4
Moses Nih Israel Mi Kha Nawl Ngaih Awk A Forh Hna
1 “Cun atu cu, maw Israel, kan cawnpiakmi hna phunglam hna le nawlbia hna cu ngai u law, tuah hna u, nan nun i nan kal i Bawipa nan pupa Pathian nih an pekmi hna ram cu nan co nakhnga.
2 Bawipa nan Pathian nawlbia kan pekmi hna cu nan ulh nakhnga, nawlbia kan pekmi hna hi nan chap lai lo, nan zuk fawn lai lo. Ref 4.2: Biat 22.18-19
3 Bawipa nih Baal-peor ah a tuahmi kha nan mit nih a hmuh cang, zeitintiah Bawipa nan Pathian nih Peor i Baal a zulmi vialte kha nannih lakin a hrawh hna; Ref 4.3: Nam 25.1-9
4 sihmanhsehlaw nannih Bawipa nan Pathian fek tein aa tlaihmi vialte cu nihin tiang nan nung rih.
5 Zohhmanh, nannih nih co awk i nan luhhnawhmi ram ah nan tuah hna nakhnga, Bawipa ka Pathian nih nawl a ka pek bangin nawlbia le phunglam hna cu kan cawnpiak cang hna.
6 Ul hna u law, tuah hna u, zeitintiah miphun hna hmuh ah mah cucu nan fimnak le nan hngalhnak a si lai; hi nawlbia vialte an theih tikah, ‘Hi a nganmi miphun hi a fim le a hngalhthiammi an si hrimhrim ko,’ an ti lai.
7 Kannih nih Bawipa kan Pathian kha kan kawh fate Bawipa kan Pathian nih cun a kan naih tlukin naihtu pathian a ngeimi miphun ngan ahodah a um?
8 Nihin ah nan hmai i ka chiahmi phungbia vialte, hi tlukin a ding hringhranmi hna bantuk, nawlbia le phunglam hna a ngeimi miphun ngan ahodah a um ve?
Israel Mi Horeb Tlang
9 “Òha tein i ralring u law, i zohkhenh u, nan mit nih a hmuhmi thil cu nan philh sual hna nakhnga lo le nan nunchung ah nan lung chungin an tlau sual nakhnga lo; nan fale le nan tule hna kha hngalhter hna u §
10 Bawipa nan Pathian hmaiah Horeb ah nan dir ni ah khan Bawipa nih a ka chawnh i, ‘Mi cu ka sinah pum tuah hna, ka bia kha an theih i vawlei cung i an nunchung vialte keimah òih kha an hngalh i cu bantukin an fale zong an cawnpiak hna nakhnga,’ tiah a ka timi kha kan hngalhter hna.
11 Cun nannih nih nan va naih i tlang hramah khan nan va dir, tlang cu meizik in van tiang aa hlio i, muihnak le khuadawm nih a zual i, a pih in a pit. Ref 4.11-12: Exo 19.16-18; Heb 12.18-19
12 Khi tikah Bawipa nih mei chung khan an chawnh hna; bia thawng cu nan theih, sihmanhsehlaw mui cu nan hmu lo; aw lawnglawng a si ko.
13 Cun tuah awkah nawl an pekmi hna a biakamnak kha nannih sinah a thanh, mah cucu nawlbia pahra kha an si; lung tlap hnih cungah a òial hna. Ref 4.13: Exo 31.18, 34.28; Deu 9.10
14 Cun kha caan ah khan Bawipa nih nannih cu nawlbia le phunglam hna kha cawnpiak awkah nawl a ka pek, nannih nih co awkah nan va kalhnawhmi ram chung i nan va tuah awk a simi hna cu. Ref 4.14: Exo 21.1
Siasal Biak Lo Ding Ralrinnak
15 “Cucaah òha tein i ralring tuah u. Bawipa nih Horeb ah mei chungin an chawnh hna ni ah khan a mui zeihmanh nan hmuh lo caah,
16 nanmah caah suaimi mui, zei bantuk mui hmanh a ken a si zongah, mipa bantuk maw minu bantuk maw, Ref 4.16: Exo 20.4; Lev 26.1; Deu 5.8, 27.15
17 vawlei cung i a ummi zei bantuk saram paoh a lomi maw, van i a zuangmi thla ngei va a lomi maw, Ref 4.17-18a: Rom 1.23
18 vawlei i a vakmi thil a lomi maw, vawlei tang ti chung i a ummi nga a lomi maw, hi bantuk tuahnak hin nan i thurhhnawmh sual nakhnga lo i ralring tuah u.
