18
(Mat 26:47-56; Mar 14:43-52; Luk 22:47-53)
1 Jesuh nih cu bia a chim dih cun a hnuzul hna he Kidron tiva kuang kha an hei tan i, cuka ah cun dum pakhat a um i a hnuzul hna he cun an va lut.
2 A rawitu Judas zong nih khan cu hmun cu a hngalh; zeitintiah Jesuh le a hnuzul hna kha cuka ah cun an i tong tawn.
3 Cucaah Judas nih ralkap bu khat le tlangbawi upa hna nih an thlahmi biakinn cawngtu Farasi hna a rak ratpi hna; meiinn le meifar le hriamnam an i ken.
4 Jesuh nih a cungah a tlung laimi thil vialte cu a hngalh dih caah hmaiah a hung chuak i, “Ahodah nan kawl?” a ti hna.
5 Annih nih, “Nazareth khuami Jesuh,” an ti.
6 Jesuh nih, “Keimah hi ka si,” tiah a leh hna. Amah rawitu Judas cu an sinah khan a dir ko. An sinah, “Keimah hi ka si,” a ti tikah khan hnulei ah an i tawn i vawlei ah an tlu.
7 “Ahodah nan kawl?” tiah a hal òhan hna.
8 Cun annih nih, “Nazareth khuami Jesuh,” an ti òhan. Jesuh nih, “Keimah hi ka si tiah kan chimh cang hna; cucaah keimah nan ka kawl ahcun mah hna hi cu kal ko hna seh,” a ti.
9 Cucu, “Na ka pekmi lak khan pakhat hmanh ka thlau hna lo,” tiah a rak chim cangmi a bia a tlin nakhnga caah a si.
10 Cun Simon Peter nih vainam aa kenmi kha a zuh i tlangbawi zik sal a tuk i a orhlei hnakhaw pet koin a sah. Cu salpa min cu Malkhas a si.
11 Jesuh nih Peter cu, “Na vainam kha a kawng ah sawh òhan. Ka Pa nih a ka pekmi hrai cu ka ding hnga lo maw?” a ti.
12 Cucaah ralkap run hna le an bawi hna le Judah mi hna thlahmi biakinn cawngtu Farasi hna nih cun Jesuh cu an tlaih i an khih.
13 A hmasa ah Annas sinah an kalpi; zeitintiah amah cu cu kum i tlangbawi zik a simi Kaiafas nupi pa a si.
14 Kaiafas hi mi zapi caah mi pakhat cu a thih awkah a tlak ko, tiah Judah mi sin i ruahnak petu kha a si.
(Mat 26:69-75; Mar 14:66-72; Luk 22:34-62)
15 Simon Peter nih Jesuh cu a zulh i a hnuzul a dang pakhat zong nih a zulh ve. Cu hnuzul cu tlangbawi zik he an i hngalh caah a zung chung tiangin Jesuh he cun an lut;
16 cu lioah cun Peter cu innka lengah a dir. A hnuzul dang pakhat, tlangbawi zik he aa hngalmi nih khan sinum innka cawng nu kha a va chimh i Peter cu a chungah a luhpi.
17 Sinum innka cawng nu nih cun Peter cu, “Nangmah zong, hi mipa hnuzul pakhat na si ve lo maw?” a ti. “Ka si lo,” tiah a leh.
18 Miòhi hna le cawngtu bawi pawl hna nih cun meihol an rak tih; khua a sih caah dir buin mei cu an to. Peter zong cu an sinah a um ve i a dir i mei ah cun aa em.
19 Jesuh cu tlangbawi zik nih a hnuzul hna kong le a cawnpiaknak kong kha a hal.
20 Jesuh nih, “Langhngan tein vawlei sinah hin ka chim ko; sinakok le biakinn ah ka cawnpiak hna i cuka cu Judah mi vialte zong an rat cionak a si; a thli in zeihmanh ka chim lo.
