14
Absalom A Rakir
1 Zeruiah ih fapa Joab cun siangpahrang David in a fapa Absalom a ngai zet, ti kha a thei.
2 Curuangah Tekoa khua ih a ummi nunau mifim pakhat kha a hnenih ra dingin a cah. Joab in a cuih nunaunu hnenah, “Mithi ngai bangin um awter awla, mithi ngainak hnipuan hruk awla, na sam khal hriat lo in um aw. Tikcu reipi mithi a ngai zomi nunau bangin um aw.
3 Cutiin siangpahrang hnenah va feh awla, ka lo tiammi thu hi va sim aw,” tiah a ti ih, a va sim dingmi thu cu Joab in a tiamta thluh.
4 Nunaunu cu siangpahrang hnen ahcun a va feh ih, upatnak pek in a lu leilung dai in a kun hnuah, “Maw siangpahrang, i bawm hram aw,” tiah a va ti.
5 Cutikah siangpahrang in, “Ziangso na duh?” tiah a rak sut.
Nunaunu in, “Bawipa, kei cu nuhmei farah ka si. Ka pasal in i thihsan zo.
6 Bawipa fapa pahnih ka nei. Asinan nikhat ah hramlak ah an unau an to aw ih a òhentu an um lo ruangah pakhat in pakhat deuh kha a that.
7 Cule bawipa, ka sungkhat pawl hmuahhmuah in, “Atu ih a nunglaimi na fapa cu kan hnenah in pe aw, a unau a thah ruangah amah kan that ding,” in ti ciamco. An thah ngaingai a si ahcun kei cu fapa nei lo ka si thlang ding. Ka nunsan bikmi ka fapa neihsun cu an hlohralter dingih, ka pasal cu hmin sawngtu fapa nei lo ah an canter ding a si,” tiah a ti.
8 Siangpahrang in, “Na inn ah va tlung aw. Na thu cu ka lo ruah sak ding,” tiah a ti.
9 Cule nunaunu in, “Maw siangpahrang, ziangtiih na rel khalle mawhphurhnak cu keimah le ka innsang in kan tuar ko ding. Nangmah siangpahrang le na innsang parah mawhphurhnak zianghman a um lo ding,” a ti.
10 Siangpahrang in, “Zokhal in a lo hro asile ka hnenah ratpi awla a lo hnaihnok nawn lo ding,” tiah a ti.
11 Nunaunu in, “Maw siangpahrang, ka sungkhat pawl in a thimi ka fapa phulak tum ih, a nunglai mi ka fapa a thah an tum hi thil òha lo tuah tum an si ruangah, cutiih an tuahsuak lonak dingah Bawipa na Pathian hnenah thlacam hram aw,” tiah a dil.
Siangpahrang in, “A nungmi Pathian hmin in ka lo kam a si: Ziangti hman in na fapa cu an tuahmawh hrimhrim lo ding,” a ti.
12 Cutikah nunaunu in, “Maw siangpahrang, i zangfah awla òong kam khatte na hnenah i simter hram hrih aw,” tiah a dil lala.
Siangpahrang in, “Sim aw,” a ti.
13 Cutikah nunaunu in, “Ziangahso hibangtuk thil òha lo hi Pathian minung pawl ih parah na tuah? Na fapa cu a tlannak ihsin na kirter hrih lo ruangah atute ih na òongmi lala in na parah mawh a lo phurhter a si.
14 Minung cu kan thi cio ding; leilung parih an thletmi tidai cu khawmsal a theih nawn lo vekin milai kan nunnak cu khawmsal a theih nawn lo a si. Pathian hman in mithi cu a nuntersal nawn lo. Sikhalsehla siangpahrang cun ram sungah um ngam lo ih a tlanmi minung cu a kokir thei a si.
15 Maw siangpahrang, mi in, in hro ruangah na hnenih ka ratnak a si ih, ka lo dilmi cu i tuah sak ding, tiah ruahsannak ka nei a si.
16 Ka thusimmi cu i ngai hram pei ih, Pathian in a minung hnenih a pekmi ram ihsin ka fapa le keimah ci-mih in tumtu pa ih hnen ihsin in humhim ko ding, tiah ka ruat a si.
