17
Goliath In Israel Mi Pawl A Zuam
1 Filistin mi pawl cu raldo dingah an ko aw ih Judah ram Sokoh khua ah an khawm aw. Cule Sokoh le Azekah karlak ih a ummi Efes Dammim an timi hmunah an riak.
2 Saul le Israel mi pawl cu an ko khawm aw ih Filistin mi do dingah an timtuah aw ih Elah Rawn ah an riak.
3 Filistin mi pawl cu tlang pakhat parah an òang ih Israel mi pawl khal tlang dang pakhat parah an òang ve. An karlak ah horkuampi a um.
4 Gath khua mi Goliath an timi pa cu Filistin mi pawl umnak ihsin Israel mi zuam dingah a ra suak. Goliath cu dong ruk le khap khat a sang.
5 Dar lukhuh a khummi le ralthuam a hrukmi pawl cu cuai sawmli le cuai ruk tluk a rit.
6 A ke pawl cu darphaw in a tuam thluh ih darih tuahmi feipi cu a liangah a pai.
7 A feipi cu a hlai lam thiamtleeng tia a si ih a feipi lu cu cuai nga lenglo a rit. A ralphaw phurh saktu ralkap pakhat cu a hmaiah a feh.
8 Goliath cun ding tahrat in Israel mi pawl cu, “Saul ih sal rual pawl, raldo dingah maw si nan ra suah? Kei cu Filistin mi ka si ih keimah do dingah nanmah lak ihsin pakhat hril aw uh.
9 I neh ih i that a si ahcun nan sal ah kan cang ding; asinain ka neh ih ka that a si ahcun kan sal ah nan cang ding.
10 Atu rori ahhin Israel ralkap pawl ka lo zuam a si. Keimah do dingah nanmah lak ihsin mi pakhat hril aw uhla ra suak seh,” tiah a auh ciamco.
11 Cumi cu Saul le a ralkap pawl ih an theih tikah an riah a sia ih an thin a phang ngaingai.
Saul Ih Riahnak Ah David A Thleng
12 David cu Judah ram Bethlehem khua ih Efrath mi Jesse ih fapa a si. Jesse cun fapa pariat a nei ih Saul kha siangpahrang a can tikah Jesse cu a tar zo.
13 A fapa upa pathum cu raldonak ah Saul hnenah an feh ve. A upa bik cu Eliab a si. A sangtu cu Abinadab a si ih a pathumnak cu Shammah a si.
14 David cu nauta bik a si. A ule pathum Saul hnenih an tel ve lai ah,
15 David cu a caancaan ah Bethlehem ah a va tlung ih a pa ih tuu pawl a va khal òheu.
16 Cun Israel mi pawl cu Goliath in do aw dingah zingtin zantin ni sawmli sung a va zuam ringring hai.
17 Veikhat ah David cu a pa Jesse in, “Vaikan bawm khat le sang zawlhra hi phur awla ralkap pawl riahnak ah na ule pawl hei sum aw.
18 Cun a khal mi cawhnawi hlom hra in keng awla ralkap hotu ralbawipa va pek aw. Na ule pawl an dam le dam lo va zoh awla, an dam a si, ti theihnak ah an thil pakhatkhat run keng aw.
19 Saul siangpahrang le na ule pawl le Israel ralkap pawl cu Filistin ral an do ih Sasuapi Rawn ah an um a si,” tiah a ti.
20 Curuangah David cu a thaizing zingpit ah a tho ih tuu pawl khaltu dingah mi pakhat a ai awh ah a retta ih a pa Jesse ih a fial vekin ei ding rawl pawl kengin a feh. Israel ralkap pawl cu Filistin pawl do dingah au phahin raldonak hmunih an feh ciamco laifangah David cu ralkap riahnak ahcun a va thleng.
21 Filistin ralkap pawl le Israel ralkap pawl cu do aw dingah òanòhat an khuar veve ih hmaiton in an um.
22 Cutikah David cu rawl lamih òuanvo latu ralbawi hnenah a rawl kenmi cu tanta in raldonak ah a va tlan ih a ule pawl cu an dam le dam lo a va zoh.