21 Zeicahdah keimah na ka hal? Ka bia a theimi hna kha ta na hal hna; ka chimmi cu an hngalh ko,” a ti.
22 Cuti a chim ah cun cawngtu bawi lak i pakhat a dir komi nih Jesuh cu a kut in a bengh, “Cuticun maw tlangbawi zik bia leh phung a si?” a ti.
23 Jesuh nih, “Ka chimmi ahmaan lo a si ahcun ahmaan lonak ah biatheitu na si awk a si ko, ka chimmi kha ahmaanmi a si ahcun zeicahdah na ka bengh?” a ti.
24 Annas nih tlangbawi zik Kaiafas sinah Jesuh cu khih buin a hei thlah.
25 Simon Peter cu a dir buin mei ah aa em. A sinah, “A hnuzul lak i pakhat na si ko lo maw?” an ti. Aa pheh i, “Ka si lo,” a ti.
26 Tlangbawi zik miòhi lak i pakhat, Peter nih a hnakhaw a sahmi rualchanpa nih, “Dum ah khan a sinah kan hmu ko lo mei?” tiah a hal.
27 Peter nih aa pheh òhan. Cu cangka cun ar a khuang colh.
28 Cun Jesuh cu Kaiafas inn in Mangki zung ah an kalpi. Khuadei kate a si i zung ah cun an lut lo; zeicahtiah i thurhhnawmh loin Lanhtak Puai rawl ei an duh caah a si.
29 Cucaah Pilat cu a va chuak i an sinah, “Hi pa hi zei sual dah nan puh?” a ti hna.
30 “Mah pa hi òhat lonak a tuahmi a si lo ahcun kan rak chuahpi hnga lo,” tiah an leh.
31 Cucaah Pilat nih, “I kalpi u law nanmah phung in bia va ceih u,” a ti hna. Judah mi hna nih, “Kannih cu mi thahnak nawl kan ngei lo,” tiah an leh.
32 Cucu amah Jesuh nih zei bantuk thihnak in dah a thih lainak kong a rak chimmi a tlin nakhnga caah a si.
33 Cun Pilat cu Mangki bawi inn ah a lut òhan i Jesuh cu a auh, “Judah mi Siangpahrang cu na si maw?” tiah a hal.
34 “Nangmah lung chuak in maw na chim, asiloah, midang nih dah ka kong hi an in chimh?” tiah Jesuh nih a leh.
35 Pilat nih, “Judah mi ah maw na ka rel? Na miphun le tlangbawi upa hna nih dahkaw ka sinah an in chanh; zeidah na tuah sual?” tiah a leh.
36 Jesuh nih, “Ka siangpahrang sinak cu hi vawlei ah hin a si lo; ka siangpahrang sinak cu hi vawlei ah hin rak si seh law Judah mi hna sinah chanh ka si nakhnga lo ka miòhi hna nih an doh hnga; sihmanhsehlaw ka siangpahrang sinak cu hi vawlei hin a si lo,” tiah a ti.
37 Pilat nih, “A si ah, siangpahrang na si kun mu?” a ti. Jesuh nih, “Nangmah nih siangpahrang na si, na ka ti; kei cu biatak hngalhter awk caah ka chuahchannak le hi vawlei i ka ratnak chan cu a si; cucaah biatak i a ummi paoh nih cun ka aw an theih tawn,” a ti.
38 Pilat nih, “Biatak cu zeidah a si?” a ti.
(Mat 27:15-31; Mar 15:6-31; Luk 23:13-15)
Cu a chim hnu cun Judah mi hna sinah cun a va chuak òhan i, “A cungah sualnak zeihmanh ka hmu lo.
39 Sihmanhsehlaw Lanhtak Puai ah hin nan ca i mi pakhat kha thlah awk phung nan ngei; Judah siangpahrang hi nan caah thlahter nan ka duh maw?” a ti hna.
40 An au òhan i, “Hi pa hi cu si hlah seh, Barabbas tu siseh!” an ti. Barabbas cu rokhmangmi a si.