12
Nunau Le Rulhreng
1 Cule van ah khawruahharza thil pakhat a lang. Nunau pakhat a lang ih a thuam cu ni a si; thlapi a ke hnuai ah a ret ih arsi hleihnih ih tuahmi siangpahrang lukhuh a khum.
2 Fa a vun ih nau hrin caan a kim. Nauhrin natih a nat ruangah a ai rero.
3 Cule van ah a dang khawruahhar hmuhsaknak mak pakhat a lang. Rulhreng sen tum zet, lu pasarih le ki pahra a neimi a lang. A lu pawl cun siangpahrang lukhuh pakhat fingfing an khum.Ref 12.3 Dan 7:7;
4 A mei in van ih arsi òhenthum òhenkhat leilung ah a vuak thlak. Nau nei ding nunau hmaiah a ding ih nau a suah ve tein deh dingin a bawh.Ref 12.4 Dan 8:10;
5 Cule cuih nunaunu in miphun hmuahhmuah thirfung thawn a uktu dingah fapa a hring. Asinan naute cu an lak ih Pathian le a bawi tohkham hnenah an tlanpi.Ref 12.5 Isa 66:7; Saam 2:9;
6 Nunau cu Pathian in hmun a remsak cia mi hramlak ah a tlan. Cutawkah ni thawngkhat zahnih le sawmruk sung an cawm ding.
7 Cule van ah raldo awknak a um. Mikhael le a vancungmi pawl in rulhreng cu an do; rulhreng le a vancungmi khalin an do ve.Ref 12.7 Dan 10:13, 21, 12:1; Jud 9;
8 Asinan rulhreng cu a sun ruangah a vancungmi pawl thawn vancung ah an um thei nawn lo.
9 Rulhreng tumpi, khuahlan rulpi, Khawsia asilole Satan tiih kawhmi, leilung pumpuluk mibumtu cu van ihsin an hlon. A vancungmi pawl thawn leilung ah an vun thlak.Ref 12.9 Sem 3:1; Luk 10:18;
10 Cule vancung ah aw ring zet ka thei ih,
“Pathian ih rundamnak a thleng zo!
Pathian in siangpahrang a sinak
a huham a langter zo!
Messiah ih huham a langter zo!
Ziangahtile Pathian hmaiah dingin,
a sunzan in kan unau sual a puhtu cu
vancung ihsin hlon a si zo.Ref 12.10 Job 1:9-11; Zek 3:1;
11 Kan unau pawl in Tuufa thisen le
thutak an phuanmi thawngin
nehnak an ngah zo.
An nunnak an pe siang ih
thih khal an ngam a si.
12 Curuangah vancung le van ih
a mi hmuahhmuah nan lungawi uh!
Asinan leilung le tifinriat hrangah cun
an hmakhua a va pit so!
Ziangahtile Satan nan hnen
a rung thleng zo ih,
an biak ding caan reipi a nei nawn lo
ti a theih ruangah
a thin a heng ngaingai,” tiah a ti.
13 Rulhreng in leilung ah in thlak ti a theih ve tein fapa a hringtu nunau cu dawi a thok.
14 Asinan nunaunu cu a hrangah rem cia mi hramlak ih zuannak dingah a tum zetmi muvanlai thla pahnih an pek. Cutawkah rulhreng ih siatsuah thei lo dingin kum thum le a hrek sung an kilkhawi ding.Ref 12.14 Dan 7:25, 12:7;
15 Cule nunaunu cu tilian in fen seh tiah rulhreng in a kaa sung ihsin tidai a suahter ciamco.
16 Asinan nunaunu bawm dingah leilung cu a kaa a ang ih rulhreng kaa sungin a suakmi tidai cu a rak dolh òheh.
17 Rulhreng cu nunaunu parah a thin a heng tuk ih nunau tefa pawl Pathian thukham a thluntu le Jesuh ih phuanmi thutak a rinsantu hmuahhmuah do dingah a pok lala.
18 Cutiin tifinriat kapah rulhreng cu a ding.