25
Babilon Nih Kum 70 A Òhio Hna Lai
1 Josiah fapa Jehoiakim, Judah siangpahrang, a bawi kum linak ah Judah mi vialte kong i Jeremiah sin i a phanmi bia cu hihi a si, (cucu Babilon siangpahrang Nebukhadnezzar a bawi kum khatnak a si ve), Ref 25.1: 2Sia 24.1; 2Cha 36.5-7; Dan 1.1-2
2 cun cu bia cu profet Jeremiah nih Judah mi vialte le Jerusalem khua chung i a ummi vialte kha a chimh hna:
3 “Amon fapa Josiah, Judah siangpahrang, a bawinak kum hleithum ri in atu tiang, kum kul le kum thum chung, Bawipa bia cu ka sinah a ra lengmang i nan sinah thlah lo tein ka chim lengmang ve, sihmanhsehlaw nan ngai lo.
4 Bawipa nih thlah lo tein a sal hna a profet hna kha nan sinah a rak thlah lengmang ko hna nain, nannih nih a ngaih zong nan ngai lo, ngaih duhnak zong zeihmanh nan langhter lo.
5 Nannih nih lam òha lo nan zulhmi le thil òha lo nan tuahmi kha nan mertak ahcun, nan pupa hna sin le nanmah sinah Bawipa nih an pekmi ram ah hin zungzal in nan um lai;
6 pathian dang kha nan biak hna lo i an rian nan òuan hna lo i nan biak fawn hna lo i cun nan kut sermi siasal in ka thin zong kha nan ka phawh fawn lo ahcun nan cungah harnak ka tuah lai lo.
7 Sihmanhsehlaw ka bia nan ngai lo, nan kut nih a sermi siasal khan ka thin nan ka phawh, cucaah nanmah lila nih nanmah cungah harnak nan i tlunter,” tiah Bawipa nih a ti.
8 “Cucaah ka bia kha nan ngaih duh lo caah,
9 chaklei miphun vialte kha ka cah hna lai, tiah Ralkapbu Bawipa nih a ti. Ka sal Nebukhadnezzar, Babilon siangpahrang kha ka cah fawn lai. Hi ram le a chung i a ummi hna le a pawngkam i a ummi miphun vialte hna doh awkah ka ratpi hna lai i ka hrawh cikcek hna lai, tuksapur le cekcekhnawh thluahmah awk le zungzal nihsawh awkah ka ser hna lai.
10 Cun annih sinin thanuamnak aw thawng le lawmhnak aw thawng vialte cu ka daihter lai; nupi òhipa aw thawng le a mo aw thawng le rawl rialnak lung aw thawng hna cu ka daihter hna lai; meiinn ceunak cu ka hmih dih hna lai. Ref 25.10: Jer 7.34; 16.9; Biat 18.22-23
11 Kum 70 chung hi ram hi ningzak le tuksapur in a um lai i hi miphun hna nih hin Babilon siangpahrang cu an rianh lai. Ref 25.11: 2Cha 36.21; Jer 29.10; Dan 9.2
12 Cun kum 70 cu a dih tikah, Babilon siangpahrang le a miphun cu an òhat lo ruangah khan dan ka tat hna lai i Khaldi mi hna ram cu zungzal in pakpalawng ah ka ser lai.
13 Cu ram cungah cun ka chimmi vialte, hi cauk chung i aa òialmi vialte, hi mi hna cung tlung dingin profet Jeremiah nih a chimmi vialte kha ka tlunter lai.
14 Babilon mi cu an tuahmi kha ka lehrulh hna lai i miphun tampi le siangpahrang nganngan hna nih sal ah an tlaih hna lai,” tiah Ralkapbu Bawipa nih a ti.
Pathian Nih Miphun Kha Dan A Tat Hna Lai
15 Hi bangin Bawipa, Israel Pathian nih ka sinah a ti: “Hi thinhunnak mitsur hang hrai hi ka kut in i lak law, va kal, tiah kan fialnak miphun vialte cu va dinter hna.
