27
1 Itali ah kan kal awkin bia an khiah tikah Paul le thongtla dang hna cu Augustan ralkapbu zahaotu ralbawipa Julias sinah an ap hna.
2 Asia ram tikam lawng dinhnak khua hna pal thluahmah awkah rak ruahmi Adramittium khua sangphawlawng in kan kal. Masidonia peng Thesalonika khuami Aristarkas zong aa tel ve.
3 A thaizing ah Sidon khua kan phan; Julias nih Paul cu òha tein a cehken i a hawile nih a herhbaumi paoh tuahpiak awkin an sin i kal a onh.
4 Cuka cun sangphawlawng in kan kal i kanmah ralkah in thli a hran caah Saipras thli khorhnak lei in kan kal.
5 Silisia le Pamfilia pin in rili cu kan tan i Lisia peng Mira khua kan phan.
6 Cuka ah cun zahaotu ralbawipa nih Alekzandria khua sangphawlawng Itali ah a kal dingmi a va hmuh i cuka ah cun a kan cuanter.
7 Ni tampi chung duhsah tein kan kal i har lengmang in Naidas khua pin kha kan phan. Cuti lanh cu thli nih a kan dawnh caah Krit tikulh phen thli khorhnak lei in kan i hel i Salmon tikulh fonghlei pawngin kan lan.
8 Har ngai in rili kam zuahmah in kan kal i Him Dinhnak timi hmun pakhat kan phan, cucu Lisia khuapi pawngah a si.
9 Caan tampi a luan cang caah Rawl ulh Ni zong a luan cang i kan kalnak ding zong cu òih a nun caah Paul nih ruahnak a pek hna;
10 “Ka bawipale hna, kan kal lengmang ko ahcun thil phorhmi le lawng ca lawng hmanh ah si loin kan nunnak ca hrimhrim ah i hliamkhuainak le sunghnak kan tong lai ti ka hngalh,” a ti hna.
11 Sihmanhsehlaw zahaotu ralbawi nih khan Paul chimmi nakcun tilawngbawi le a ngeitu bia kha a ngaih deuh.
12 Cuka lawng dinhnak cu khuasik caan hmanh ah a òhat lo caah mi tam deuh nih Finiks khua kan phan kho hmanh maw ti ruahchan in lanh ko i cuka ah cun khuasik hman awkah khan ruahnak an chuahpi ve. Finiks khua hi Krit tikulh i lawng dinhnak pakhat a si i nitlak thlanglei le nitlak chaklei hoih in a ummi a si.
13 Thlanglei thlizil a hung hrang siahmah i an duhning ah khuaawng kan pem tiah an i ruah caah thir cangai kha an hnuh i Krit tikulh lei tlang naih khawh chungin an kal;
14 sihmanhsehlaw a rauh hlanah thli chia, nichuah chaklei thli timi cu titlang lei in a hung tho;
15 Lawng cu a den, lawng nih thli kha a pah khawh ti lo caah a sining paoh i si dingin kan um i a kenkip ah a kan vawr lengmang ko.
16 Tikulh hmete Kawda timi phen in thli khorhnak ah kan zah i sangphawlawng chung i a ummi vokkuanglawng kha har lengmang in kan run.
17 Sangphawlawng chungah khan an hun hnuh i lawng cu fek tein hri in an òem i Sirtis thetpho ah aa su lai ti an phan caah lawng puanzar kha an òhumh i cuticun a kan vawr lengmang ko.
18 Thli le tilet nih fak tuk in a kan vawr caah a thaizing cun lawng phorhmi thil cu hlonh an thawk;
19 ni thumnak ah cun anmah kut hrimhrim in lawng thilri kha an thlak.
20 Ni saupi chung ni le arfi zong an lang lo i thli zong nih cun a kan den chih lengmang caah a donghnak ah cun nun zong kan i ruahchih ngam ti lo.
