SAAM HLABU 119
Bawipa Ih Daana Saam Hlabu 119 Bawipa Ih Daan timi hi a zate in Daan sunloihnak ih phuahmi hla a si. Saam 119 ah òhen kul hluanhnih a um ih òhenkhat ah cang riat fingfing a um. Hebru cafang khal kul hluanhnih a um ve ih òhenkhat hramthoknak cu Hebru cafang hmaisabik ‘aleph’ timi in a thok ih a sangsang in cafang netnak ‘taw’ timi tiang òhen kul hluanhnihnak ah a cem ve. Mirang òong cun ‘acrostic poem’ an ti ih an ca siarnak cafang sirhsan in hla an phuahmi a si. A santlaihnak cu: Hebru pawl in zoh lo ih Daan sunloihnak hla an sak le an siar duh tikah bawmtu òha zet a si, tin an zum.
1 A nunnak ah soisel ding
a um lomi le,
Bawipa ih daan vekih
a nungtu pawl cu mi lungawi an si.
2 A thinlung zate in
Bawipa ih thu a ngaitu le,
a thupekmi pawl a thluntu cu
mi lungawi an si.
3 A si, thilsual zianghman tuah lo in
Bawipa ih lamzin ahcun an feh.
4 Na daan pawl cu in pe zo ih
Fel teih thlun dingah in tiam zo.
5 Na daanterek pawl tiangin,
Fel tein thlun thei ningla
ka va duh so!
6 Taima zet ih na thukham pawl
ka thlun ahcun,
Ningzak in ka um lo ding.
7 Thinlung thiang in
ka lo thangòhat ding,
Na thuòhennak fel zia
ka theih hnu ahcun!
8 Na daan pawl cu ka thlun ding;
I tanta hram hlah aw!
Bawipa Ih Daan Thlunnak
9 Ziangtinso mino in ziaza thiang
a neih thei ding?
Na thupekmi thlun lawngin
a nei thei ding.
10 Ka thinlung zate in nangmah
lo rian dingah ka pe aw,
Na thukham pialsan lo dingah
i kilkhawi aw.
11 Ka thinlung sungah
na daan cu ka ret zo,
Na parih ka sual lonak dingah.
12 Maw Bawipa,
nangmah ka lo thangòhat;
Na daan pawl i zirh hram aw.
13 Na thukham in pekmi pawl cu
ring zet in ka saal ringring ding.
14 Sumsaw tampi neih hnakin
Na thupekmi thlun ah
ka lung a nuam sawn.
15 Na nunsimnak cu ka zir dingih,
Na thuzirhmi pawl cu
ka ruat òha ding.
16 Na daan pekmi ah lungawinak
ka nei ih,
Na thupekmi pawl cu
ka hngilh lo ding.
Bawipa Ih Daan Ah Lungawinak
17 Ka nundam ih na thu
ka thlun theinak dingah,
Kei na siahhlawh parah hin
òha hram aw.
18 Na daan sungah mangbangza
thudik ka hmuh theinak dingah
ka mit cu vangter hram aw.
19 Leitlun ahhin
rei lote sung lawng ka um;
Ka hnen ihsin na thukham cu
thup hram hlah aw.
20 Na thuòhennak theih ka duh
ringring ruangah,
Ka thinlung cu mei bangin
a hlio ringring.
21 Mi puarthau na kawk hai ih
na thupekmi a pahtu pawl cu,
siat na serh hai a si.
22 Na daan ka thlun zo ruangah
ka parih hmuhsuam le nautatnak
an neihmi in i luatter hram aw.
23 Hotu pawl an tonkhawm ih
in phiar rero hmanah,
Kei na siahhlawh in na daan cu
ka zir thotho ding.
24 Na thuzirhmi pawl cu
lungawinak i petu an si ih
ruahnak òha i petu khal an si.
Bawipa Ih Daan Thlun Tumnak
25 Ka nunnak cu leivut lakah
namnuai in a um;
Na thutiam cia vekin
ka tha tlungtersal hram aw.
