3
1 Saul ih sungkhat pawl a òantu ralkap pawl le David le a ralkap pawl cu reipi an do aw ringring. David cu ni khat hnu ni khat a cak deuhdeuh ih a ral pawl cu ni khat hnu ni khat an òawnòai vivo.
David Ih Fapa Pawl
2 Hebron ih a suakmi David fapa pawl cu a hnuailam pawl hi an si. Pakhatnak cu Amnon a si ih a nu cu Jezreel khuami Ahinoam a si.
3 A pahnihnak cu Khileab a si ih a nu cu Nabal ih thihsan mi, Karmel khuami Abigail a si. A pathumnak cu Absalom a si ih a nu cu Geshur ram siangpahrang Talmai ih fanu Maakah a si.
4 A palinak cu Adonijah a si ih a nu cu Haggith a si. A panganak cu Shefatiah a si ih a nu cu Abital a si.
5 A paruknak cu Ithream a si ih a nu cu Eglah a si. Hi fapa pawl cu Hebron ih suakmi an si.
David Hnenah Abner A Òangsal
6 Saul sungkhat a òantu ralkap le David ralkap pawl an doawknak a rei vivo tikah Saul sungkhat òantu ralkap pawl sungah Abner cu thuneitu a si deuhdeuh.
7 Nikhat ah Saul ih fapa Ishbosheth in Abner cu Saul ih nupisun Aiah ih fanu Rizpah thawn an it tlang a si, tiah sual a puh.
8 Cutikah Abner cu a thin a heng ngaingai ih, “Mi phiartu ah maw i ruat? Judah riantu ah maw i ruat? A hramthok ihsin na pa le a unau pawl le a rualpi pawl hnenah a òang ringringtu ka si ih, David ih kut sungah ka lo thlenter dah lo. Cuti asinain tuih ni ah nunau thawn sual i puh.
9-10 Hi ram cu Saul le a tesinfa pawl hnen ihsin ka lak pei ih David cu Israel le Judah ram, khatlam zim Dan ihsin khatlam zim Beersheba tiang, uk thluhtu siangpahrang ah ka canter ding, tiah Bawipa Pathian in David cu a tiam zomi a si. Cuvek ih ka tuahsuak lo asile Pathian in i that seh,” tiah a ti.Ref 3:9-10 1 Sam 15:28;
11 Ishbosheth in Abner cu a òih tuk ih kam khat hman a sawn ngam lo.
12 Culai ah David cu Hebron ah a um ih a hnenah Abner in palai a thlah ih, “Hi ram hi zo in so a uk cuang ding? Keimah thawn lungkimnak cakhen tuah awla Israel ram na neh thluhnak dingah ka lo bawm ding,” tiah a cah.
13 Cutikah David in, “A òha! Lungkimnak ka tuah pei. Asinan ka hnenih na rat tikah Saul ih fanu Mikhal na rak hruai lawnglawng ah kan tuah thei ding,” tiah a ti.
14 Cun Ishbosheth hnen khalah David in palai a thlah ih, “Ka nupi Mikhal i pesal aw. Amah co dingah a man ah Filistin mi zakhat ih vunzim ka pek a si,” tiah a ti.Ref 3:14 1 Sam 18:27;
15 Curuangah Ishbosheth in Mikhal cu Laish ih fapa a pasal Paltiel hnen ihsin a hruaisal.
16 Paltiel cun a nupi Mikhal cu a sian lo tuk ruangah a òap thluahthlo ih Bahurim khua tiang a thlun. Cutikah Abner in, “Kir thlang aw,” a ti ih Paltiel cu a kir.
17 Abner cu Israel mi hotu pawl hnenah a feh ih, “David nan siangpahrang si dingih nan duhnak cu a reipi zo.
18 Atu hi nan hrangah tikcu òha bik a si. Bawipa Pathian in, “Ka salpa David ka hmang pei ih ka minung Israel pawl cu Filistin pawl le an ral dang pawl kut sung ihsin ka run ding,” tiah a timi kha nan thei thluh ko,” a ti.
19 Abner cu Benjamin mi pawl khal thu a sim phah vivo ih, cuih hnuah Israel le Benjamin mi pawl ih lungkimnak sim dingah Hebron ah David hnen ahcun a feh.
