7
Langhnak Sahrang Pali
1 Babilon siangpahrang Belshazzar a bawi kum khatnak ah, Daniel nih a ihkhun i a ih lioah khan mang le langhnak kha a lu chungah an hung lut. Cun a mang cu a òial i a òialmi cu hitihin aa thawk:
2 “Zan i langhnak ka hmuhmi ah keimah Daniel cu khua ka cuan i rili nganpi pakhat, van thli pali hna nih a tilet an thawhtermi kha ka hmuh,
3 cun sahrang ngan pipi pali rili chung cun an hung chuak i pakhat le pakhat kha an i dang dih. Ref 7.3: Biat 13.1; 17.8
4 A hmasa bik cu chiandeih bantuk a si nain mupi thla bantuk a ngei. Ka hei zoh i cu ah cun a thla cu an phawi hna i vawlei cun an vun cawi i minung bantukin a ke pahnih in an dirter; cun amah cu minung lungthin zong kha an pek. Ref 7.4-6: Biat 13.2
5 Cun a dang pakhat, a pahnihnak cu ka hmuh òhan i vom bantuk a si. Ui òhut in a òhu i a kaa ah hnak ruh pathum aa seh. Amah cu nawl pek a si i, “Tho tuah, na duh tawk in sa cu ei tuah,” ti a si.
6 Hi hnuah hin ka hei zoh òhan i a dang pakhat ka hmuh òhan, pawlai he aa lomi sahrang a si i a keng ah va thla pali a ngei, hi sahrang hi lu pali a ngei i siangpahrang nawl ngeihnak kha pek a si.
7 Cun zan i langhnak ka hmuhmi hna chungah cun, sahrang palinak kha ka hmuh, òihnung ngai le tuksapur ngai a si i a òhawng hringhranmi a si, a ha cu thir an si i a tin cu dar an si. Zeizong vialte kha a khai hna i a ei hna i a tangmi paoh cu a lamh hna. Amah hlan i a ummi sahrang hna pakhat he hmanh khan an i lo lo, zeicahtiah amah cu ki pahra a ngei. Ref 7.7: Biat 12.3; 13.1
8 A ki kha ka zoh lio hna ah cun ki dang pakhat, ki hmete an lak i a hung chuah kha ka hmuh i cu ki hmete nih cun umnak a hmuh khawh nakhnga a um ciami hna lak i ki pathum kha a thlongh hna. Cun cu ki nih cun minung mit le minung kaa a ngei i aa porhlaw i tluang a khawng. Ref 7.8: Biat 13.5-6
Zungzal Nungmi
9 Ka zoh ko lioah khan bawi òhutdan hna cu an hun hun hna i zungzal in a nungmi cu òhutdan cungah khan a hung òhu. A puan cu hawhra bantukin a rang i a sam cu tuuhmul thiang bik bantukin a thiang. A bawiòhutdan cu meizik lengkekual cungah hun a si i meizik kha an chuak i a òhutdan cu meialh nih a tuam. Ref 7.9: Biat 20.4; 1.14
10 A rianòuantu dingah mi a thongthong in an um i a hmaiah cun a nuainuai in an dir. Biaceihnak cu hun timh a si i cauk cu an hun kau hna. Ref 7.10: Biat 5.11; 20.12
11 Ka zoh peng ko lioah cun ki hmete aa porhlawtnak le a tluangkhawnnak cu ka hei theih lengmang ko. Cun ka zoh peng ko i sahrang palinak cu an thah i a ruak cu mei chungah an paih i an hrawh.
