20
Benjamin Mi Kha Israel Mi Nih An Tuk Hna
1 Cun Israel mi vialte cu Dan in Beersheba tiang, Gilead zong tel chih in an chuak i, mibu cu Bawipa sinah Mizpah ah minung pakhat bantukin an i pum.
2 Cun mi vialte haotu, Israel phun vialte haotu hna cu, Pathian mi aa pummi hna chungah cun an hung chuak i vainam putmi ralkap 400-000 an si.
3 (Benjamin mi nih Israel mi hna cu Mizpah ah an hung kal ti kha an theih.) Cun Israel mi nih, “Zeitindah hi òhat lonak hi a chuah ning a si, kan chim tuah,” tiah an ti.
4 Cun an nawn minu va Levi mi nih khan a leh hna i, “Benjamin ta a simi Gibeah cu, cuka i riah awkah ka nuchun le keimah cu kan phan.
5 Cun Gibeah mi hna nih cun an ka chuahhnawh i zan ah ka riahnak inn cu an kulh. Keimah kha thah an ka timh i ka nuchun kha an sual i a thi.
6 Cun ka nuchun cu ka lak i ka can i Israel comi ram chung dihlak ah khan ka kuat; zeitintiah Israel chungah fihnung le hornak kha an tuah.
7 Nannih Israel mi vialte hna nih, ngaihmanh u, nan ruahnak le a òha nan tining kha chuah cio tuah u,” tiah a ti hna.
8 Cun mi vialte cu minung pakhat bantukin an tho i, “Ahohmanh kan thlam ah kan kal lai lo i ahohmanh kan inn ah kan tlung lai lo.
9 Sihmanhsehlaw Gibeah cungah kan tuah laimi cu mah hihi a si: camcawhfung khiah in kan i thim lai i kan hung doh lai i,
10 Israel miphun vialte chungin minung 100 ah 10, 1-000 ah 100, 10-000 ah 1-000 in kan lak hna lai i mi ca i rawl pechantu an si lai, zeitintiah an rat tikah Benjamin ta a simi Gibeah cu Israel chung i hornak sualnak a tuahmi vialte caah khan teirul an cham lai,” tiah an ti.
11 Cucaah Israel mi vialte cu lungthin khat tein cu khua doh awkah an i pum.
12 Cun Israel miphun hna nih Benjamin phun chung dihlak ah khan mi an thlah hna i, “Nan lak i a chuakmi hi zei òhat lonak dah a si?
13 Cucaah atu ah kha mi hna, Gibeah i a ummi mizeiruaramlo hna kha, kan thah hna i òhat lonak cu Israel chungin kan thianh naklai, kan pe hna u,” an ti. Sihmanhsehlaw Benjamin mi hna nih cun an unau Israel mi hna bia kha an ngai duh lo.
14 Cun Benjamin mi hna cu Israel mi he i tuknak hmun i kal awkah Gibeah i khua hna cun an chuak.
15 Cun khi ni ah Benjamin mi hna nih an khua hna chungin vainam pumi an pumhmi hna cu 26-000 an si, Gibeah i a ummi hna nih an thim cikcekmi 700 hna hleiah khan.
16 Mah hi hna vialte lakah hin thim cikcekmi 700 kehtlak an um; an dihlak in sam zai hmanh a ngan lomi lungherh cheh thiam an si.
17 Cun Israel mi nih, Benjamin chim loin, vainam pumi 400-000 an pumh hna; hi mi vialte cu raltuk thiammi an si dih.
18 Israel mi cu an tho i Bethel ah an hung kal i Pathian kha an hal, “Kannih lakah hin ahodah Benjamin doh awkah a kal hmasa bik lai?” an ti. Cun Bawipa nih, “Judah a hung kal hmasa bik lai,” a ti.
19 Cun Israel mi cu zingka in an tho i Gibeah kha an riahhnawh.
20 Cun Israel mi cu Benjamin doh awkah khan an chuak i, Israel mi nih cun annih kha Gibeah i doh awkah cun òan hmun an i serh.
21 Benjamin mi hna nih Gibeah chungin an hung chuak i khi ni ah Israel mi cu 22-000 an hrilh hna.
22 Sihmanhsehlaw Israel mi cu an i serh òhan i hmasa bik ni i an òan hmun khuarnak hmun ah khan òan hmun an khuar òhan.
23 Cun Israel mi nih an hung kal i Bawipa hmaiah zanlei tiang an òap; “Kan unau Benjamin mi hna he i doh awkah kan hung kal òhan lai maw?” ti in Bawipa kha an hal. Cun Bawipa nih, “Hung doh òhan hna u,” a ti.
24 Cucaah a ni hnihnak ni ah Israel mi nih Benjamin mi cu an fuh òhan hna.
25 A ni hnihnak ni ah cun Gibeah in Benjamin cu annih kha doh awkah a chuak i Israel mi chungin 18-000 a hrilh hna; an dihlak in vainam pumi an si.