16 Annih nih an din tikah an luak lai i a molh hna lai; cu bantuk cu annih lak i ka thlah dingmi vainam cu a si.”
17 Cucaah Bawipa kut cun hrai cu ka lak i Bawipa nih a ka thlahnak miphun vialte cu ka dinter hna,
18 cu hna cu hihi an si: Jerusalem le Judah khuapi hna le a siangpahrang hna le a bawi hna, annih cu nihin tiang i an si bang hin, ningzak le tuksapur le nihsawh awk thil le serhsat awk thil ah ka canter hna;
19 cun hrai a ding hngatu ding cu hi hna hi an si:
Izipt siangpahrang Faro, a bawi
hna le a upa vialte hna;
20 Izipt mi vialte hna le ramdang mi
Izipt ram chung i a ummi
vialte hna;
Uz ram siangpahrang vialte hna;
Filistin khua Ashkelon, Gaza,
Ekron le Ashdod khua
a tang rihmi cung i
siangpahrang vialte hna;
21 Edom, Moab le Ammon mi
vialte hna;
22 Tair le Sidon siangpahrang
vialte hna;
Mediterranean rili ram i
siangpahrang vialte hna;
23 Dedan, Tema le Buz ram
khuapi vialte hna;
An sam aa metmi vialte hna;
24 Arabia siangpahrang vialte hna;
Thetse ram miphun hna i
siangpahrang vialte hna;
25 Zimri, Elam le Media
siangpahrang hna;
26 Chaklei siangpahrang vialte hna,
a hla he a nai he,
pakhat hnu pakhat in.
Vawlei cung i miphun a simi paohpaoh nih cun an din lai, a hmanung bik ah Babilon siangpahrang nih a din lai.
27 Annih cu na thawh hna lai i, ‘Hitihin Ralkapbu Bawipa, Israel Pathian nih a ti: Hihi ding u, ri u law lua u; nan lak i ka thlah dingmi vainam hmaiah hin tho ti lo dingin tlu u,’ na ti hna lai.
28 Cun annih nih hrai kha na kut in i lak i din kha an duh lo ahcun, na thawh hna lai i, ‘Ralkapbu Bawipa nih, nan din hrimhrim lai.
29 Ka min in auhmi khua cu dan ka tat hmasa bik lai; nannih cu kan luat hnga tiah nan i ruat maw? Luat hlah, nan luat kho lai lo, zeicahtiah vawlei cung i khua a sami vialte tuknak caah vainam kha ka au lio, tiah Ralkapbu Bawipa nih a ti,’ na ti hna lai.
30 “Ka chimmi bia vialte cu
na thanh hna lai i
‘ Bawipa cu cung sangpi khin
a rung au lai,
A umnak hmunthiang khin khuarit in
a rung ri lai.
Amah tuurun chungah khan fak piin
a huk lai i
Mitsur thei a nengtu hna an au
thawng bantukin
vawleicung mi vialte cungah khan
a au lai.
31 A au thawng cu vanhramdeng tiang
a thang lai,
zeicahtiah Bawipa cu
miphun vialte cungah bia a ngei i
minung vialte kha taza a cuai hna lai i
a sualmi cu vainam in an thi lai,
tiah na chimh hna lai,’
32 Zohhmanh, rawhralnak cu
miphun pakhat sinin pakhat sinah
a karh chin lengmang i
thlichia cu vanhramdeng in a tho lio,
tiah Bawipa nih a ti.
33 Cun cu ni ah cun Bawipa nih a thahmi hna cu vawlei khattelei kam in khattelei kam tiang hmunthur bantukin an ril liangluang ko lai. Ahohmanh nih an òah hna lai lo, a pumh zong an pum hna lai lo, a vui zong an vui hna lai lo.
34 Maw tuukhal hna, òap u law ai u,
Tuurun bawi hna, vutcam lakah
i lawng u.
Atu cu thahnak hmun i kal kha
nan chel a si cang i
tuukawng òha bantukin nan tlu lai.
35 Tuukhal hna caah zamnak hmun
khuazei hmanh ah a um lai lo.
Tuurun bawi hna caah luatnak lam
zeihmanh a um lai lo.
36 Tuukhal hna ai thawng cu
ngai hmanh,
Tuurun bawi hna kiao thawng cu
thei hmanh,
Zeicahtiah an tlonnak ram cu
Bawipa nih a hrawh lio i,
37 A thinhun ruangah dai tein a ummi
an innlo hna cu a rawk dih.
38 Chiandeih a kua a chuahtakmi
bantuk khan an zam,
Zeicahtiah an ram cu pakpalawng ah
a cang cang,
Vainam le thinhunnak nih
pakpalawng ah a canter dih cang.