20 Hebron ih David hnen ahcun Abner cu minung kul thawn an feh ih David in an hrangah rawl ei puai a tuah sak.
21 Cule Abner in David hnenah, “Maw siangpahrang bawipa, ka va feh pei ih Israel ram cu a zate in na uknak sungah ka ratpi ding. An siangpahrang ah an lo pom ko ding. Cuticun na lungthlitum cu na ngah dingih hi ram cu a pumpi in na uk ding a si,” tiah a ti. Abner cu David in hnangam tein a fehter.
Abner An That
22 Cuih hnuah Joab le David ih ralkap pawl cu mi an va siimnak ihsin an rakir ih hransaw thil an lakmi pawl tampi an rak keng. Abner cu him tein David in a thlah zo ruangah Hebron ah a um nawn lo.
23 Joab le a ralkap pawl an thlen tikah Abner cu David siangpahrang hnenah a ra ih him tein David in a kuatsal zo, tiah an rak sim.
24 Cutikah Joab cu David hnenah a feh ih, “Ziangso na rak tuah? Na hnenah Ebner a ra ih ziangtinso cutimen in na fehter?
25 Nangmah bum duh ah le na fehnak hmuahhmuah le na tuahmi hmuahhmuah hliah duh ah na hnenah a ra a si, ti na thei lo maw?” tiah a ti.
26 David hnen ihsin a feh hnuah Abner hruai dingah Joab in mi a thlah ih, Sirah tikhur ihsin an rak kirpisal. A cuih thu cu David in zianghman a thei lo.
27 Abner cu Hebron an thlenpi tikah thuthup sim ding bangin kotka kiangah Joab in a hruai ih a thinhna ah a sun ih a thi. Cuticun Joab in Abner cu a that, ziangahtile a naupa Asahel a rak thah zo ruangah a phu a lak a si.
28 A cuih thu David in a theih tikah, “Ka milai pawl le kei cun Abner an thahnak thu cu kan thei hrimhrim lo a si, ti cu Bawipa Pathian in a thei.
29 A thisen cu amah Joab le a innsang parah thleng seh. Sankhat hnu sankhat, Joab ih sungkhat hnenah thisen sungdok nat maw, phaarnat maw, asilole mahte feh thei lo in kianghrol thawn a fehmi maw, raldonak ih a thimi maw, asilole rawl eiding khopkham nei lomi maw, um ringring hai seh,” tiah a ti.
30 Gibeon ih an doawknak ah Abner in an nau Asahel a rak thah ruangah Joab le a nau Abishai in Abner an thahnak cu a si.
Abner An Phum
31 Curuangah David in Joab le a milai pawl cu an hnipuan thlek tahrat in buri hnipuan hruk ih Abner òah dingah thu a pek. Cun an phum tikah ruak kuangih dungah David siangpahrang cu a ke rori in a feh.
32 Abner cu Hebron ah an phum ih a thlan ah David siangpahrang cu napi in a òap. Mi hmuahhmuah khal an òap òheh.
33 David cun hla in a òah ih:
“Mi-aa bangin Abner na thi maw si?
34 Na kut an lo òem lo,
Na ke tla an lo khit lo;
Misual pawl ih thahmi na bang hi,” a ti.
Mi hmuahhmuah khalin an òahsal.
35 Ni a tlak hlanah ziangtal ei dingah David cu a minung pawl in an fial rero nain a duh lo. “Nitlak hlanih ziang maw ka ei hnak cun Pathian in i that sawnseh,” tiah thu a kam.
36 Cutiih a ti cu senpi in an hmuh tikah an lung a kim zet. Siangpahrang ih thil a tuahmi hmuahhmuah cu an lungkim zawng a si thluh.
37 Abner ih lu hlohnak ahhin siangpahrang a tel lo a si, ti cu David ih milai pawl le Israel mi hmuahhmuah in an thei.
38 Cun David in a kuthnuai bawi pawl hnenah, “Tuih sun ah Israel ram hruaitu òha le mimak pakhat a thi, tihi nan thei maw?
39 Keimah cu Pathian ih hrilmi siangpahrang ka si nain tuih sun cu ka thin a nau ngaingai a si. Hi Zeruiah fapa pawl cu ka hrangah tuar an har tuk. Anmah ih tuah vekin hi misual pawl parah Pathian in hremnak thlenter hram seh,” tiah a ti.