26 Ka tuahmi hmuahhmuah
ka phuang ih nang in i thei;
Na thupekmi pawl i zirh hram aw.
27 Na daan thlun thei dingah
i zirh awla,
Mangbangza na thuzirhmi cu
fel tein ka ruat òha ding.
28 Riahsiatnak ruangah
ka thinlung a zup òheh;
Na thutiam cia vekin
ka tha tlungtersal hram aw.
29 Zinpeng ka zawh lonak dingah
i kilveng aw;
Na òhat ruangah na daan cu i zirh aw.
30 Na thu thluntu si dingah
ka ruat cat zo;
Na thukham pawl cu
ka hmaiah ka ret zo.
31 Maw Bawipa,
na thuzirhmi pawl cu ka thlun zo;
Mualpho in i ret hram hlah aw.
32 Nangmah in theihthiamnak
i pek ding ruangah,
Na thupekmi cu thatho zet in
ka thlun ding.
Daan Theihthiamnak Hrangih Thlacamnak
33 Maw Bawipa,
na daan pawl ih tican i sim awla,
Ziangtik khalah cat lo in
ka thlun ringring ding.
34 Na daan pawl cu i zirh fiang awla
ka thlun hai ding;
Ka thinlung zate in ka thlun ding.
35 Na thukham thlun thei dingah
i hruai aw;
Ziangahtile cutawkah lungawinak
ka ngah a si.
36 Lennak duhtu si lo in
na daan pawl thlun duhtu sawn
i siter aw.
37 Thil òhahnem lo a hawl rerotu
Ka si lonak dingah i kilkhawi aw.
Na thutiam cia vekin ka parah
òha hram aw.
38 Nangmah a lo òihzahtu
pawl hnenih na thukamnak cu,
Kei na siahhlawh hnen ahhin
kimter hram aw.
39 Ka òih zetmi nautatnak ihsin
i luatter hram aw;
Na thupekmi pawl cu mangbangza
ngaingai an si!
40 Na thupekmi cu ka sunsak a si;
A dingmi na si ruangah i nungter
hram aw.
Bawipa Ih Daan Rinsannak
41 Maw Bawipa,
i duhdawtnak a maksak zia
langter hram aw,
Na thutiam cia bangtukin
i run hram aw.
42 Cuticun i nautattu pawl cu
an thu ka sawn thei hai ding;
Ziangahtile na òongkam cu
ka rinsan a si.
43 Thudik a sim ngam ringringtu
si dingah thazang i pe aw;
Ziangahtile na thuòhennak khi
ka beiseimi a si.
44 Na daan pawl cu
ka thlun ringring ding;
Kumkhua cat nawn lo in
ka thlun ding a si.
45 Na thupekmi pawl thlun dingih
ka hawl suak ruangah,
A famkimmi zalennak sungah
ka nung ding.
46 Na thupekmi cu siangpahrang
pawl hnenah ka than ding;
Ka zahpi hrimhrim lo ding.
47 Na thukham pawl thlun cu
ka diriamnak a si.
Ziangahtile ka ngainatmi an si.
48 Na thukham pawl cu
Ka uarmi le ka duhmi an si;
Na thupekmi cu ka thinlung ah
ka ruat òha ringring ding.
Bawipa Ih Daan Ah Lungkimnak
49 Na siahhlawh kei ka hnenih,
Na thutiam cu hngilh hram hlah aw;
Beiseinak i neihter zo.
50 Ka vansan caan hmanah
i hnemtu a si;
Ziangahtile na thutiam in
nunnak i pek.
51 Mi puarthau pawl in, in hmuhsuam;
Asinan na daan pekmi ihsin
ka pial dah lo.
52 Kan dung caan reipi lai ih
i pekmi na thu pawl cu,
ka ciing ringring;
Maw Bawipa,
ka hrangah hnemtu an si.
53 Miòha lo pawl in na daan
an balsiat kha ka hmuh tikah,
Ka thin a heng ngaingai.
54 Hi leitlun khual ka tlawnnak
ram ahhin,
Na thukham pawl cu
ka hlasakmi an si.