17 Maw siangpahrang, nang cu Pathian ih vancungmi bangtuk na si ih a òha le a sia ziang hmuahhmuah na thleidang thiam ruangah na thukamnak in i humhim ding tiah ka ruat. Bawipa na Pathian cu na hnenah um ringring hram seh,” tiah a ti.Ref 14:17 2 Sam 19:27;
18 Cutikah siangpahrang in, “Thu pakhat ka lo sut dingih dik tein i sim aw,” a ti.
“Bawipa, i sut ko aw,” tiah nunaunu in a ti.
19 Cule siangpahrang in, “Hi thu ahhin Joab ih fialmi na si maw?” tiah a sut.
Nunaunu in, “Maw siangpahrang bawipa, lei le van ko in ka lo sim: Na thusuhmi leh ding cu ziangti hman in hrial a theih lo. Na hnaòuantu Joab ih fialmi ka si. Amah in tuah ding le sim ding hmuahhmuah i tiam thluh a si.
20 Hitiih a tinak cu nan thuhla hi tluang deuh seh tiah mer a duh ruangah a si. Maw siangpahrang bawipa, nang cu Pathian ih vancungmi bangin na fim ih thil a cangmi hmuahhmuah na thei thluh a si,” tiah a ti.
21 Nehhnu deuh ah siangpahrang in Joab hnenah, “Na duhmi tuah sak dingah ka ruatcat zo. Va feh awla tlangval Absalom cu va ko awla hinah rak hruai aw,” tiah a ti.
22 Joab cu upatnak in David hmaika leilung ah a bok ih, “Maw siangpahrang bawipa, Pathian in lo thluasuah hram seh. Ka lo dilmi i pek ruangah hin na hnen ihsin mithmai òha ka ngah a si, ti ka thei,” tiah a ti.
23 Cule a tho ih Geshur ram ah a va feh ih Absalom cu Jerusalem ah a rak hruai.
24 Sikhalsehla Absalom cu siangpahrang inn ih um lo dingin David in thu a pek. “A hmuh ka duh lo,” a ti. Curuangah Absalom cu amah ih inn ah a um ih siangpahrang hmaiah a suak dah hrimhrim lo.
Absalom Le David An Remawsal
25 Absalom cu mi piang zet a si ih Israel ram sungah amah tluk ih uar-mi zohman an um lo. A lu thlung ihsin a kebeu tiang soi ding pakhat hman a um lo.
26 A sam a òha ngaingai ih a sau tuk le a rih tuk tikah kum khat ah vei khat tluk a met òheu. A sam cu siangpahrang ih cuai khainak in khai tikah pawngnga tluk a rit òheu.
27 Absalom cun fapa pathum le Tamar an timi fanu pakhat a nei ih Tamar cu fala mawi ngaingai a si.
28 Absalom cu siangpahrang hmu lo in Jerusalem ah kum hnih a um.
29 Cutikah amah ai awh ih siangpahrang va tong dingah Joab a ko, asinain Joab cu a ra lo. A kosal nain Joab cu a ra thotho lo.
30 Cutikah Absalom in a hnenum pawl hnenah, “Zoh hnik uh, ka lo kiangte ih lo cu Joab ih lo a si ih barli sangvut tla a sungah a um a si. Va feh uhla meisa in va ur uh,” tiah thu a pek. Curuangah an va feh ih Joab ih lo cu meisa in an va ur.
31 Cule Absalom inn ah Joab cu a va tlan ih, “Ziangahso na hnenum pawl in ka lo an ur?” tiah a va ti.
32 Absalom in, “Siangpahrang hnenih ka lo thlah theinak dingah hitawkah ra dingin ka lo kawhnak a si. Siangpahrang hnenah va feh awla ka ai ah hitiin na va sim pei, “Ziangahso Geshur ram tan in hinah ka rat? Hitawk hnakin Geshur ram ah um ningla keimah ih hrangah a òha sawn ding nain,” a ti va ti aw. Cule siangpahrang ka ton theinak dingah i tawlrel sak aw. Mi mawh a si tiih i hmuh asile i that mai seh,” tiah a ti.
33 Joab cu siangpahrang hnen ahcun a feh ih a va sim. Cule Absalom cu siangpahrang in a ko. A va feh ih siangpahrang hmai ahcun leilung dai in a va kun. Cutikah siangpahrang in Absalom cu a rak hnam.