8
Israel Mi In Siangpahrang An Duh
1 Samuel cu a tar thlang ih curuangah a fapa tla cu Israel mi lakih thuòhentu a òuanter.
2 A fapa upa cu Joel a si ih a nauta cu Abijah a si. Beersheba khua ah thuòhentu an si.
3 Asinan an pa ih nuncan vekin an nung thei lo. Paisa ngahnak lawng an ruat ih curuangah nawhthuh tla an lak ih dingthluk lairelnak thawn thu an òhen lo.
4 Cutikah Israel hruaitu pawl cu an tongkhawm aw ih Samuel hnenah Ramah ah an feh ih,
5 a hnenah, “Zoh hnik, nang le na tar zo ih na fapa pawl in na nuncan an thlun fawn lo. Curuangah miphun dang pawl ih an neih vekin in uktu dingah siangpahrang in pe aw,” tiah an ti.Ref 8:5 Daan 17:14;
6 Cutiih siangpahrang an dil cu a lung a kim lo ruangah Samuel cu Bawipa ih hnenah thla a cam.
7 Cutikah Bawipa in, “Na hnenih an simmi thu hmuahhmuah hi ngai ko aw. Nangmah an lo hnong a si lo. Keimah an siangpahrang in hnong sawn a si.
8 Izipt ram ihsin ka suahpi ihsin thokin tuih sun ni tiangah ka hnen ihsin an tlan ih khawzing dangdang an bia ringring. Ka parih an tuah ringringmi atu na parah an tuah ve thlang a si.
9 Curuangah an thu ngai ko aw. Asinan ziangvek in an siangpahrang in an uk ding, ti kim tein an hnenah sim cia awla ralrinnak tla fel tein pe cia hai aw,” tiah a ti.
10 Siangpahrang a diltu Israel mi pawl hnenah Bawipa ih òongkam cu Samuel in a sim thluh.
11 An hnenah, “Hivek in nan siangpahrang in a lo uk ding: Nan fapa pawl cu a ralkap ah a tuah ding; a hrek cu raldonak rangleng mawngtu ah an cang ding. A hrek cu a rang ralkap ah an cang ding. A hrek cu rangleng hmaiih tlantu ralkap an si ding.
12 A hrek cu a ralkap thawngkhat uktu ralbawi an si dingih a hrekkhat cu ralkap sawmnga uktu an si ding. Nan fapa pawl hrekkhat cu a siangpahrang ih lothlotu an si dingih a lo sungih rawl khawmtu, a hriamnam tuahtu le a raldonak rangleng pawl ih thilri tuahtu an si ding.
13 Nan fanu pawl a hrangah rimhmui an tuah a òul dingih a rawl suangtu le a sangrawhtu tla an si ding.
14 Nan lo lakih a òha bik, nan sabit hmuan lakih a òha bik le nan olif hmuan lakih a òha bik pawl cu nan siangpahrang in a lo lak sak pei ih a kuthnuai bawi pawl a òhen thluh ding.
15 Nan khawmmi rawl le sabit sung ihsin òhenhra òhenkhat a lak pei ih a zung hnaòuan bawi pawl le a bawi dang pawl a òhen thluh ding.
16 Nan hnenum pawl nunau siseh, mipa siseh, a lak ih tlunah nan caw le nan rang lakih a òha bik pawl a lak pei ih amah hrangih hnaòuantu ah a tuah thluh ding.
17 Nan òilva sung khalin òhenhra òhenkhat a lak ding. Nanmah khal a sal ah nan cang thluh ding.
18 Cuvek tikcu a hung thlen ngaingai tikah nan lungtho ih nan hrilmi siangpahrang ruangah nan phunzai ciamco leh ding; asinain nan phunzainak cu Bawipa in a lo theih sak lo ding a si,” tiah Samuel in a sim.
19 Sikhalsehla Samuel ih thu cu an ngai duh lo. “A si lo, siangpahrang kan duh hrimhrim a si.
20 Kanmah ih siangpahrang in, in uk dingih kan ral pawl donak ah in ho ding. Cuticun miphun dang bangtuk kan si ve ding,” tiah an ti thotho.
21 Misenpi pawl ih simmi thu cu kim tein Samuel in a ngai ih Bawipa a va sim.
22 Cutikah Bawipa in, “An duhmi cu tuah ko awla siangpahrang cu pe hai aw,” tiah a ti. Cuih hnuah Israel mi pawl cu Samuel in an inn ciar ah a tlunter thluh.