12 A dang sahrang hna kha an bawinak cu chuh an si nain caan khat le khuacaan pakhat cu nun onh an si rih.
13 Zan i langhnak ka hmuhmi ah cun minung a lomi pakhat cu van khuadawm he a rat kha ka hmuh; zungzal in a nungmi kha a hei naih i a hmaiah cun a va dir. Ref 7.13: Mat 24.30; 26.64; Mar 13.26; 14.62; Luk 21.27; Biat 1.7, 13; 14.14
14 Bawinak le sunparnak le siangpahrang òhawnnak kha amah cu pek an si i cucaah miphun zakip le holh phun zakip nih a rian kha an òuan. Bawi a sinak cu zungzal in a hmunmi bawi sinak, zeitikhmanh ah a dong lo ding a si i siangpahrang òhawnnak a ngeihmi cu zeitikhmanh i hrawh khawh lomi òhawnnak a si. Ref 7.14: Biat 11.15
Langhnak A Hmuhmi Kha An Fianh
15 Langhnak ka hmuhmi hna nih cun ka khuaruah an ka harter i ka lungre a thei ngaingai.
16 Keimah Daniel nih khika i a dirmi pakhat kha ka hei fuh i hi thil vialte hna hi an sullam zeidah a si tiah ka hal. Cun amah nih cun a sullam cu a ka chimh.
17 “Hi sahrang ngan pipi pali hna hi, vawlei cungah a hung um dingmi pennak pali an si.
18 Sihmanhsehlaw Cungnung Bik mithiang hna nih cun siangpahrang òhawnnak kha an hmuh lai i zungzal in an i ngeih lan lai,” tiah a ti. Ref 7.18: Biat 22.5
19 Cun sahrang palinak sullam zong kha hngalh ka duh fawn. Kha sahrang kha hawi dang he an i lo lo i a thir ha le a dar tin he khan òih a nung hringhranmi a si ko. Zeizong vialte kha a khai dih hna i a ei dih hna i a tangmi vialte cu a lamh dih hna.
20 Cun a lu cung i ki pahra hna le a hnu deuh i ki dang pakhat a hung chuak i a hung chuah cangkate i a dang ki pathum a thlongh hna kong zong kha hngalh ka duh. Cu ki nih cun mit le kaa a ngeih i porhlawtnak bia le tluangkhawnnak bia kha a chim òualmal hna. A dang hna nakkhan òih a nung deuh.
21 Ka zoh ko lioah cun cu ki cu mithiang mi hna he khan ral an i do i annih cu a tei hna. Ref 7.21: Biat 13.7
22 Cun zungzal in a nungmi nih cun biakhiahnak kha Cung Nung Bik mithiang hna ca i a òha lei in a tuah i mithiang mi hna nih cun siangpahrang òhawnnak an hun hmuh caan kha a hung phan. Ref 7.22: Biat 20.4
23 Cun hihi a sullam an ka pekmi cu a si: “Sahrang palinak nih hin vawlei cungah pennak a hung chuak ding kha a hmuhsak. Pennak dang he khan an i dang lai i vawlei kha a ei dih lai i a lamh lai i a den lai.
24 Ki pahra nih khan hi pennak chungah siangpahrang pahra an chuah lainak kha an hmuhsak, cun a hnuah khan siangpahrang a dang pakhat a hung chuak lai i amah hlan i a ummi hna he khan an i lo lai lo i siangpahrang pathum hna kha a tei hna lai. Ref 7.24: Biat 17.12
25 Cungnung Bik kha zeihmanh ah a rel lai lo i Cungnung Bik mithiang hna kha a hrem hna lai. An biaknak phung a si tawnmi caan le phung hna kha thlen a timh hna lai i mithiang hna cu a kut chungah kum thum le a cheu an um lai. Ref 7.25: Biat 12.14; 13.5-6
26 Cun biaceihnak kha a hung um lai i amah cu a bawinak kha chuh a si lai i a donghnak ah cun hrawh a si lai i hloh a si lai.
27 Siangpahrang sinak siseh, bawi sinak siseh, vanrang tang i a ummi pennak hna lianhngannak vialte cu Cungnung Bik mithiang hna cu pek an si lai. Siangpahrang òhawnnak an ngeihmi cu zungzal hmunmi òhawnnak a si lai i peng kip le ram kip nih an rian an òuanpiak hna lai i an nawl an ngaih hna lai,” a ti. Ref 7.27: Biat 20.4; 22.5
28 Hika ah hin hi kong cu a dong. Kei Daniel tu cu ka khuaruahnak nih van a ka sanh i a dangh zongin ka daang dih; hi thil hna tu cu ka lungchung in kaa cinken hna.