22
Joshua Nih A Kirter Hna
1 Cun Joshua nih Reuben mi le Gad mi le Manasseh phun cheu kha a auh hna i
2 annih cu, “ Bawipa sal Moses nih nawl an pekmi vialte hna kha nan tuah i nawl kan pekmi hna vialte ah ka bia kha nan ngaih; Ref 22.2: Nam 32.20-32; Jos 1.12-15
3 hi can riamruam nannih nih nan unau hna kha nihin tiang thlahthlam loin nan um i Bawipa nan Pathian nih an fialmi hna cu òha tein nan tuah.
4 Cun atu cu Bawipa nan Pathian nih nan unau hna kha bia a kam hna bangin dinhnak a pek cang hna; cucaah kir cang u law, Bawipa sal Moses nih Jordan tiva khattelei ral ah an pekmi hna nan covo a umnak ram i nan inn ah khan kal tuah u.
5 Bawipa sal Moses nih, Bawipa nan Pathian cu dawt awk le, a lam vialte kha zulh awk le, a nawlbia hna kha tuah awk le, amah sinah i bek awk le, amah cu nan lung dihlak le nan thlarau vialte in a rianòuan awkah nawl an pekmi hna nawlbia le phungbia cu tuah awkah òha tein i ralring tuah u,” tiah a ti hna.
6 Cucaah Joshua nih thluachuah a pek hna i a kalter hna; cun an inn ah an kal.
7 Cun, Manasseh phun i a cheu kha Moses nih Bashan ah covo a pek hna; sihmanhsehlaw a dang a cheu kha cu Joshua nih Jordan in nitlaklei ram ah an unau hna pawngah covo a pek hna. Cun Joshua nih an inn ah a thlah hna i thluachuah a pek hna tikah,
8 annih sinah, “Chawva a tampi le saòil tampi le ngun, sui, dar, le thir le thilpuan tampi he nan inn ah va kal tuah hna u; nan ral hna sinin nan lakmi hranchaw kha nan unau hna he vaa phaw u,” tiah a ti.
9 Cucaah Reuben mi hna le Gad mi hna le Manasseh phun cheu cu Kanaan ram chungah a ummi Shiloh khua i Israel mi hna sin cun an òhen i an inn ah an kir. Bawipa nih Moses sinin nawl a peknak thawngin an comi an ram Gilead ram ah cun kal awkah an i thawh.
Jordan Tivakam Biakòheng
10 Kanaan ram chung Jordan tivakam hrawng ram kha an va phak tikah Reuben mi hna le Gad mi hna le Manasseh phun cheu nih khan khika ah Jordan tiva pawngah biakòheng nganpi pakhat an ser.
11 Cun Israel mi hna nih, “Zohhmanh, Reuben mi hna le Gad mi hna le Manasseh phun cheu nih Kanaan ram ramri ah Jordan tivakam hrawng ram chung Israel mi hna ta a simi leiphek ah, biakòheng pakhat an ser,” tiah mi nih an chim kha an theih.
12 Cu kong cu Israel mi nih an theih tikah Israel mi nih an dihlak in annih kha doh hna awkah Shiloh ah an i pum.
13 Cun Israel mi nih Gilead ram i Reuben mi hna le Gad mi hna le Manasseh phun cheu sinah cun tlangbawi Eleazar fapa Phinehas kha an thlah,
14 cun amah sinah bawi pahra, Israel phun hna chungin pakhat cio, Israel phun hna chung i a lu a si ciomi hna kha an i tel.
15 Cun Gilead ram i Reuben mi hna le Gad mi hna le Manasseh phun cheu hna sinah khan an ra i annih cu,
16 “ Bawipa mibu nih an ning piin, ‘Israel Pathian cungah nan tuahmi rawinak hi zeidah a si, nihin ah Bawipa kha doh awkah Bawipa zulhnak khan nan pial i biakòheng pakhat nan i ser hi a sullam zeidah a si? Ref 22.16: Deu 12.13-14
17 Peor i kan sualnak, cu ruang i Bawipa mibu cungah rai a tlun i a thianh hmanh kan i thianh khawh rih lomi kha, kan i za rih lo maw, Ref 22.17: Nam 25.1-9
18 cu i nannih i Bawipa sinin i mer nan i timh? Nannih nih Bawipa cu nihin ah nan doh ahcun, Israel mibu dihlak cungah khan thaizing ah a thin a hung lai.
19 Atu cu, nan ram kha a thian lo a si ahcun, Bawipa puan biakinn a dirnak Bawipa ram chungah khan ra ve u law, kan lakah covo i lak ve ko ngat u; sihmanhsehlaw Bawipa tu cu doh hlah u law, Bawipa kan Pathian biakòheng hleiah a dang biakòheng sernak in kannih zong kha amah dotu bantuk ah rel chih kan siter ve hlah u.
