35
Dinh Ni Ca Phunglam
1 Moses nih Israel mi vialte cu a pumh hna i, “Hihi Bawipa nih tuah awkah an fialmi hna cu a si:
2 ‘Ni ruk chung nan rian kha nan òuan lai, sihmanhsehlaw ni sarihnak ni cu nan caah ni zarh a si lai, Bawipa sinah pekmi dinh ni a si. Cu ni i rian a òuanmi paoh cu thah a si lai. Ref 35.2: Exo 20.8-11, 23.12, 31.15, 34.21; Lev 23.3; Deu 5.12-14
3 Dinh ni ah cun nan inn chungah mei hmanh nan kau lai lo,’ a ti,” tiah a ti.
Hmunthiang Ca Thawhlawm
(Exo 25.1-9)
4 Moses nih Israel mi vialte cu a thawh hna i, “Hihi Bawipa nih tuah hna seh tiah an fialmi hna cu a si:
5 Bawipa sinah thawhlawm nan pek lai. Cu bantukin tuah a duhmi nih cun hi thawhlawm hi nan pek lai: sui, ngun, dar,
6 tuuhmul a dum, a sendung, a sen; khumla a hmang a òhiami, meheh hmul in tahmi puan,
7 tuukawng phaw si sen in buhmi, saphaw òha, anri thing,
8 meiinn ca chiti, thuhnak chiti ca zihmui, a rim a thawmi zihmui,
9 karnelian lungvar tlangbawi angki le òangbenh i benh awk lungvar,” a ti.
Pathian Umnak Thlam Thilri
(Exo 39.32-43)
10 “Nan lak i zungthiam paohpaoh kha nan ra lai i Bawipa fialmi vialte kha nan ser hna lai. Cu nan ser ding cu hi hna hi an si:
11 puan biakinn le a cung khuh, a pehnak sio hna le tung hna, a hrenhnak thingthluan hna, a pulan le an dirnak kedanh hna,
12 thingkuang le a putnak lang hna, thingkuang chin, a phentu puanzar,
13 cabuai, a zawnhnak lang le a thilri vialte, Pathian hmai i hunmi changreu,
14 mei vannak ding meiinn tung le a thilri, a meiinn hna le a meiinn hna chiti,
15 zihmui khanghnak biakòheng le a zawnhnak lang, thuhnak chiti, a rim a thawmi zihmui, Pathian umnak thlam chung luhnak innka ca puanzar,
16 khanghthawinak ca biakòheng, a dar sur le a lang le a thilri hna he, kut òawlnak hmaihum le a tohnak,
17 tual kulhnak ca puanzar le a tung le a kedanh hna, tual luhnak kutka ca puanzar,
18 Pathian umnak thlam le a tual ca fungkhenh le hri,
19 tlangbawi nih hmunthiang i rian a òuan tikah a hman awk thilpuan, rumra a keng ngaimi; cu thilpuan cu Aaron le a fapa hna nih tlangbawi rian an òuan tikah an i aihmi thilpuan thiang kha an si,” a ti.
Mi Zapi Nih Thawhlawm An Put
20 Israel mi vialte nih khan Moses cu an kaltak.
21 Cu bantukin tuah a duhmi paoh nih khan pumhnak thlam caah Bawipa sinah thawhlawm an rak put, rianòuannak caah a herhmi thil vialte le puan thiang sernak caah a herhmi thil vialte kha an rak put hna.
22 Nu he pa he an ra; rak put a duhmi paoh nih khan òamhnak òhim hna le hnatonh hna le kutdonghrolh hna le òhi hna le sui hlawn a phunphun kha an rak put hna. Bawipa sin pekmi thawhlawm caah tiin an pekchanhmi sui hlawn kha an rak put cio hna.
23 Ahopaoh nih an ngeihmi cio kha an rak put hna: tuuhmul a dum, a sendung, a sen, khumla hmangòhia, meheh hmul in tahmi puan, si sen in buhmi tuukawng phaw le saphaw phun òha phun kha an rak put cio hna.
24 Ngun le dar a tho khomi nih khan ngun le dar cu Bawipa sinah khan an rak put i innsaknak ca hman awkah anri thing a ngeimi nih khan anri thing cu an rak put hna.
25 Cun nu zungthiam vialte nih khan la dum, la sendung, tuuhmul sen, khumla hmangòhia, kha an ser hna i an rak put hna.
26 Nu zungthiam paohpaoh nih khan meheh hmul in la an ser.
27 Cun hruaitu pawl nih khan karnelian lungvar, tlangbawi angki le òangbenh i benh ding lungvar,
28 meiinn ca zihmui le chiti, thuhnak chiti, le rim thawmi zihmui kha an rak put hna.
29 Bawipa nih Moses sinin nan tuah awk rian a si tiah a chimhmi hna rian ah thawhlawm pek a duhmi Israel mi chung i nu le pa vialte nih cun an thawhlawm cu Bawipa sinah khan an rak put.
Pathian Umnak Thlam Sertu
(Exo 31.1-11)
30 Moses nih Israel mi cu a thawh hna i, “ Bawipa nih Judah phun chung mi Hur fapa Uri fapa Bezalel kha a thim cang.
31 Amah cu Bawipa nih Pathian Thlarau in a khahter caah thil dawh a phunphun ser khawhnak thiamnak le thil ti khawhnak le hngalhnak kha a ngei i
32 dawh tein pungsan suai khawhnak le sui le ngun le dar in dawh tein òamh thiamnak le
33 òamhnak lungvar at thiamnak le thing dawh tein suai thiamnak le thil dawh a phunphun ser thiamnak kha a ngei.
34 Bezalel le Dan phun chungmi Ahisamak fapa Oholiab cu Bawipa nih an thiamnak kha midang cawnpiak thiamnak a pek hna.
35 Lung òialtu hna le pungsan suai thiammi hna le tuuhmul a dum, a sendung, a sen le khumla hmangòhia tah a thiammi hna le puantah thiammi hna zungthiamnak kha, thil a phunphun an tuah khawh nakhnga a pek hna. Thil a phunphun kha an tuah khawh i pungsan suai thiam ngaingaimi an si.