23 A ule pawl thawn an biak awk rero lai ah Goliath cu hmaiah a ra suak ih a hlanih a ti òheu bangtukin Israel ralkap pawl cu a zuam lala. Cumi cu David in a thei.
24 Goliath cu Israel ralkap pawl in an hmuh tikah an òih tuk ih an tlan ciamco.
25 Pakhat le pakhat, “Zoh hnik uh, khi pa lawmmam khi! A mi zuam daan cu ngai hnik uh! Khi pa a that theitu cu kan siangpahrang in milian ah a tuah rori ding; a fanu a òhitter dingih a pa ih sungte pawl cu ngunkhuai a olh thluh ding a si ko,” tiah an ti aw rero.
26 Cutikah David in a kiangkap ih a ummi pawl hnenah, “Hi Filistin pa a thattu le hibangtuk ningzah phurhnak ihsin Israel mi a luattertu in ziangso a ngah ding. Thungai ih ti ahcun, a nungmi Pathian ih ralkap pawl zuamtu ding ahcun hi Pathian awi lo Filistin pa cu ziangso a va si lem,” tiah a ti.
27 Cule Goliath a thattu cu laksawng tampi a ngah ding tiah an sim.
28 Cutiih David le ralkap pawl an biak awk rero cu David ih u Eliab in a theih tikah a thin a heng ih, “Hinah ziangso na ra tuah? Ramlak ih na tuu pawl zoso a rak khal? Nang mi doksang pa! Raldo awk zoh dingah na ra a si hi!” tiah a kawk.
29 David in, “Ziang sualnak so ka tuah? Thu tal mi ka sut thei lo ding maw?” a ti.
30 Cun hmundang a hoi ih midang hnenah cuih thu cu a sutsal. Thu a suh mi hmuahhmuah in an thulehnak a bangrep thluh.
31 Mi hrekkhat in David ih òong cu an thei ih Saul an va sim. Cule Saul in David cu a ko.
32 Cutikah David in Saul hnenah, “Maw siangpahrang bawipa, hi Filistin pa cu zohman in òih ding a si lo. Keimah in ka va do mai ding,” tiah a ti.
33 Saul in, “A si lo, ziangtinso na do thei ding? Nang cu nauhak na si ih anih cu a sansung hmuahhmuah ralkap a si zo,” a ti.
34 Asinan David cun, “Maw siangpahrang, kei cu ka pa ih tuu ka khal òheu. Kiosa asilole savom in ka tuu note a tlanpi tikah,
35 sahrang cu ka dawi ih ka nam ciamco ih tuu note cu ka hum suak òheu a si. Cun kiosa asilole savom in i zon tikah, a bakhmul in ka kai ih ka vuak that òheu.
36 Kiosa le savom tampi ka that zo a si ih a cuih pawl ka thah vekin hi Pathian awi lo Filistin pa, a nungmi Pathian ih ralkap pawl a zuamtu cu ka that ve ding a si.
37 Kiosa le savom pawl hnen ihsin i humtu Bawipa cun hi Filistin pa ih kutsung khalin i hum ko ding,” tiah a ti.
Cutikah Saul in, “A òha ko; va feh awla Bawipa Pathian in lo umpi hram seh,” tiah a ti.
38 Cule Saul in a ralthuam cu David ih hruk dingah a pek. David ih lu ah dar lukhuh a khumter ih a ralthuam a hrukter.
39 David in a hrukmi ralthuam parah cun Saul ih ralnam a pai ih feh a tum. Asinan a hruk dah lomi an si ruangah a fehpi thei lo. Cutikah David in, “Hivek thaw cun ka do thei lo ding. Ka hruk dahmi an si lo,” tiah Saul hnenah a ti. Curuangah a phuaksal thluh.
40 A tuu khalhnak funghreu a keng ih tiva kapih lungto hlum fate panga a sar ih a vaidip ah a san. Cutiin a lungherhden thawn Goliath do dingah a feh.