19 Cun van khi nan hun zoh i nika le thlapa le arfi hna, van i a ummi thil vialte cu, nan hmuh tik hna ah, annih biak awk le an hmai i kun awkah hnuh nan si sual nakhnga lo i ralring tuah u. Mah hna hi cu Bawipa nan Pathian nih vanrang toi miphun dang vialte tu kha a pek hna,
20 sihmanhsehlaw nannih cu Bawipa nih thir titnak meiphu, Izipt ram cun, amah miphun hrimhrim si awkah, atu i nan si bang hin, an chuahpi hna. Ref 4.20: Exo 19.5; Deu 7.6, 14.2, 26.18; Tit 2.14; 1Pet 2.9
21 Cuhleiah nanmah ruangah Bawipa cu ka cungah a thin a hung i Jordan cu ka tan nakhnga lo le Bawipa nan Pathian nih co awkah an pekmi hna ram òha cu ka luh nakhnga lo, chiat a ser. Ref 4.21: Nam 20.12
22 Hi ram ah hin ka thi ko lai, Jordan cu tan awk ka si lai lo; sihmanhsehlaw nannih nih cun nan tan lai i ram òha cu nan co lai.
23 Bawipa nan Pathian biakamnak nannih he a sermi cu nan philh sual i Bawipa nan Pathian nih an thlauhmi hna suaimi mui, zei mui a kengmi hmanh cu, nan ser sual nakhnga lo, i ralring tuah u.
24 Zeitintiah Bawipa nan Pathian cu tlumral lak kangh hmang mei, nahchuak Pathian a si. Ref 4.24: Heb 12.29
25 “Cun tu le fa nan ngeih tik le ram chungah nan tar tikah, zei mui a lomi hmanh si ai kun, suaimi siasal sernak in le Bawipa nan Pathian hmai i thil òhalo tuahnak in nan i thurhhnawmhter i a thin nan hunter ahcun,
26 Jordan tan in nan va co laimi ram chung cun nan rawk cikcek zau lai, tiah nihin ni ah hin nanmah hngaltu ah van le vawlei ka kawh hna; a chungah saupi nan nung lai lo, nan lo dih cikcek ko lai.
27 Cun Bawipa nih miphun hna lakah an òhek hna lai i Bawipa nih an dawi hna naklai miphun hna lakah tlawmte lawng nan taang lai. Ref 4.27-28: Deu 28.36
28 Cun khika ah thing le lung in sermi pathian, minung kut sermi, hmuh zong a hmu kho lomi, theih zong a thei kho lomi, ei zong a ei kho lomi, rim zong a hnim kho lomi cu nan biak hna lai.
29 Sihmanhsehlaw khika ah Bawipa nan Pathian cu nan kawl lai i, nan lung vialte le nan ruahnak vialte in amah kha nan kawl ahcun nan hmuh lai. Ref 4.29: Jer 29.13
30 Harnak chungah nan um tik le hi thil vialte cu nan cungah ni hmanung bik ni ah a tlun tikah, Bawipa nan Pathian sinah cun nan kir òhan lai i a bia kha nan ngaih lai,
31 zeitintiah Bawipa nan Pathian cu zaangfah thiammi Pathian a si; an deuh hna lai lo, an hrawk hna lai lo, nan pupa hna sin i chiatser in biakamnak a tuahmi zong cu a philh fawn lai lo.
