6
Pathian Nih Gideon A Auhnak
1 Israel mi nih Bawipa mithmuh i a òha lomi kha an tuah i Bawipa nih Midian kut chungah kum sarih a pek hna.
2 Cun Midian kut nih cun Israel cu a tei; Midian ruangah cun Israel mi hna nih tlang i a ummi khor hna le lungkua hna le ralhau hna cu an i ser.
3 Zeitintiah Israel mi nih thlaici an tuh fate Midian mi hna le Amalek mi hna le Nichuahlei mi hna nih an ra i an hung doh hna;
4 an hung chim hna i vawlei in a chuakmi thil cu Gaza pawng tiangin an hrawh dih i Israel chungah i cawmnak zeihmanh an nganh hna lo, tuu, cawtum le laa tiangin.
5 Zeitintiah annih nih an saòil he an thlam he an ra i khaubok zat in an ra; anmah he an kalauk he rel cawk an si lo; cucaah an ra luhpah in ram cu an hrawh dih ko.
6 Cun Midian ruangah cun Israel cu a òumchuk ngaingai i Israel mi nih bawmhnak duh ah Bawipa sinah an au.
7 Midian mi hna ruang i Israel mi nih Bawipa sin i an au tikah,
8 Israel mi sinah cun Bawipa nih profet pakhat a thlah; cun anih nih annih sinah, “Hi bangin, Bawipa, Israel Pathian nih, Izipt ram in ka hun in hruai hna i saltannak inn chungin kan chuah hna;
9 cun Izipt mi hna kut le nanmah an hremtu hna kut chungin kan luatter hna i nan hmai in ka dawi hna i an ram cu kan pek hna;
10 cun nannih sinah, ‘Keimah cu Bawipa nan Pathian cu ka si; an ram chung i nan umnak Amor mi hna pathian hna cu upatnak nan pe hna lai lo, ka ti; sihmanhsehlaw ka aw kha zei ah nan rel lo,’ a ti,” tiah a ti.
11 Cun Bawipa vancungmi cu a ra i Abiezrit fapa Joash ta a simi kuhthing toiah khan a òhu; cucu a fapa Gideon nih Midian mi hna sinin thuh awkah mitsur hang nennak chung i changvut a tuk lio kha a si.
12 Cun Bawipa vancungmi cu a sinah a lang i a sinah, “ Bawipa cu na sinah a um, nang a òhawng i ralòhapa,” tiah a ti.
13 Cun Gideon nih anih cu, “Bawipa, kan nawl, Bawipa cu kan sin i a um a si ahcun zeicahdah mah thil vialte nih hin a kan tlunhnawh kun? Kan pupa hna nih, ‘Izipt ram in Bawipa nih a kan chuahpi lo mei,’ ti i kan sin i an ti tawnmi khuaruahhar thil vialte hna cu khuazei ah dah an si kun? Sihmanhsehlaw atu cu Bawipa nih a kan hlonh cang i Midian kut chungah a kan pek cang,” tiah a ti.
14 Cun Bawipa cu a sin leiah aa mer i, “Hi na òhawnnak he hin kal law, Midian kut chungin Israel cu chuah tuah; keimah nih kan thlah lo mei?” tiah a ti.
15 Cun anih nih a sinah, “ Bawipa, kan nawl ko, zeitindah Israel cu ka chuah khawh lai? Zohhmanh ka phun cu Manasseh chungah a der bik a si i kanmah innchungkhar chungah keimah cu a hme bik ka si,” tiah a ti.
16 Cun Bawipa nih a chawnh i, “Sihmanhsehlaw nangmah sinah ka um lai i Midian mi hna cu mi pakhat tluk ceu in na thah dih ko hna lai,” tiah a ti.
17 Cun anih nih, “Nangmah sinah mithmai òha ka hmuh a si ahcun, nangmah cu a ka chawntu na si tinak ah hmelchunhnak pakhat ka hmuksak tuah.
18 Nangmah sinah ka rat i ka laksawng ka rak put i na hmai i ka chiah hlantiang cu, hika hin i òhial sawh hlah tiah kan nawl,” tiah a ti. Cun anih nih, “Na kir òhan hlantiang ka um ko lai,” tiah a ti.
19 Cucaah Gideon cu a inn chungah a vung lut i meheh fa pakhat le changvut ephah pakhat in sermi thilnu cawh lo changreu kha a timhlamh; sa cu bawm chungah a khumh i a hang cu um chungah a chiah i a sinah kuhthing toiah cun a rak put hna i a pekchanh.
20 Cun Pathian vancungmi nih cun a sinah, “Sa le thilnu cawh lo changreu kha la hna law, hi lung cungah hin chia hna, cun a hang kha toih hna,” tiah a ti. Cun cu bang cun a tuah.
