1 U le nau hna, kan pupa hna cungah a rak tlungmi kha nan hngalh awk ka duh; minmei nih a rak huh hna i rili zong him tein an rak tan; 2 Moses hnu zul dingah minmei le rili ah baptisma an rak ing. 3 An dihlak in thlarau rawl an ei; an dihlak in thlarau ti òhiamòhiam an rak ding. 4 An hnu a zulmi a thlarau lungpi in ti an din, cu lung cu Khrih a si. 5 Sihmanhsehlaw a tam deuh hna cungah cun Pathian a lung a tling lo; zeitintiah ramcar ah khan an thi.

6 Kha hna nih a òha lomi an rak duh bantuk khan cu thil hna duh lo awkin kan caah ralrinnak an si. 7 A cheu hna bantuk khan siasal biami si hlah u; “Mi hna cu ei le din ah an òhu i lam le kui awkah an tho,” tiah rak òial a si. 8 Kha hna lak i a cheu bantuk khan nu le pa sualnak tuah hlah u sih. Cu bantuk mi hna cu ni khat chungah thong kul le thong thum an rak tlu i an thi. 9 Bawipa cu hneksak kan del awk a si lo, acheu nih cun an rak hneksak i rul nih a thah dih hna; 10 Micheu hna bang khan phunzai hlah u sih, a phunzaimi cu hrawkhraltu nih a rak hrawh hna. 11 Hi thil hna an cung i a rak tlun hi an ca i ralrin peknak a rak si, sihmanhsehlaw caan donghnak nih a phanhmi kannih caah cun cawnpiaknak ah òial an si. 12 Cu a si caah fek tein ka dir tiah aa ruatmi hna cu an tluk nakhnga lo i ralring ko hna seh. 13 Tukforhnak nan tonmi hi mi ton tawn lomi a si lo. Pathian cu zumhtlak a si i nan thazang nih a celh lo lengin tukforhnak ah an phanhter hna lai lo, sihmanhsehlaw tukforhnak a phanh tikah nan in khawh nakhnga luatnak lam an sialpiak hna lai.

14 Cu a si caah cun ka dawtle hna, siasal biaknak cu hrial ko u. 15 A ruat khomi hna khan in kan chimh hna, ka chimmi hi nanmah nih khahchun ko u. 16 Thluachuahnak hrai hmang in thlua kan chuahmi hi Khrih thisen kan i hrawm a si lo maw? Changreu kan cheu hi Khrih pumsa ah kan i hrawm a si maw? 17 Changreu cu hlum khat a si bantukin kannih a tampi a simi cu pumsa khat kan si. 18 Zeitintiah hlum khat kha kan dihlak in kan i hrawm. Israel mi hna kha ruat hna hmanh u; thawinak a eimi hna kha biakòheng rian ah aa telmi an si lo maw? 19 Ka chim duhmi cu zeidah a si kun? Siasal sinah pekchanhmi rawl le siasal cu zeital an si ka ti maw? 20 Ti hlah! Pathian bia lomi hna nih raithawinak an tuahmi cu khuachia an pekchanh a si i Pathian an pekchanh a si lo, ka ti duhnak a si. Khuachia he aa òawmmi nan si cu kan duh hna lo. 21 Bawipa hrai le khuachia hrai cu nan din kemh kho lo. Bawipa rawl le khuachia rawl nan ei kemh kho fawn lo. 22 Bawipa cu a nahchuak seh, tiah a thinphawh maw kan duh? Amah nakin maw kan òhawn deuh?!

23 “Thil vialte tuah phung a si ko,” sihmanhsehlaw thil vialte nih mi a bawm lo. “Thil vialte tuah phung a si ko,” asinain thil vialte cu dirhòhohtu an si lo. 24 Ahohmanh nih amah hleifonnak lawng kawl hlah seh, a innpa pa hleifonnak kawl deuh seh. 25 Sadawr ah an zuarmi sa paoh ei ko u, chiaòha thleidannak ruangah biahalnak tuah len hlah u. 26 Zeitintiah, “Vawlei le a chungah a ummi thil paoh cu Bawipa ta an si.” 27 A zum lomi hna nih zanriah ei an in sawm i na kal ahcun an in hunhmi paoh kha ei ko, chiaòha thleidannak ruangah biahalnak tuah len hlah. 28 (Sihmanhsehlaw pakhat nih, “Hihi raithawinak ah pekchanhmi a si,” a ti ahcun an chimtu pa zawnruah le chiaòha thleidannak ruangah ei hlah— 29 amah chiaòha thleidannak kha ka chim, nangmah chiaòha thleidannak ka ti lo). Zeicahtiah ka zalonnak cu zeitindah midang ruahnak nih a donhkhanh lai. 30 Zeicahdah lawmhnak in ka ei i lawmhnak in thla ka camhmi thil ah cun mawhchiat ka si lai.

31 Cu a si caah nan ei a si zong, nan din a si zongah, asiloah, zei nan tuah paoh ah Pathian thangòhatnak ah tuah ko u. 32 Judah mi si hna seh, Grik mi si hna seh, Pathian Khrihfabu si hna seh, an i tuaitamnak ding tuah hlah u; 33 Zei ka tuahmi paoh ah mi vialte lungton kaa zuam bantukin khamh nan si nakhnga keimah òhathnemnak kawl loin mi vialte òhathnemnak tu ka kawl.