55 Maw Bawipa,
zan khalah nangmah ka lo ruat ih,
na daan khal ka ruat a si.
56 Na thupekmi thlun cu
ka lungawinak a si.
Bawipa Ih Daan Tlaihsannak
57 Maw Bawipa,
ka duhmi cu nangmah lawng na si;
Na daan thlun dingah
thu ka kam zo.
58 Ka thinlung tak tein
ka lo ngen a si;
Na thutiam cia bangin,
ka parah zangfahnak nei hram aw.
59 Ka nunnak ih a zawhmi lamzin hi
ka zohsal ih,
Na thupek thlun dingah
ka lo kam a si.
60 Khulfung lo in na thukham
thlun dingah zamrang in ka tho.
61 Miòha lo pawl cun
an thang in fek zet in in khit;
Asinan na daan ka hngilh lo.
62 Zanòim ah ka ihnak ihsin ka òhang;
A dingmi na thuòhennak
thangòhat dingah.
63 Na daan a thluntu le
a lo riantu hmuahhmuah ih
rualpi ka si.
64 Maw Bawipa,
leilung pumpi hi
a hmunmi na duhdawtnak in a khat.
Na thukham pawl i zirh hram aw.
Bawipa Ih Daan Man A Nei
65 Maw Bawipa,
na thutiammi cu na kimter ih,
Kei na siahhlawh hnenah
na òha a si.
66 Fimnak le thuruah thiamnak
i pe hram aw;
Ziangahtile na thukham
ka rinsan a si.
67 Hrem ka si hlan ahcun
zinpeng ka zawh òheu;
Asinan atu ahcun na thu ka thlun.
68 Na òhat zia le mi na zangfah zia cu!
Na thukham pawl i zirh hram aw.
69 Mi hngal pawl in ka thu cu
Thuphan hlir in an rel;
Asinan ka thinlung zate in
na daan cu ka thlun.
70 Hibangtuk minung pawl cun
theihthiamnak an nei lo;
Asinan na daan sungah
lungawinak ka nei.
71 I hremnak cu ka hrangah a òha;
Ziangahtile na thupekmi i zirter a si.
72 I pekmi na daan cu
leilung pumpi ih sui le ngun
hmuahhmuah hnakin
ka hrangah a sunglawi sawn.
Bawipa Ih Daan Cu A Ding
73 Nangmah in i semsuah ih
nangmah in him tein i kilveng;
Na daan pawl ka zirnak dingah
ruahthiamnak thinlung i pe hram aw.
74 A lo òihzahtu pawl cun
in hmuh tikah an lung a awi ding;
Ziangahtile na thu cu ka rinsan.
75 Maw Bawipa,
na thupekmi pawl cu
an dik a si, ti ka thei;
Zum tlak na si ruangah
i hrem a si, ti khal ka thei.
76 Kei na siahhlawh
i tiamkam cia vekin,
A hmunmi na duhdawtnak in
i hnem hram seh.
77 I zangfah awla ka nung ding;
Ziangahtile na daan sungah
ka lung a awi a si.
78 Mi puarthau pawl in,
Sual in puh ruangah an ningzak seh;
Kei cun ka thinlung sungah,
Na daan pawl cu ka ruat òha ding.
79 Na thupekmi a theitu pawl le
nangmah a lo òihzahtu pawl cu
ka hnenah ra hai seh.
80 Ningzak mualpho ih
ka um ve lonak dingah,
na thukham cu famkim zet in
thlun thei hram ning law!
Luatnak Hrangih Thlacam
81 Maw Bawipa,
nangmah runnak ka hngahnak ah
ka hnang òheh;
Na thu cu ka rinsan fawn si!
82 Na thutiammi ka zohnak ah
Ka mit a kham òheh zo;
“Ziangtikah so i bom ding?”
tiah sut lo in ka um thei fawn lo!
83 An hlon cia mi savun sabit thawl
vekin santlai lo ka si;
Asinan na thupekmi cu
ka hngilh hrih lo.