21 Khi tikah Bawipa vancungmi nih a kut i aa putmi òhiangòhunh par cun, sa le thilnu cawh lo changreu kha a hei sawh hna i a tawngh hna; cun lung cun mei a tho i sa le thilnu cawh lo changreu cu a kangh dih hna; cun Bawipa vancungmi cu a mit hmuh lo ah a lo.
22 Khi tikah Gideon nih amah cu Bawipa vancungmi a si kha a hngalh; cun Gideon nih, “Aize, maw Bawipa Pathian! Atu cu Bawipa vancungmi cu hmaitonh in ka hmuh cang cu ta,” tiah a ti.
23 Sihmanhsehlaw Bawipa nih cun a chawnh i, “Na cungah daihnak um ko seh; òih hlah, na thi lai lo,” tiah a ti.
24 Cun khika ah Gideon nih Bawipa caah biakòheng pakhat a ser i ‘ Bawipa cu daihnak a si’ tiah min a sak. Nihin ni tiang hin Abiezer mi hna ta a simi Ofrah khua ah cun a um ko.
25 Khi zan ah Bawipa nih a sinah, “Na pa cawtum, cawtum pahnihnak kum sarih a timi kha la law, na pa ta a simi Baal biakòheng kha chim dih tuah, cun a pawng i a ummi Asherah kha hau;
26 cun hika ralhau cungah hin Bawipa na Pathian caah lung a ningcang te i tian in biakòheng pakhat ser tuah; cun cawtum pahnihnak kha i lak law, Asherah na hau laimi thing cun khangh thawinak caah pechan tuah,” tiah a ti.
27 Cucaah Gideon nih, a sinum hna lakin pa pahra a lak hna i Bawipa nih a chimh bang khan a tuah; sihmanhsehlaw amah innchungkhar hna le khuami kha, chun i tuah awkah cun a òih tuk hna caah zan ah a tuah.
28 Cu khuami cu zingkate i an thawh tikah, zohhmanh, Baal biakòheng cu a cim i a pawng i Asherah cu aa hau i cawtum pahnihnak cu biakòheng aa sami cungah cun pekchanh a rak si.
29 Cun pakhat le pakhat cu, “Aho nih dah mah hi a tuah?” tiah an i ti. Cun an i dothlat i an i hal hnuah, “Joash fapa Gideon nih mah thil hi a tuah,” tiah an ti.
30 Cun khuami hna nih cun Joash cu, “Na fapa cu rak chuahpi, Baal biakòheng cu a chimh i a pawng i a ummi Asherah cu a hau caah a thih awk a si,” tiah an ti.
31 Sihmanhsehlaw Joash nih a hung chuahhnawhtu vialte hna sinah cun, “Baal cu maw nan òanh ko lai? Amah cu maw nan humhak ko lai? Amah a òanhtu paoh cu, zing ah hin thah a si lai. A biakòheng kha chimh a si caah, pathian a si ahcun amah le amah i òanh ngat seh,” tiah a ti.
32 Cucaah amah cu khi ni ah Jerubbaal tiah min sak a si, a sullam cu, a biakòheng kha a chimh dih caah, “Baal nih amah cu doh tuah ngat seh,” ti a si.
33 Cun Midian mi vialte le Amalek mi hna le nichuahlei mi hna cu hmunkhat ah an ra i Jordan tiva tan in Jezreel Nelrawn ah an riak.
34 Sihmanhsehlaw Bawipa thlarau cu Gideon cungah a tlung; cun muko kha a tum i Abiezer mi kha amah zulh awkah an i pum.
35 Cun Manasseh mi vialte chung zongah lamkaltu a thlah hna i annih zong nih amah zulh awkah an chuak ve. Cun Asher, Zebulun le Naftali ah lamkaltu a thlah hna; annih zong nih an hun fonh ve hna.
36 Cun Gideon nih Pathian sinah cun, “Nangmah nih na chim cang bangin keimah kut in Israel kha na chuah ding a si ahcun.
37 Zohhmanh, phuhri ah tuu hmul ka chiah lai; tuu hmul cung lawng i dap a um i vawlei vialte cu a ro ko òung ahcun, khi tikah nangmah nih na chim cang bantukin keimah kut in Israel kha na chuah hna lai ti kha ka hngalh lai,” tiah a ti.
38 Cun cu bang cun a si taktak. A thaizing ah tuan tein a thawh i tuu hmul kha a sur tikah, kheng khat ti tuu hmul cun a sur.
39 Cun Gideon nih Pathian sinah, “Ka cungah na thinhunnak kanghter sawh hlah, hi voi khatte hi cu ka chimter ko rih; hi voi khatte hi cu tuu hmul he hin ka hneksakter ko rih; tuu hmul lawnglawng hi ro seh law vawlei vialte ah hin dap tla seh tiah kan nawl,” tiah a ti.
40 Cun cu bangin Pathian nih cu zan ah cun a tuah; zeitintiah tuu hmul lawng cu a ro i vawlei cung vialte ah cun dap a um.