21
Saul Ih Tefa Pawl An That
1 David a lal sungah kum khat hnu kum khat a peh in kum thum khengte paampi a tlung. Curuangah Bawipa Pathian hnenah David in a sut ih Bawipa cun, “Saul in Gibeon mi a thah hai ruangah Saul le a innsang pawl cu laithat an si,” tiah a ti.
2 (Gibeon mi pawl cu Israel mi an si lo. Israel mi pawl in humhim dingih an rak tiammi Amor miphun pawl lakah a tangsun miphun fate pakhat an si. Asinan Saul in Israel mi le Judah mi pawl a ham tuk ruangah Gibeon mi pawl cu an ci in hmih thluh a rak tum a si.)Ref 21:2 Jos 9:3-15;
3 Curuangah David in Gibeon mi pawl cu a ko ih an hnenah, “Nan hrangih ka tuah theimi ziangtal a um maw? Pathian ih miphun parah thluasuah vanluh tlung hram seh, tiah thlaza camtu nan sinak dingah nan parih thil òha lo an tuah zomi remsal ka duh a si,” tiah a ti.
4 Cutikah annih in, “Saul le a innsang thawn kan ralawknak cu sui le ngun khalin a rem thei lo ding; Israel mi khal zohman a thah kan duh lo,” an ti.
“Cuti asile nan hrangah ziangso tuah ningla nan duh?” tiah David in a sut.
5 Cutikah annih in, “Saul cun Israel ram sungah hin pakhat hman tang lo in kan ci ih hmih thluh in tum a si.
6 Cu a si ruangah Saul ih tesinfa mipa pasarih in pe awla, Pathian ih hrilmi siangpahrang Saul ih khuapi Gibeah rori ah Bawipa Pathian hmaiah kan that hai ding,” tiah an ti.
“Ka lo pe hai ding,” tiah David in a ti.
7 Sikhalsehla Bawipa ih hmin salin David le Jonathan in thukam awknak an rak tuah zo ruangah, Saul ih fapa sin Jonathan ih fapa Mefibosheth cu David in a luatter.Ref 21:7 1 Sam 20:15-17; 2 Sam 9:1-7;
8 Saul ih fapa pahnih, Aiah ih fanu Rizpah thawn an hrin mi Armoni le Mefibosheth cu a kai. Cun Saul ih fanu Merab le Meholah khuami Barzillai fapa Adriel ih hrinmi fapa panga khal a kai.Ref 21:8 1 Sam 18:19;
9 An pasarih cu David in Gibeon mi hnenah a pek ih tlang parah Bawipa ih hmaiah an that. An pasarih in hmunkhat ah an thi. An thah tikcu cu òhal cem zawng, barli sangvut khawm hram an thawh tikcu a si.
10 Cutikah Aiah ih fanu, Saul ih nusun Rizpah in buri puan a lak ih lungpi parah ihphah ah a phah ih, rawl lak tikcu ih thokin fur ruah tlak hlan lo tiang an ruak cu sunih vate pawl in siseh, zan ih ramsa pawl in siseh, an ei lonak ding a kil ringring.
11 Rizpah ih thil timi cu David in a theih tikah,
12 a feh ih Saul ih ruh pawl le Saul ih fapa Jonathan ih ruh pawl cu Gilead ih Jabesh mi pawl hnen ihsin a va lak. (Gilboa tlang parih Filistin mi pawl in Saul an thah sun ah, Saul le Jonathan ih ruak cu Filistin mi pawl cun Bethshan ih senpi khawmnak hmunah an thlai. Cutawk ihsin Jabesh mi pawl in an va fir a si.)Ref 21:12 1 Sam 31:8-13;
13 David in Saul le Jonathan ih ruh pawl cu a lak ih Saul ih tefa pasarih an thahmi pawl ih ruh tla cu a khawm.
14 Cule Benjamin ram Zela khua ummi Saul ih pa Kish ih thlan ah Saul le a fapa Jonathan ih ruh pawl cu an phum. Siangpahrang David ih thupek bangtukin ziang hmuahhmuah cu an tuah òheh. Cuih hnu lawngah an ram hrangih thla an cammi cu Bawipa Pathian in a sang a si.
Filistin Mitum Pawl An Do
(1 San 20:4-8)
15 Filistin mi le Israel mi pawl karlak ah ral a thosal. Cule David le a ralkap pawl cu an feh ih Filistin mi pawl cu an do. Cutiih an do awk lai ah David cu a baang zet.
16 Cutikah mitum zet, mikei phun, Ishbibenob an timi pa cu ralnam phundang a pai ih, pawnghra a ritmi dar feipi kengin a ra ih David cu thah a tum.
17 Asinan culaifang ah Zeruiah ih fapa Abishai in David cu a ra run ih Filistin pa cu a zon ih a that. Cule David ralkap pawl in an hnenah feh tahrat ih raldo ve nawn lo dingin David cu thu an kamter. “Israel mi hrangah tleunak na si ih in mihsan ding cu kan lo siang lo,” an ti.
18 Gob an timi hmunah Israel mi le Filistin mi cu an do aw sal. Cutawkah Hushah mi Sibbekai in mikei vekih a tum zetmi Saf cu a that.
19 Cuih hnuah Gob ahcun Filistin mi thawn an do aw lala. Cutawkah Bethlehem khuami Jair ih fapa Elhanan in Git khuami mitum zet pa, a feiko cu thiamtlang tia a simi Goliath a that.
20 Cun Gath ah doawknak a um lala ih cutawk khua ah raldo hiar zet mitumpi pakhat a um. Amah cun a kut ah kutzung paruk le a ke ah kezung paruk fingfing, a zate in zung kul hluanli a nei.
21 Israel mi pawl cu a zuam hai ih, cutikah David ih unau Shammah ih fapa Jonathan in cupa cu a that.
22 Hi mikei vekih a tummi minung pali pawl cu Gath ih mitum pawl ih tesinfa an si ih David le a ralkap pawl in an that a si.