84 Ziangtik tiang so
ka lo hngah hrih ding?
I hremtu pawl hi ziangtikah so
na hrem ve hai ding?
85 Na daan a thlun lotu
mi hngal pawl in,
Ka tlaknak dingah khur tampi an lai.
86 Na thukham pawl cu
rin tlak zet hlir an si;
Mi hngal pawl cun thuphan hlir in,
in hrem zok rero;
i bawm hram aw.
87 Atu ahcun in that thei zik
ngaingai thlang;
Asinan na thupekmi pawl cu
ka daithlan cuang lo.
88 A hmunmi na duhdawtnak ruangah
ka parah òha hram aw.
Cuticun na daan pawl cu
ka thlun thei ding.
Bawipa Ih Daan Zumnak
89 Maw Bawipa,
na thu cu kumkhua in a hmun ding;
Vancung ih a hnget zomi thu a si.
90 Zum tlak na sinak cu
Sankhat hnu sankhat a hmun;
Leilungpi hi nangmah in na retih
na retnak ihsin a òhawn dah lo.
91 Ziang hmuahhmuah
na thupek vekin
tuih sun tiang an hmun;
Ziangahtile an zate in a lo riantu an si.
92 Na daan pawl hi
ka lungawinak ih
hrampi si hlah sehla,
Ka zonzaihnak ah ka thi zo ding.
93 Na thupekmi pawl ziangtik
hmanah ka daithlan lo ding;
Ziangahtile cupawl cu
na hmang ih nunnak i pek.
94 Kei cu na ta ka si,
I run hram aw.
Na thupekmi thlun ding lawng
ka tummi a si.
95 Miòha lo pawl in thah dingah
in bawh;
Asinan na daan cu ka thinlung in
ka ruat òha ding.
96 A famkimmi zianghman a um lo,
ti ka thei zo;
Asinan na thukham cu a famkim a si.
Bawipa Ih Daan Ka Duh
97 Aw, na daan pawl ka duh zia cu!
Sun nihlawh in culawng ka ruat!
98 Na thukham cu ka hnenah
a cam ringring;
Ka ral pawl hmuahhmuah hnakin
i fimter deuh a si.
99 I zirhtu pawl hmuahhmuah
hnakin ka thei deuh,
Na thuzirhmi pawl ka ruah òhat ruangah.
100 Patar pawl hnakin ka fim deuh,
na thupekmi ka thlun ruangah.
101 Ziaza òha lo cu ka hrial zo,
Na thu thlun ka duh ruangah.
102 Na thuzirhmi ka daithlan lo,
I zirhtu nangmah na si ruangah.
103 Na thupekmi pawl an thlum zia cu!
Khuaitizu hnakin an thlum sawn.
104 Na daan pawl ihsin
fimnak ka ngah ih,
Nuncan òha lo hmuahhmuah cu
ka hua a si.
Bawipa Ih Daan Ihsin Tleunak
105 Na thu cu
ka ke hrangah mei-inn a si ih,
ka lamzin hrangah tleunak a si.
106 Siatcam ih thu ka kam vekin,
a dikmi na thuzirhnak cu
ka thlun ding.
107 Maw Bawipa,
ka tuar zia cu a nasa ngaingai;
I tiamkam zo vekin i nungter hram aw.
108 Maw Bawipa,
ka lungawi thlacamnak cu
sang hram awla,
Na thupekmi cu i zirh hram aw.
109 Nitin ka nunnak pe dingin
ka tiar aw;
Na daan pawl ka hngilh lo a si.
110 Miòha lo pawl in ka hrangah
thang an kam;
Asinan na thupekmi pawl cu
ka pah lo.
111 Na thukham pawl cu
kumkhua in ka ta an si;
Ka thinlung nuamtertu an si.
112 Na daan pawl cu
ka thih ni tiangih thlun dingah,
ka ruat cat zo a si.
Bawipa Ih Daan Ah Himnak
113 Na hnenih thinlung reprai
Nei lotu pawl cu ka mit an kem;
Asinan na daan cu ka duh.
