1 Sihmanhsehlaw u le nau hna, a ni le a caan kong nan sinah ca òial a hau lai lo; 2 zeitintiah Bawipa Ni cu zan i mifir a rat bantukin a ra lai ti cu nan hngalh komi a si. 3 Mi nih, “Daihnak le himnak a um ko,” an ti lioah nau nganfah bantukin hlauhsaphak ah rawhnak nih a phanh hna lai i an luat lai lo. 4 Sihmanhsehlaw u le nau hna, muihnak i a ummi nan si lo caah cu Ni nih cun mifir bantukin an pauh hna lai lo. 5 Zeitintiah nan dihlakin chun le ceunak fa nan si; zan le muihnak fa kan si lo. 6 Cu a si caah cun midang bantukin it ti hlah u sih, tho u si law hriphrio tein um u sih. 7 Zeitintiah a itmi cu zan ah an it tawn i a rimi hna zong zan ah an ri tawn. 8 Sihmanhsehlaw chun minung kan si caah hriphrio tein um u si law zumhnak le dawtnak òangphaw i hruk u sih, khamh ruahchannak luchin i chinh u sih. 9 Zeitintiah Pathian nih a thinhunnak ing dingin a kan khaukhih lo, Bawipa Jesuh Khrih thawngin khamh si awk tu ah a kan khaukhih deuh. 10 Kan ih a si zong, kan i hlauh a si zongah, amah sin i kan nun khawh nakhnga caah kan caah a thi. 11 Cu a si caah atu zongah nan tuah bantukin pakhat le pakhat thazang i pe u law i hlercawi cio u.

12 U le nau hna, nan lakah rian a òuanmi le Bawipa ca i nun awkah an hruaitu hna le an chimhringtu hna kha upat hna u tiah kan in nawl hna, 13 Mah hna kha an òuannak ruangah dawtnak in sunhsak hna u law nannih zong pakhat le pakhat i rem tein um u. 14 Cun thathumi hna cu chimhring hna u law hnabei a dongmi hna kha thazang pe hna u; a derthawmmi bawm hna u law an dihlak cungah nan lung sau ko u, tiah kan in forh hna. 15 Ahohmanh chiatnak kha chiatnak in i lehrul hlah u law pakhat le pakhat cungah òhatnak tuah i zuam in mi vialte cung zongah òhat i zuam ko u. 16 Nan tha nuam zungzal ko u; 17 Thlacam camcin ko u. 18 Zei caan paoh ah lunglawmhnak chim zungzal u, zeitintiah cucu Khrih Jesuh thawngin nan caah Pathian duhnak a si. 19 Thlarau cu hmit hlah u. 20 Profet chimmi kha zei rel loin um hlah u. 21 Zeipaoh hneksak u law a òhami kha cohlang ko u. 22 A chiami paoh kha hrial ko u.

23 Daihnak Pathian theng nih cun nan sining dihlakin in thianter hna seh law kan Bawipa Jesuh Khrih a rat tikah nan thlarau le nan nunnak le nan pumsa cu sawi awk um loin in chia ko hna seh. 24 An autu hna cu zumhtlak a si i a tuah taktak ko lai.

25 U le nau hna, thla kan campiak u.

26 Pakhat le pakhat hnamhnak thiang in i bia chawn u.

27 Hi cakuat hi unau dihlak sinah relpiak awkin Bawipa min in kan fial hna.

28 Kan Bawipa Jesuh Khrih vel cu nan cungah um ko seh.