19
Cawla Sen Ih Vutcam
1 Bawipa in Moses le Aaron hnenah,
2 a hnuailam ih daan pawl Israel mi hnenih pe dingah thu a pe: Raitluan mi le hna a òuan hrih lomi cawla sen rak keng hai sehla,
3 puithiam Eleazar hnenah pe hai seh. Riahhmun lengah an suahpi pei ih Eleazar hmaiah an that pei.
4 Cule Eleazar in a thisen hrekkhat cu a lak pei ih Puanthlam hmailam ahcun a mehtok in vei sarih tiang a theh pei.
5 A sa zate in a vun le a tit, a thisen le a sungril pawl thawn puithiam hmuh hngan rori ahcun ur thluh a si pei.
6 Cule puithiam in sidar thing, hissop thingòek le puan sen a lak pei ih meisa sungah cun a paih pei.
7 Cuih hnuah a hnipuan a sawp pei ih ti a bual òheh hnuah riahhmun ah a kirsal pei. Asinan cuih zanlam tiang cu mithiangfai lo a si ding.
8 Caw a thattu pa khalin a hnipuan a sawp pei ih ti a bual pei. Asinan cuih zanlam tiang cu mithiangfai lo a si ve pei.
9 Cun a thianghlim pa pakhat in caw senih vutcam cu a lak pei ih riahhmun leng hmun thiangfai ah a ret pei. Cumi cu Israel mi pawl in thianfainak hrangih tidai an hman tikah cuih tidai thianfaiternak ah an hmang pei. Cumi cu sual thianfainak hrangih urmi a si.Ref 19:9 Heb 9:13;
10 Cuih vutcam a latu cun a hnipuan a sawp pei. Asinan cuih zanlam tiang cu mithiangfai lo a si pei. Hi daan cu Israel mi siseh, an lakih ummi ramdangmi siseh, kumkhua in an thlun dingmi a si.
Miruak An Tham Tikah
11 Miruak a daitu cu ni sarih sung mithiangfai lo a si pei.
12 Thianfaiternak tidai in ni thumnak ni le ni sarihnak ni ah a thianfai aw dingih cuticun mithiangfai ah a cang ding. Asinan ni thumnak ni le ni sarihnak ni ah a thiangfai awter lo a si ahcun mi thiangfai lo a si pei.
13 Miruak a daitu cu thianfainak tidai a toih awk lo ahcun mithiangfai lo a si ringring. Bawipa ih Thukam retnak Puanthlam a borhhlawhter ruangah Bawipa ih minung lakah siar cih a si nawn lo pei.
14 Mi pakhatkhat a deuthlam sungih a thih ahcun a thih lai ih a deuthlam sungih a ummi siseh, a leng ihsin a rung lutmi siseh, ni sarih sung cu mithiangfai lo an si pei.
15 Sin a nei lomi palang le beel khal an thiangfai ve lo a si.
16 Cubangtuk òhiamòhiam in riahhmun lengah mi pakhatkhat hriamhma in siseh, mahte thih in siseh, a thi ih cuih ruak a thamtu cu ni sarih sung mithiangfai lo a si pei. Milai ruh siseh, milai thlan siseh, a thamtu cu ni sarih sung mithiangfai lo a si pei.
17 Hibangtuk ih thianfai lonak a um tikah sual thianfainak dingih urmi caw senih vutcam an lak pei ih beel sungih an ret hnuah tidai fai an burh pei.
18 A hmaisa ah a thiangfaimi mi pakhat in hissop thing òek pakhat la tahrat in cuih tidai sungah a hnim pei ih deuthlam le a sungih ummi thilri hmuahhmuah le minung pawl a theh thluh pei. A neta ah a thiangfaimi midang pakhat in tidai cu a lak pei ih miruh le miruak le thlan a thamtu cu a theh pei.
19 Cun a thiangfaimi mi pakhatkhat in ni thumnak ni le ni sarihnak ni ah cuih tidai cun mithiangfai lo cu a theh pei. Ni sarihnak ni ahcun cupa cu a thianfaiter dingih a hnipuan a sawp hnuah ti a kholh aw pei ih zanlam nitla ah mithiangfai a cang pei.
20 Mi pakhatkhat mithiangfai lo a si ih thianfainak tidai in a kholh awk lo ahcun thianfaitermi a si lo ruangah mithiangfai lo ringring a si. Cubangtuk mi cu Bawipa ih Puanthlam a borhhlawhter ruangah Pathian ih minung lakah siar cih ding a si nawn lo pei.
21 Hi daan cu a kumkhua ih nan thlun dingmi a si. Cule thianfainak tidai a thehtu khalin a hnipuan a sawp thluh pei. Hi tidai a thamtu cu zanlam tiang mithiangfai lo a si pei.
22 Ziang khal mithiangfai lo ih tham mi pohpoh cu a thiangfai lo pei ih zokhal cumi a thamtu pohpoh cu zanlam tiang mithiangfai lo a si pei.