28
Judah Siangpahrang Ahaz
(2 Siang 16:1-4)
1 Ahaz cu kum kul a ti ah siangpahrang a cang ih Jerusalem ihsin kum hleiruk sung a uk. A cithlahtu Siangpahrang David ih nun zia cu a cawng lo; Bawipa ih lungawi lonak thil sawn a tuah;
2 Israel siangpahrang pawl ih nun zia a thlun. Thir in Baal khawzing lem pawl a bur ih a tuah;
3 Hinnom Phairawn ah rimhmui a ur ih, Israel mi pawl Kanaan ram an luh lai ih Bawipa in a dawimi miphun pawl ih fihnungza thil tuahmi pawl a cawn ruangah a fapa pawl tiangin milem hnenih thawinak ah a pek.
4 Khawvang biaknak le khawhrum umnak hmun kipah le tlangpar kipah le thinghnem hnuai kipah Ahaz cun thawinak a pek ih rimhmui a ur vivo.
Judah In Siria Le Israel A Do
(2 Siang 16:5)
5-6 Ahaz a sual ruangah Bawipa a Pathian in Siria siangpahrang hnenah nehnak a pek ih Judah mi tampi kai in Damaskas ah thawng ah an thlak. Bawipa ih bomnak thotho in Israel siangpahrang Remaliah ih fapa Pekah in Ahaz cu a neh ih nikhat ah Judah ralkap ralòha bik pawl thawng zakhat le thawngkul an that. Bawipa an dungtun ruangah Bawipa, an pupa ih Pathian in hibangtuk ih cang dingah thu a pek.Ref 28:5-6 2 Siang 16:5; Isa 7:1;
7 Cule Israel ralkap pakhat Zikhri an timi pa in siangpahrang Ahaz ih fapa Maaseiah le siangpahrang inn uktu Azrikam le thuneihnak lamah siangpahrang sangtu Elkanah pawl a that òheh.
8 Judah mi cu an unau an si nain Israel ralkap in Judah nunau le nauhak thawng zahnih kai in Samaria ah an hruai ih thawng ah an thlak hai. Hransaw thilri tampi tla an long ih Samaria ah an tlunpi.
Profet Oded Ih Òong
9 Culai ah Bawipa ih profet pakhat, Oded an timi Samaria khua ah a um. Raldonak ihsin a ratlungmi Israel ralkap pawl cu khuasung an luh zikah a va hmuak ih an hnenah, “ Bawipa, nan pupa ih Pathian cu Judah mi parih a thin a heng ruangah Judah mi pawl cu a lo nehter a si; asinain nan thin a heng tuk ruangah sup aw lo in mi tam tuk lawmmam nan thahnak thu cu van a thleng a si.
10 Cule atu ah Jerusalem le Judah ihsin mipa nunau ti lo in nan sal ah tuah òheh nan tum fawn. Bawipa nan Pathian hmaiah sualnak nan tuah ve hi nan thei lo maw?
11 I ngai hnik uh! Hi nan kaihmi pawl hi nan unau le nan far le pawl an si. Thlahsal òheh uh; culole Bawipa a thinheng in a lo hrem hai ding,” tiah a ti.
12 Saklam Ram ih hminthang zet minung pali Jehohanan ih fapa Azariah, Meshillemoth ih fapa Berekhiah, Shallum ih fapa Jehizkiah le Hadlai ih fapa Amasa in ralkap pawl ih thiltuahmi cu an lung a kim lo ih,
13 ralkap pawl hnenah, “Nan kaihmi pawl cu hinah rak hruai hlah uh. Bawipa ih hnenah kan sual zo ih kanmah hrem duh tiangin a thin kan hengter zo. Cuih tlunah kan sualnak tam sinsin dingin hibangtuk thiltuah hi nan duh hrih,” an rak ti.
14 Curuangah ralkap pawl in an kaihmi pawl le an lonmi hransaw thilri pawl cu misenpi le an hotu pawl hnenah an pek ih,
15 an lonmi hransaw thilri le hnipuan pawl zemtu dingah an kaihmi pawl sung ihsin upa pali an hril. Cuih pali pawl in an hruk dingah hnipuan nei lo pawl hnipuan le kedam an pek; ti le rawl òha tein an pek ih an hma pawl cu olif hriak an hnihsak. A feh thei nawn lomi pawl cu laak parah an toter ih an kaih mi zate in Judah ram, tuumkung khua an timi Jerikho khua tiang an hei kuat. Cule Israel mi pawl cu Samaria ah an tlung.
Ahaz In Assiria Bomnak A Dil
(2 Siang 16:7-9)
16-17 Cun Edom mi pawl in Judah ram cu atu le tu an siim ih mi tampi kai in sal ah an hruai òheu. Curuangah siangpahrang Ahaz in Assiria siangpahrang Tiglath Pileser hnenah bomnak a dil.
18 Culaifang ah Filistin mi pawl in nitlaknak lam tlanghram le Judah ram thlanglam pawl an siim. Beth Shemesh, Aijalon le Gederoth khua pawl an lak ih tlunah Soko, Timnah le Gimzo khua pawl le an kiangkap ih ummi khuate tla an la ih an luah tata.
19 Judah siangpahrang Ahaz in a milai pawl parah thil mawi lo le thil dik lo tampi tuah in Bawipa a dodal ruangah Judah ram ah Bawipa in harsatnak a thlenter a si.
20 Curuangah Assiria siangpahrang Tiglath Pileser in Ahaz cu a bom lam tum lo in a dodal ih harsatnak tampi a pek.
21 Cutikah Ahaz in Biakinn paisa le thilri pawl, siangpahrang inn thilri le paisa pawl le Judah ram hotu upa pawl ih neihmi hmuahhmuah tiangin a lak òheh ih Assiria siangpahrang a pek; asinain a bawm duh cuang lo.
Ahaz Sualnak Pawl
22 Ahaz sualnak cu a nasa ngaingai a si! A ram sungih harsatnak a thlen deuhdeuh tikah Bawipa ih hmaiah a sual deuhdeuh.
23 Amah a nehtu Siria mi pawl ih khawzing hnen tiangah thawinak a pek. “Siria siangpahrang cu an khawzing in an bawm ruangah kei khalin thawinak ka pek a si ahcun in bawm ve ding,” tiah a ruat. Cumi cun amah le a ram minung parah siatsuahnak a thlenter sinsin.
24 Cuih tlunah Biakinn beelkheng hmuahhmuah a lak ih a deen kuai òheh. Bawipa ih Biakinn cu a khar ih Jerusalem khuasung hmun tampi ah biakòheng a tuah ciamco.
25 Judah ram khuapi ah siseh, khuate ah siseh, ramdang khawzing pawl hnenih rimhmui urnak ah khawvang biaknak khawhrum hmun a tuah vivo. Cuticun a pupa ih Pathian Bawipa ih thinhennak cu amah ih parah a thlengter sinsin.
26 Siangpahrang a òuan sungih thil a cangmi le a tuahmi dang pawl cu a thokin a cemnak tiang Judah le Israel Siangpahrang Thuanthu Cabu sungah an ngan a si.
27 Siangpahrang Ahaz cu a thi ih Jerusalem khua ah an phum; asinain siangpahrang thlan ahcun an phum lo. A fapa Hezekiah in a pa ih ai ah siangpahrang a run òuan.Ref 28:27 Isa 14:28;