òhan i Judah mi kha Elath cun a dawi hna; cun Edom mi cu Elath ah khan an ra i nihin ni tiangin khaka ah khan an um.
7 Cucaah Ahaz nih Assiria siangpahrang Tiglath-pileser sinah khan lamkal a hei thlah hna i, “Keimah cu na sal le na fapa ka si. A ka tutu siangpahrang le Israel siangpahrang kut chung hin, hung law ra ka chanh tuah,” tiah a ti.
8 Bawipa innchung le siangpahrang inn rokuang chung i a ummi sui le ngun zong kha a lak hna i Assiria siangpahrang cu laksawng ah a kuat.
9 Cun Assiria siangpahrang nih a bia a rak ngaihpiak; Assiria siangpahrang nih Damaskas kha a hun kalhnawh i a lak i a mi kha Kir ah a kalpi hna i Rezin kha a thah.
10 Siangpahrang Ahaz cu Assiria siangpahrang Tiglath-pileser kha va ton awkah Damaskas khua i a kal tikah, Damaskas khua i a ummi biakòheng kha a hmuh. Cun Siangpahrang Ahaz nih tlangbawi Urijah cu biakòheng pungsan le a tuah ningcang le a cingcuai kha tling tein a kuat.
11 Cun tlangbawi Urijah nih biakòheng kha a ser; Siangpahrang Ahaz nih Damaskas khua in a kuatning te khan, Siangpahrang Ahaz cu Damaskas khua in a ra phak hlanah, Urijah tlangbawi nih a rak ser dih.
12 Cun siangpahrang cu Damaskas khua in a ra phanh tikah, siangpahrang nih biakòheng cu a zoh. Khi tikah siangpahrang nih biakòheng cu a hei naih i a cungah a kai i,
13 biakòheng cungah cun a khangh thawinak le changvut thawinak kha a khangh hna i a thlet thawinak kha a bungh i a daihnak thawinak thi kha biakòheng cungah cun a theh.
14 Cun Bawipa hmai i a ummi dar biakòheng kha inn hmailei, amah a biakòheng le Bawipa inn karlak, khan a òhial i a biakòheng chaklei kamah cun a chiah. Ref 16.14: Exo 27.1-2; 2Cha 4.1
15 Cun Siangpahrang Ahaz nih tlangbawi Urijah cu nawl a pek i, “Biakòheng ngan ah hin zinglei khangh thawinak le zanlei changvut thawinak le siangpahrang khangh thawinak le a changvut thawinak cu, hi rammi hna an khangh thawinak le an changvut thawinak le an thlet thawinak vialte he khan na khangh lai; cun a cungah khangh thawinak thisen vialte le raithawinak thisen vialte kha na bungh hna lai; sihmanhsehlaw dar biakòheng cu keimah nih Pathian ka chawnhnak caah a si lai,” tiah a ti.
16 Tlangbawi Urijah nih mah vialte hi Siangpahrang Ahaz nih nawl a pek bangin a tuah dih.
17 Cun Siangpahrang Ahaz nih a dirnak a tung hna cu a tan hna i an sin cun i òawlnak kheng kha a òhial, cun dar cawtum nih an dohmi hmaihumpi kha a òhial i lung tianmi cungah a hun. Ref 16.17: 1Sia 7.23-39; 2Cha 4.2-6
18 Cun Assiria siangpahrang ruangah, Sabbath ni ca i a cung khuhmi lam siangpahrang inn chung i an sakmi le siangpahrang ca i lenglei in vung luhnak kha Bawipa inn khan a òhial hna.
19 Ahaz tuahsernak a tang rihmi hna cu, Judah siangpahrang hna Chanrelnak Cauk chungah an i òial lo mei?
20 Cun Ahaz cu a pupa hna sinah a it i David khua chungah a pupa hna sinah an vui; cun a fapa Hezekiah cu amah hmun ah khan a hung bawi. Ref 16.20: Isa 14.28