114 Nang cu ka beunak le
ka ralphaw na si;
Na thutiam ah beiseinak ka nei.
115 Maw misual pawl
ka hnen ihsin tlan uh;
Ka Pathian ih thupekmi pawl cu
ka thlun ding.
116 I kam cia vekin thazang
i pe awla ka nung ding;
Ka ruahsannak ah ka riah
i siatter hlah aw.
117 I kai awla ka him ding;
Cule na thupekmi pawl cu
ka seherh ringring ding.
118 Na daan a pahtu pawl cu
na hnong hai;
An mibum thiamnak cu a lak a si.
119 Mi tha lo pawl cu hnawmhne
tluk ah na ruat hai;
Curuangah na thuzirhnak cu
ka duh zet.
120 Nangmah ih ruangah
ka thin a phang;
Na thuòhennak ruangah
òihnak in ka khat.
Bawipa Ih Daan Thlun Theinak
121 A dikmi le a òhami cu
ka tuah zo;
Ka ral pawl ih kut sungah
i tanta hlah aw.
122 Ka lo bawm ding tiah,
Na siahhlawh kei hi i tiam aw;
Mi puarthau pawl in i neh nen
hlah hai seh.
123 Na runnak le bomnak zoh ah
ka mit a kham òheh zo;
Na tiam cia mi luatnak
ka zohnak ah!
124 A hmunmi na duhdawtnak thawn
i zoh awla,
Na thupekmi pawl i zirh aw.
125 Kei hi na siahhlawh ka si,
Theihthiamnak i pe aw;
Na thuzirhmi pawl
ka theih theinak dingah.
126 Maw Bawipa,
na hnaòuan thok a cu thlang,
Milai in na daan an pah vivo!
127 Na thukham cu sui hnakin
ka duh sawn;
Leitlun ih sui òha bik hnakin.
128 Curuangah na thuzirhmi pawl
hmuahhmuah ka thlun ih,
Umdan dik lo pawl cu ka hua.
Bawipa Ih Daan Thlun Duhnak
129 Na thuzirhmi pawl cu
mangbangza in an òha;
Curuangah ka thinlung zate in
ka thlun.
130 Na thuzirh fiangtermi in
tleunak a pek;
Mi lungmol hnenah fimnak a pek a si.
131 Na thupekmi pawl
ka hiar tuk ruangah,
Ka kaa ang in tidai haal in, ka haal.
132 Nangmah a lo duhtu pawl
na zangfah bangin,
Ka lam hoi awla i zangfah hram aw.
133 I tiamkam cia bangin
i bahter hram hlah aw;
òhat lonak ih uk ding cu
i siang hram hlah aw.
134 I neh-nentu pawl ih kut ihsin
i hum awla,
Na thupekmi cu ka thlun ding.
135 Na mithmai òha cu ka parah,
ni bangin tlangter awla,
Na daan pawl cu i zirh hram aw.
136 Ka mitthli cu tidai bangin a luang;
Milai in na daan an thlun lo ruangah.
Bawipa Ih Daan A Ding Zia
137 Maw Bawipa,
nang cu a dingmi na si ih,
Na daan pawl khal an dik.
138 Na thuzirhmi cu an fel ih,
Rin tlak an si ih an òha.
139 Ka thinhennak cu
meivam bangin a ling,
Ka ral pawl in na thukham
an poisat lo ruangah.
140 Na thukam cu
ziangtlukin so rin tlak a si!
Na siahhlawh in
ziangtlukin so ka duh!
141 Minauta le nautatmi ka si nain,
na thupekmi pawl cu ka daithlan lo.
142 Na dingnak cu
kumkhua in a dingmi an si ih,
Na daan cu an dik ringring.
143 Harsatnak le donharnak in ka khat;
Asinan na thukham in
lungawinak i pek.
144 Na thuzirhnak cu
kumkhua in a dik;
Theihthiamnak i pe awla
ka nung ding.