21 Rawl ei loin ni tampi an um cang caah Paul cu an lakah hmaiah a hung chuak i, “Mi hna, ka bia kha nan rak ngaih awk a si; Krete tikulh khan ra chuak hlah u sih law hi bantuk hliamkhuainak le sunghnak hi kan tong hnga lo.
22 Cucaah atu cu sangphawlawng dah ti lo cu aho nunnak hmanh a lo lai lo, nan lung dong hlah u, tiah kan forh hna.
23 Zeitintiah ka biakmi le a ka ngeitu Pathian nih zahan ah khan ka sinah a vanmi a run langhter i,
24 ‘Paul, òih hlah, Sizar hmaiah na dir ko lai. Ngai hmanh, na khualtlawn hawi vialte hna zong an nunnak ka zuah hna lai; a ka ti.
25 Cucaah nan lung òhawng ko u; a ka chimh bantuk te hin a si ko lai, tiah ka Pathian cungah zumhnak ka ngei.
26 Sihmanhsehlaw khuazeimaw tikulh ah dik kan tang te ko lai,” a ti.
27 Zan hleili zan a hung phanh cun Mediterranian rili ah thli nih cun a kan thawn lengmang ko i zanòim hrawngah khin vawlei kan naih rua tiah lawng zaptu kha an lung a hring.
28 Cucaah ti an tah i lam kul a thuk, tlawmpal kan kal hnuah an tah òhan i lam hleinga a si.
29 Lung ah kan i su sual lai ti an phan caah thir cangai pali kha lawng hnulei in an thlak i khuadei zokzok seh tiah saduh kan that.
30 Lawngcawng pawl nih khan hmailei ah thir cangai a thla lai bantukin vokkuanglawng kha rili ah òhumh in zam an i tim.
31 Paul nih zahaotu ralbawi le ralkap hna kha, “Mah mi hna hi lawng chungah an um ko lo ahcun nan luat kho lai lo,” a ti hna.
32 Cucaah ralkap nih vokkuanglawng hri kha cat ko in an sah i an fenhter.
33 Khua a hung dei cuahmah ah khin Pawl nih an dihlakin rawl zeimaw ei a fial hna, “Nihin hi zeihmanh ei lo le awlokchong in nan umnak ni hleilinak a si cang.
34 Cucaah rawl ei kan fial hna. Nan thazang a tlung lai i aho nan samfa fa khat hmanh a lo lai lo,” a ti hna.
35 Cu bia a chim dih cun chang aa lak i zapi hmaiah cun Pathian sinah lunglawmhnak in thla a cam i chang cu a cheu i a ei.
36 Cu tikah an dihlakin an lung a hung òhawng i annih zong nih an ei cio.
37 (Lawng chung i a ummi cu kan dihlak in zahnih le sawm sarih le paruk kan si).
38 Khim tein an ei dih cun changvut kha rili chungah an hlonh i lawng kha an zanter deuh.
39 Khua a hung dei i khoika tikam dah kan phanh ti an hngal lo, sihmanhsehlaw titlang an hmuh caah a si khawh ahcun cuka ah cun lawng cu dinhter an duh.
40 Thir cangai hri hna cu an chah i rili chungah cun an kal tak, cu hlei ah zahnak fung i hri òemmi kha an phoih i a hmailei puanzar cu thli hoihnak leiah an zam i titlang cu an hei fuhter.
41 Sihmanhsehlaw thetse ah lawng lu cu aa su khut i hngerh khawh loin a tang. Tilet nih lawng mei lei cun a khuai dih.
42 Ahohmanh i lioh i luat lo dingin ralkap hna nih cun thongtla vialte kha thah dih an timh hna.
43 Sihmanhsehlaw zahaotu ralbawipa nih Paul luatter duh ah an i timhmi cu a òhulh hna. Tilio a thiammi paoh ti ah zuang hmasa cio in titlang leiah lioh ding;
44 cun a tangmi hna tu cu thingphel cung le tilawng a kuaimi phengphel cungah kai dingin nawl a pek hna. Cuticun kan dihlak in him tein titlang kan phan.