David In Goliath A Neh
41 Filistin mi Goliath cun David cu a rak naih. A raldonak phaw a phurtu pa cu a hmaiah a fehter. A rak naih vivo ih,
42 Òha teih David a hmuh ngahnak hmun ihsin a zoh tikah, David cu mi piang zet tlangval note a si ko lo maw tiah a nautat ngaingai.
43 Cutikah David cu, “Kha ih funghreu kha ziangtinak ah so na ken? Uico ah maw i ruat?” tiah a auh ih amah ih khawzing hmin ko in David cu a cam ciamco.
44 David cu a zuam ih, “Ra hnik aw, na sa cu vate le ramsa pawl ka eiter ding,” tiah a ti.
45 Cutikah David in, “Nang cun nam le fei le thal kengin do i tum. Sikhalsehla kei cu na zuammi Israel pawl ih Pathian Ziangkimtithei Bawipa ih hmin in nangmah do dingah ka ra a si.
46 Tuih sun rori ah Bawipa ih thawngin nangmah cu ka kutsung ah na thleng ding, ka lo neh ding. Na lu ka lo tan ding. Filistin ralkap pawl ih sa cu vate le ramsa pawl ih ei dingah ka pe ding. Israel cun Pathian a nei a si, ti kha hi ram mi hmuahhmuah in an thei ding.
47 Pathian cun amah ih minung pawl run dingah nam le fei pawl a òulter lo a si, ti cu mi hmuahhmuah in an hmu ding a si. Bawipa cu ral nehtu a si ih nanmah khal hi nan zate in kan kutsung ah a lo thlenter ding a si,” tiah a ti.
48 Cule Goliath in David cu a rak naih sinsin ih David cun amah do dingah Filistin pawl lam ahcun zamrang in a va tlan.
49 David in a vaidip sung a vun pur ih lungto hlumte pakhat a vun lak hnuah a lungherhden in Goliath cu a sai. Goliath ih calpadar ah a ngah ih a luruh a kuai. Curuangah Goliath cu a bokkhup in a ril.
50 Cutiin ralnam hmang lo tein David in Goliath cu lungherhden le lungto in a neh a si.Ref 17:50 2 Sam 21:19;
51 David cu a tlan ih Goliath parah a va ding. Cun Goliath ih ralnam cu a kawm sung ihsin a zuk ih a hngawng a tan ih Goliath cu a thi.
Filistin ralkap pawl cu an micak bik pa a thih an hmuh tikah an tlanhlo.Ref 17:51 1 Sam 21:9;
52 Cule Israel le Judah ram ihsin a rami ralkap pawl cun hmakhat teah an dawi hai ih au phahin Gath le Ekron kotka tiang an dawi. Filistin ralkap pawl ih ruak cu Gath le Ekron tiang Shaaraim lamzin ah an ril teptep.
53 Cuih hnuah Israel ralkap pawl cu an kir ih Filistin ralkap riahnak ih thilri pawl cu an lak òheh.
54 David in Goliath ih lu cu a lak ih Jerusalem ah a phur. Asinan Goliath hriamnam pawl cu amah ih buuk sungah a ret.
David In Saul A Tong
55 Goliath do dingih David a feh kha Saul in a rak hmuh tikah a ralkap hotu ralbawipa Abner a ko ih, “Khi nauhakpa khi zoso a si?” tiah a sut.
Abner in, “Maw siangpahrang bawipa, zoso a si, ti ka thei lo,” tiah a sawn.
56 “Va feh awla zo ih fapa so a si, ti va hliah aw,” tiah Saul in a ti.
57 Cun a thah hnu ih an riahnak ih David a rathlen tikah, David cu Abner in Saul hnenah a fehpi. David in Goliath ih lu cu a keng thotho.
58 Cutikah Saul in, “Tlangvalpa, zoso na si?” tiah a sut.
Cule David in, “Bethlehem khuami na salpa Jesse ih fapa ka si,” tiah a ti.