32 “Zeitintiah nannih hlan i a rak ummi hlan lio ni hna kha hal tuah hna u, Pathian nih vawlei cung i minung a rak ser ni ri khan, cun vanhramdeng khattelei in khattelei tiang zong hal tuah u, mah bantuk thil lianngan hi a rak um bal maw um bal lo, an rak thei bal maw thei bal lo dik?
33 Miphun aho tal nih, nannih nih nan rak theih bang khan, pathian aw cu mei lakin an thei in an nung bal dik maw?
34 Asiloah, pathian zei tal nih miphun dang pakhat chungin miphun pakhat cu amah ca i va kal i vaa lak awkah, hneksaknak le hmelchunhnak le khuaruahharnak le ral dohnak le a òhawngmi kut le samhmi ban le thil òihnung in, Bawipa nan Pathian nih Izipt ram ah nan mit hmuh ah an tuahpiakmi hna vialte bang khan tuah a zal bal maw?
35 Bawipa cu Pathian a si kha nan hngalh nakhnga, nannih cu hmuhsak nan si; amah hleiah a dang ahohmanh an um lo. Ref 4.35: Mar 12.32
36 Amah nih an chimhhrin hna nakhnga, vancung in a aw cu an theihter hna; cun vawlei ah a mei lianngan cu an hmuhter hna i mei chung cun nannih nih a aw kha nan theih.
37 Cun amah nih nan pupa kha a dawt hna i anmah hnu i an tefa hna cu a thim hna i nannih cu amah hmai hrimhrim in le a liannganmi a òhawnnak in Izipt ram in an chuahpi hna i,
38 miphun dangdang nanmah nakin a ngan deuh le a òhawng deuh cu, nihin ah a si bang hin, nannih kha luhter awkah le an ram cu ro ca i in pek hna awkah nan hmai in a dawi hna,
39 cucaah, Bawipa cu vancung ah khin le vawlei cungah hin Pathian a si; a dang ahohmanh an um lo, ti kha nihin cu hngal u law, nan lungchung ah i cinken tuah u.
40 Cucaah nihin ah kan pekmi hna a nawlbia le a phungbia hna cu ul tuah hna u, nanmah le nan hnu i nan tefa hna caah aa remrel i Bawipa nih zungzal ca in an pekmi hna ram ah hin nan chan cu nan sauter nakhnga,” tiah a ti.
Jordan Nichuahlei I Himnak Khua Hna
41 Cun Jordan tiva ral nichuahlei ah Moses nih khua pathum a dang tein a chiah hna, Ref 4.41-43: Jos 20.8-9
42 mithat mi nih a innpa kha hlan ah rak i huatnak um loin le timhnak um loin a thah sual ahcun khika ah a zam lai, cun cuka khua pakhatkhat i a va zamnak thawngin a nunnak cu aa khamh lai:
43 Reuben mi hna caah tlangrawn ramlak i a ummi Bezer le, Gad mi hna caah Gilead i a ummi Ramoth le, Manasseh mi hna caah Bashan i a ummi Golan cu an si.
Israel Mi Phungbia Kha Moses Nih A Chim Òhan
44 Mah hihi Moses nih Israel fale hna hmaiah a chiahmi phungbia cu a si;
45 Izipt ram in Israel fale hna nih an chuah tikah mah hna hi Moses nih a chimhmi hna hngalhternak bia hna le nawlbia hna le phunglam hna cu an si;
46 Moses le Israel fale hna nih Izipt in an chuah tikah an teimi Amor mi siangpahrang, Heshbon ah a ummi Sihon i a ram chung, Jordan tiva ral Beth-peor zawn nelrawn chungah khan a chimh hna.
47 Cun amah ram le Bashan siangpahrang Og ram cu an lak hna, Amor mi hna siangpahrang Jordan tiva ral nichuahlei ah a ummi pahnih;
48 Arnon nelrawn kamah a ummi Aroer in Sirion Tlang tiang (mah cucu Hermon a si),
49 Jordan nichuahlei ah a ummi Arabah cu a dihlak in, Pisgah tlangpang tangah a ummi Arabah Rili tiangin, an lak hna.