17
1 “Ka lungthin cu a kuai cang,
ka ni cu rel an si cang;
Thlan nih a ka hngah ko cang.
2 Kaa mernak paoh ah mi nih
an rak ka nihsawh,
Ka thin an ka phawhnak cu ka mit nih
a hmuh zungzal ko.
3 Pathian, ka lih ka chim lo, ka bia cu
ka cohlanpiak ko,
Ka chimmi cu, ahmaan, tiah a titu
ding an um lo.
4 Hngalhthiamnak an ngeih nakhnga
lo, an lung cu na phih hna i
Ka cungah diriam in umter hna hlah.
5 Phungthluk bia hlun ah, mi
pakhatkhat nih tangka ruangah
a hawipa kha a rawi ahcun,
A fale mit kha a caw lai, ti a si.
6 Hi phungthluk bia cu keimah cungah
an hman i
Mi nih an theih i an ra i ka hmai ah
cil an ka chak.
7 Ngaihchiatnak in ka mit cu
a mui cang i
Ka kutke vialte hi thladem bantuk
ceo an si cang.
8 Miding ka si, aa timi hna cu
an khuaruah a har i
Pathian zei i a rel lomi ah an ka chiah.
9 Hmaizah awktlak ka si, aa timi hna
nih cun,
Kanmah hi kan hmaan, tiah
an i ruat chin lengmang ko.
10 Asinain, ka hmaiah an dihlak in
ra dir hna seh law,
An lakah mifim pakhat hmanh
an um lo kha ka hmuh ko lai.
11 “Ka ni cu an liam cang, ka timhmi cu
an rawk cang,
Ka ruahchannak cu a lo cang.
12 Chun cu zan ah a cang cang, zingka
ceunak cu ka hmaiah a mui cang.
13 Ruahchannak zeihmanh ka ngei ti lo,
Sheol hi ka umnak ding inn a si ko,
Khika ah ka it lai: mui lakah cun
ka it ko lai.
14 Thlan cu, ka pa na si, ka ti lai i
A ka eitu rungrul cu, ka nu le ka far
nan si, ka ti hna lai.
15 Khuazei ah dah ruahchannak cu
ka ngeih?
A ka hmuhpiaktu aho tal
an um maw?
16 Keimah he vui òi awk le Sheol i
vung kal òi awkah,
Aa timmi aho tal an um maw?”
tiah a ti.