SAMUEL
Thuhmaihruai
2 Samuel cu Samuel pakhatnak ih pehzom a si ih siangpahrang David ukmi ram thlanglam ah Judah (2 Sam 4-5), cuih hnuah saklam Israel tel in a ram pumhlum huap ih thuanthu a si (2 Sam 5-24). David in a uknak ram a kauh theinak dingah le a hnget theinak dingah ramsung ramleng ral kha a do a òul. David cu Pathian hnenah rinsan tlak ngaingaimi le pum a pe aw ngaingaimi a si. A miphun pawl khalin an rinsan. Asinan a caancaan ah amah ih tisa hiarnak le tumtahnak hlawhtlin theinak dingah a duhduh in a um ih sualnak òha lo zetzet a tuah thu khal a lang ve. Sikhalsehla profet Nathan in a sualnak a phuan tikah Pathian ih pekmi harsatnak pawl cu a lungkim in a tuar a si.
David ih nunnak le a hnaòuannak hin Israel pawl ih thinlung a neh ngaingai ruangah siangpahrang dingih midang an hawl tik khalah amah bangtu ding kha amah ih cithlah sungmi thotho “David ih fapa,” si dingah an duh.
1
David In Saul Ih Thih A Thei
1 Saul a thih hnuah David cu Amalek ral a nehnak ihsin a rakir ih Ziklag khua ah ni hnih a um.
2 A thai sun ah Saul thihnak hmun ihsin tlangval pakhat a ra thleng. A riahsiat ruangah a hnipuan a thlek ih a lu ah leivut a phulh aw. David hnenah a feh ih leilung dai in upatnak pekin a lu a kun.
3 Cutikah David in, “Khuitawk in so na rat?” tiah a sut.
Anih in, “Israel ralkap pawl lakin ka ra tlan,” a ti.
4 “Ziang an cang, i sim hnik,” tiah David in a ti.
Cutikah tlangvalpa cun, “Israel ralkap pawl cu an tlan thluh ih tampi an thi fawn. Saul le a fapa Jonathan khal an thi,” tiah a ti.
5 “Saul le Jonathan an thi, tiah ziangtinso na theih?” tiah David in a sutsal.
6 Tlangvalpa in, “Gilboa tlang parah ka rak um ve ih an ral pawl rangleng le rang ralkap pawl in an hun naih vivo ih culai ah Saul cu a feipi pawk in a din kha ka hmu.
7 A her aw ih keimah i hmu ih i ko. “Bawipa, ziangso?” tiah ka ti.
8 “Zoso na si?” tiah i sut ih, “Amalek mi ka si,” tiah ka ti.
9 Cutikah, “Besia zet in, in tuahmawh zo ih ka thi cing ding. Ra awla i ra that aw,” tiah i ti.
10 Curuangah a umnak ah ka hung so ih ka that, ziangahtile a tlu dingih a tluk vete cun a thi thotho ding, ti ka thei. Cun a lu parih a siangpahrang lukhuh le ralnam khamnak baanhrolh cu ka lak ih atu na hnenah ka rak keng a si, bawipa,” tiah a ti.Ref 1:6-10 1 Sam 31:1-6; 1 San 10:1-6;
11 David cu riahsia le ninghang in a hnipuan a thlek thluh ih a milai pawl hmuahhmuah khalin an thlek thluh ve.
12 An òaang cuum aw in an òap ih, Bawipa ih minung Israel mi tampi ralih an thih ruangah le Saul le Jonathan tla an hlohral ruangah zan tiang rawl ul in an um.
13 Cule David in hi thu a ra simtu tlangvalpa cu, “Khuilam mi so na si?” tiah a sut.
“Amalek mi ka si nain na ram sungah hin ka um,” tiah a sawn.
14 David in, “Ziangtinso Bawipa in siangpahrang ih a hril mi cu na thah ngam?” tiah a ti ih,
15 a ralkap pakhat ko tahrat in, “Hi pa hi that aw,” tiah thu a pek. Curuangah ralkap pa cun Amalek tlangvalpa cu a sah thluk ih a that.
16 Cutikah David in, “Na thisen cu na lu parah tlaseh. Bawipa Pathian in siangpahrang ih a hrilmi ka that a si, tiah na hmurka rori ih na phuan ruangah nangmah le nangmah na nunnak na cemter aw a si hi,” tiah Amalek pa cu a ti.
David In Saul Le Jonathan A Òah
17 David in Saul le a fapa Jonathan cu hla in a òah ih,
18 a cuih hla cu Judah mi pawl ih zir dingin thu a pek. (Hi thihhla cu Jashar Cabu sungah an ngan.)Ref 1:18 Jos 10:13;
19 “Maw mi vanduai Israel bawi pawl,
Nan ram tlangmual ih nan thih hi,
Ralòha hleice pawl
vanduai ni a suah hi.
20 Gath khua ah va sim hlah uh,
Ashkelon khua ih lamzin ah
phuang hlah uh;
Filistin nunau an lung a awi pang ding.
Khawvel fanu pawl
an di a riam tuk pang ding.
21 Maw Gilboa tlang,
Na parah ruah le dai khal tla hlah seh,
Na leiram cu car le kolh in
thlairawl zianghman suah hlah seh!
Ziangahtile ralòha pawl ih
ralphaw cu a rop duahdo ih,
Saul ih ralphaw cu a tlap òheh.
22 Jonathan ih li le thal cu
mi hriamah a hmual a na,
Saul ih ralnam cu mizangfah a nei lo.
Micak zet pawl khal a òhio thluh ih,
Ral pawl khal a sattan thluh.
23 Maw Saul le Jonathan,
Nan duhawknak mangbangza a si;
Nunnak ah nan hmunkhat ih
thihnak khalah nan hmunkhat;
Muvanlai hnakin nan rangdeuh,
Kiosa hnakin nan cak deuh.
24 Maw Israel nunau pawl,
Saul cu òah cio uh;
Hnipuan mankhung sunglawi in,
sen thliaithliai ih
a lo thuamtu amah a si;
Hlawnthil mankhung le suingun in
a lo mawitertu amah a si.
25 Ral òha hleice ralkap pawl
an van a duai ee,
Raldonak ah an hloral ta;
Tlang parah Jonathan cu a thita.
26 Maw Jonathan, ka unau duh,
nangmah ruangah ka riah a sia,
Ziangtluk duhnungza so
ka hrangah na si!
I duhdawtnak cu ziangtluk
mangbangza so a si,
Nunau ih duhdawtnak hnakin
27 Kan miòha pawl an ral zo,
An hriamnam pawl khal
an hloral thluh zo,” tin a òah.