26 Cun Israel mi vialte, ralkap bu cu an ningpi in, an hung kal i Bethel an phan i an òap; Bawipa hmaiah an òhu i khi ni cu zanlei tiang rawl an ul i Bawipa hmaiah khangh thawinak le daihnak thawinak kha an pekchanh.
27 Cun Israel mi nih Bawipa kha an hal i (khi caan lioah Pathian biakamnak kuang cu khika ah a um i
28 Aaron fapa Eleazar i fapa Phinehas nih khi caan lioah a hmaiah rian a òuan) annih nih, “Kan unau Benjamin mi hna kha doh awkah kan chuak rih lai maw, asiloah kan ngol lai dah?” tiah an ti. Cun Bawipa nih, “Hung kal u; zeitintiah thaizing ah cun annih cu nan kut chungah kan pek hna lai,” a ti.
29 Cucaah Israel nih Gibeah velchum in lamhruang attu mi an chiah hna.
30 Cun ni thumnak ni ah Israel mi cu Benjamin mi kha doh awkah an hung kal i voi dang bantuk khan Gibeah pawngah cun òan hmun an khuar.
31 Cun Benjamin mi hna nih mi cu an chuahhnawh hna i khua lengah an va lan; cun voi dang bantuk khan mi cu thah hram an thawk hna, lam hna le ramlak ah Israel mi 30 tluk an thah hna. Lam pakhat cu Bethel ah a hung kalmi a si i a dang cu Gibeah ah a kalmi a si.
32 Cun Benjamin mi nih, “Hmasa bantukin kan hmaiah an zam dih,” an ti. Sihmanhsehlaw Israel mi nih, “Zam u si law, khua chungin lam ah lem hna u sih,” an ti.
33 Cun Israel mi vialte cu an umnak hmun in an chuak i Baal-tamar ah òan hmun an khuar; cun lamhruang attu Israel mi hna nih khan Geba nitlaklei i an umnak hmun khan an hung chuak zutmat.
34 Israel mi lakin thim cikcekmi 10-000 hna nih khan Gibeah cu an chuahhnawh i an i doh cu a fak. Sihmanhsehlaw Benjamin mi hna nih rawknak nih a kan naih ti kha an hngal lo.
35 Cun Bawipa nih Benjamin cu Israel hmaiah a tei; Israel mi nih khi ni ah Benjamin mi cu 25-100 an thah hna. Hi mi hna cu vainam tlai an si dih.
36 Cucaah Benjamin mi nih kan sung cang ti kha an hngalh.
Israel mi hna nih Benjamin mi hna hmaiah an i zamter, zeicahtiah Gibeah kha lamhruang in a attu hna kha an i bochan hna.
37 Cun lamhruang attu pawl nih cun khulrang in an tho i Gibeah kha an nam; lamhruang attu hna cu an chuak i khua cu vainam in an sam dih.
38 Israel mi le lamhruang attu hna nih an rak thimmi hmelchunhnak cu, khuapi chung khan meikhu nganpi an chuahter tikah,
39 Israel mi nih raltuknak leiah kir òhan awk a si lai ti a si. Benjamin nih cun Israel mi cu 30 tluk thah hram an thawk cang; annih nih, “Hmasa bik kan i tuknak bantuk khan, kan hmaiah an sung hrimhrim òhan ko,” an ti.
40 Sihmanhsehlaw hmelchunhnak cu khuapi chung i meikhu in kai hram a thawk tikah Benjamin mi hna nih an hnulei kha an hei zoh i zohhmanh, khua cu a ning piin meikhu in van ah a kai.
41 Cun Israel mi cu an i let i Benjamin mi hna cu vansang au in an um, zeitintiah rawknak nih a kan naih ti kha an hmuh.
42 Cucaah Israel mi hna hmaiah cun ramlak leiah khan an zam; sihmanhsehlaw raltuknak nih a phanh òhiamòhiam hna i khua chungin a hung chuakmi hna kha an lakah an i cawh cang i an thah hna.
43 Benjamin mi hna cu an sam hna i Nohah in Gibeah nichuahlei ral tiang an dawi hna i an lamh hna.
44 Benjamin mi cu 18-000 an thi, an dihlak in miralòha an si.
45 Cun an i mer i ramlak lei Rimmon lungpi leiah khan an zam; lampi ah mi 5-000 an thi i Gidom tiangin fak piin dawi an si i mi 2-000 an thi.
46 Cucaah khi ni ah Benjamin mi a thimi hna cu vainam pu, 25-000 an si, an dihlak in miralòha an si.
47 Sihmanhsehlaw mi 600 cu an i mer i ramlak lei Rimmon lungpi leiah khan an zam i Rimmon lungpi ah khan thla li an um.
48 Cun Israel mi nih Benjamin mi cu an kirhnawh òhan hna i vainam in an sam hna. Mi siseh, saram siseh, an hmuhmi paohpaoh an sam dih hna. Cun an hmuhmi khua vialte zong mei in an duah hna.