Luatnak Hrang Thlacamnak
145 Ka thinlung tak tein ka lo ko;
Maw Bawipa,
i sawn awla na thu ka thlun ding.
146 Nangmah cu ka lo ko;
I hum awla na daan ka thlun ding.
147 Khua a van hlan ihsin,
na bomnak dil in ka lo ko;
na thukam ah beiseinak ka nei.
148 Zanvarte itthat lo in ka um;
Na thuzirhmi pawl ngaihtuahnak ah!
149 Maw Bawipa,
na duhdawtnak ruangah
i run ngai hram aw!
Na òhatnak ruangah ka nunnak cu
zuah hram aw!
150 Mi zangfah nei lo
i hremtu pawl cun in naih deuhdeuh;
Na daan a thlun dah lotu pawl cun!
151 Asinan maw Bawipa, nang cu
ka kiangah na um;
Na thukham cu kumkhua hrang a si.
152 Na thuzirhmi cu
hlanlaipi in ka zir zo;
Kumkhua daih ih na pekmi an si.
Runnak Hrang Dilnak
153 Ka harsatnak hi zoh awla i run aw;
Na daan cu ka daithlan dah lo!
154 I òan awla i luatter hram aw;
Na thutiam cia vekin
nundamnak i pe aw.
155 Miòha lo pawl cu
runmi an si lo ding;
Na daan an thlun dah lo ruangah!
156 Asinan maw Bawipa,
Na lainatnak cu a tum ngaingai;
I zangfah awla i run hram aw.
157 I raltu le i hremtu tampi an um;
Asinan na daan cu thlun lo in
ka um dah lo!
158 Mi phiartu pawl ka hmuh tikah,
ka mit an kem nasa;
Na thukham an thlun dah fawn lo!
159 Maw Bawipa,
na thuzirhmi ka duh zia hi zoh hnik!
A hmunmi na duhdawtnak ruangah
i hum hram aw.
160 Na daan ih muruh cu thutak a si;
A dikmi na daan pawl cu
kumkhua in an hmun.
Daan Sungih Thinlung Peknak
161 Ziang thu hman um lo in,
Mi upa cak zetzet pawl in, in ral;
Asinan ka upatmi cu
na daan lawng a si.
162 Na thukam ruangah
ziangtlukin so ka lung a awi;
Thilri mankhung sartu bangin.
163 Thuphan hmuahhmuah cu
ka hua ih ka fih;
Asinan na daan cu ka ngaina.
164 Na hnenah nitin vei sarih
lungawinak thu ka sim,
Na thuòhennak a fel ruangah.
165 Na daan a duhtu pawl cu,
Humhimnak famkim an ngah;
Zianghman in a bahter thei hai lo a si.
166 Maw Bawipa,
i run dingah ka lo hngak;
Na thukham ka thlun a si.
167 Na daan pawl cu ka thlun hai;
Ka thinlung zate in ka duh a si.
168 Na thukham le
na thuzirhmi pawl cu ka thlun;
Ka tuahmi hmuahhmuah
na hmu òheh a si.
Bomnak Hrang Thlacam
169 Maw Bawipa,
bomnak dil ih ka aunak cu,
Na hnenah thleng hram seh.
Na thutiam vekin theihthiamnak
i pe aw.
170 Ka thlacamnak cu
na hmaiah thleng hram seh;
Na thutiam vekin i run hram aw.
171 Cat lo in ka lo thangòhat ding;
Na thu i zirh zo ruangah.
172 Na daan cu hla in ka sak ding;
Na thukham pawl an dik ruangah.
173 Keimah bawm dingah
tiar cia in um hram aw;
Na thukham ka thlun ruangah.
174 Maw Bawipa,
na runnak ka ngai zia cu!
Na daan sung lawngah lungawinak
ka nei a si!
175 Nunnak i pe hram aw,
Ka lo thangòhat ringring ding;
Na thuzirhmi in i bawm hram seh.
176 A hlomi tuu vekin ka vakvai;
Ra awla kei na siahhlawh hi
i ra hawl hram aw;
Na daan pawl ka daithlan lo a si.