19
Tlak Um Kuai Kong
1 Bawipa nih hitin a ti: “Va kal law tlak in sermi thawl pakhat va caw. Cun an upa tlawmpal hna le an tlangbawi tlawmpal kha i kalpi hna law,
2 Ben-hinnom Nelrawn i Peipahau Kutka luhnak ah khan va kal u, cun khika ah khan kan chimhmi bia cu va thanh. Ref 19.2: 2Sia 23.10; Jer 7.30-32; 32.34-35
3 ‘Maw Judah siangpahrang hna le Jerusalem khuami hna, Bawipa bia hi thei tuah u,’ va ti. Hi bangin Ralkapbu Bawipa, Israel Pathian nih a ti: Hi hmun cungah hin rawhralnak ka tlunter lai i mah cu a theimi paoh cu, an hna zaizil khing dihlak in a khenh hna lai.
4 Zeicahtiah hi mi hna nih hin an ka hlawt i hi hmun hi keimah ta si hlah seh law cu bang cun an tuah, anmah nih siseh, an pupa hna nih siseh, Judah siangpahrang hna nih siseh, an hngalh bal lomi pathian hna sinah khan rai an thawi i hi hmun cu a sual lomi thisen kha an khahter.
5 Baal caah khan hmunthiang an ser hna i cuka ah cun an fapale hna kha baal ca i khangh thawinak ah an khangh hna. Mah cucu keimah nih ka pekmi hna nawlbia a si lo; a chim zong ka chim bal lo, ka lunglai zongah a chuak bal lo. Ref 19.5: Lev 18.21
6 Cucaah hi hmun cu Tofeth ti si ti lo le Ben-hinnom Nelrawn ti si ti loin Thahnak Nelrawn ti a si cang lai ni kha a ra lio, tiah Bawipa nih a ti.
7 Hi hmun ah hin Judah le Jerusalem khuakhannak kha thawl khuai bantukin ka khuai lai. Annih cu an ral hna nih khan an tei hna lai i vainam in an thah hna lai. An ruak cu van i a zuangmi va hna le vawlei i a tlongmi saram hna sinah rawl caah ka pek hna lai.
8 Cun hi khua hi mi thla a hlauhmi khua le cekcekhnawh thluahmah awk khua ah ka ser lai; a cung i òhat lonak a tlungmi vialte ruangah hin a pawng i a kalmi paoh cu an thla a hlauh hna lai i an cekcek len lai.
9 Cun khika i a ummi hna cu anmah fale sa lila kha ka eiter hna lai. An ral hna le annih thah a duhmi hna nih an kulh hna tikah, an umtuning kha a har tuk hringhran lai caah pakhat le pakhat kha an i ei lai.
10 Cun nangmah sinah a kalmi hna hmuhhngan te ah khan thawl kha na khuai lai i
11 na thawh hna lai i, Ralkapbu Bawipa nih hi bangin a ti: ‘Hi bantuk hin hi miphun le hi khuapi hi ka khuai lai, mi nih tlak-um cu an khuai tikah remh òhan khawh a si ti lo bantukin, remh òhan khawh ti lo dingin ka khuai lai. Cun mi nih an mithi hna cu, hmun dang ah vuinak a um lo caah Tofeth ah an vui hna lai.
12 Mah hihi, hi hmun cungah le a chungah a ummi hna cungah ka tuah dingmi cu a si,’ tiah Bawipa nih a ti: Hi khua cu Tofeth bantuk ka siter lai.
13 An thur ruangah Jerusalem khua inn hna le Judah siangpahrang inn hna cu Tofeth bantuk an si lai § vancung thil bu sin i raithawinak a cung i an khanghnak inn vialte le pathian dang hna sin i thlet thawinak an thletnak inn vialte hna cu, Tofeth bantukin an thur lai,’ a ti, tiah na chimh hna lai,” tiah a ti.
14 Cun Jeremiah cu Bawipa nih bia va chim ti i a kalternak hmun Tofeth khan a ra i Bawipa inn a tual ah khan a dir. Mi vialte cu a thawh hna i,
15 “Ralkapbu Bawipa, Israel Pathian nih hi bangin a ti: Hi khuapi cungah le a pawngkam khua vialte ah hin ka tlunter lai tiah ka rak timi dantatnak kha, nannih nih nan lung a òhawn i ka bia kha ngaih nan duh lo caah, ka tlunter taktak lai, a ti,” tiah a ti.