20 Pekchanhmi thil kongah khan Zerah fapa Akhan cu zumhawktlak loin a um i Israel mibu dihlak cungah thinhunnak a tla a si lo mei? Cun a òhat lonak ruangah amah lawng kha a thi lo,’ an ti,” tiah an ti. Ref 22.20: Jos 7.1-26
21 Cun Reuben mi hna le Gad mi hna le Manasseh phun cheu nih Israel innchungkhar i an lu hna cu an leh hna i,
22 Bawipa cu pathian hna Pathian a si, Amah nih a hngalh dih, Israel zong nih hngal seh. Bawipa kan doh ruang a si ah maw Amah cung i zumhawktlak lo kan si ruangah maw
23 hi biakòheng hi kan ser i Bawipa sinin a kan pialter a si ahcun, nihin ah hin kan zuah hrimhrim hlah u; cun a cung i khangh thawinak caah siseh, chang thawinak caah siseh, daihnak thawinak caah siseh, kan tuah a si ahcun Bawipa hrimhrim nih kan cungah phuhlamnak cu tuah seh.
24 Cu tuahnak ding caah kan tuahmi a si lo, kan tuahnak cu hmailei ah nan fale nih kan fale cu, “ Bawipa Israel Pathian he zei tlaihnak dah nan ngeih?
25 Zeitintiah nannih Reuben mi hna le Gad mi hna, nannih le kannih karah Bawipa nih Jordan cu ramri ah a ser ko; Bawipa chungah nannih cu covo nan ngei lo,’ an ti hna lai ti kan phan caah kan tuah cu a si. Cuticun nan fale nih kan fale cu Bawipa biak kha an ngolter sual hna hnga.
26 Cucaah kannih nih, ‘Khangh thawinak caah si loin le raithawinak caah si loin,
27 kannih le nannih karlak ah, kan hnu i kan tefa hna karlak ah biahngaltu a si i Bawipa rian cu kannih nih amah hmaika ah kan khangh thawinak le raithawinak le daihnak thawinak in kan rak òuan ve tinak caah biakòheng pakhat ser u sih; hmailei ah nan tefa hna nih kan tefa hna cu, “ Bawipa chungah covo zeihmanh nan ngei lo,” an ti sual hna nakhnga lo,’ tiah kan ti.
28 Cun mah hihi hmailei ah kannih sinah siseh, kan ciruang hna sinah siseh, chim a si sual ahcun, ‘ Bawipa biakòheng a keep hi zohhmanh u, kan pupa hna nih khangh thawinak caah si loin le raithawinak caah si loin, nannih le kannih karlak i biahngaltu si dingah an rak sermi hi,’ tiah kan chim lai tiah kan ruah.
29 Bawipa kan Pathian biakòheng a puan biakinn hmai i a dirmi hlei in, khangh thawinak le chang thawinak le raithawinak caah biakòheng dang sernak thawng in Bawipa lam in nihin ah pial le Bawipa doh cu kan ruat naisai lo!” tiah an ti.
30 Tlangbawi Phinehas le amah sinah a ummi mibu bawi hna, Israel miphun an lu cio hna nih cun, Reuben mi hna le Gad mi hna le Manasseh mi hna nih an chimmi bia kha an theih tikah, an lung a lawm ngaingai ko.
31 Cun tlangbawi Eleazar fapa Phinehas nih Reuben mi hna le Gad mi hna le Manasseh mi hna cu, “ Bawipa cungah rawinak nan tuah lo caah, Bawipa cu kan lakah a um, tiah nihin ah kan hngalh; Israel mi hna cu Bawipa kut chungin nan khamh cang hna,” tiah a ti hna.
32 Cun tlangbawi Eleazar fapa Phinehas le bawi hna cu Gilead ram i Reuben mi hna le Gad mi hna sinin Kanaan ram ah Israel mi sinah an kir i bia kha an rak phorh hna.
33 Cun hi kong nih Israel mi kha an lung a ton hna; Israel mi nih Pathian kha an thangòhat i, Reuben mi hna le Gad mi hna an umnak ram hrawh awk i annih doh awk kha an ceih ti lo.
34 Reuben mi hna le Gad mi hna nih cu biakòheng cu Edb “Ed” sullam cu “biahngaltu” a si. tiah min an sak; “Zeitintiah cu biakòheng cu Bawipa cu Pathian a si tiah kan karlakah biahngaltu a si caah,” an ti.