18
Puithiam Le Levi Pawl Òuanvo
1 Bawipa in Aaron hnenah, “Ka umnak Puanthlam sungih hna thiang nan òuannak nan mawh man cu nangmah le na fapa pawl le na phunpi Levi pawl in nan tuar ding. Asinan puithiam nan òuannak ih nan mawh man cu nangmah le na fapa pawl lawngin nan tuar ding.
2 Nangmah le na fapa pawl in Puanthlam sungih hna nan òuan tikah nangmah thawn òuan tlang dingah le a lo bawmtu dingah Levi hrin na sungkhat pawl cu lutter ve aw.
3 Nangmah hnenih an neihmi òuanvo siseh, Puanthlam hrangih an neihmi òuanvo siseh, an òuan suak pei. Sikhalsehla Hmun Thianghlim le biakòheng ih thilri thiang pawl cu an dai hrimhrim lo pei. An dai asile anmah siseh, nanmah siseh, nan thi ding.
4 Nangmah ih hnenah hna an òuan pei ih Puanthlam sungih an òuanvo hmuahhmuah cu an òuansuak thluh pei. Asinan hnaòuan dingih a tlak lomi cu nan hnenah an tel lo pei.
5 Israel mi pawl parih ka thinhennak a thlensal lonak dingah nangmah le na fapa pawl lawnglawng in Hmun Thianghlim le biakòheng ih hnaòuan ding pawl cu òuanvo lak in nan òuansuak pei.
6 Israel mi pawl sung ihsin nan hrangih laksawng ah nan sungkhat Levi mi pawl a lo hril saktu cu keimah ka si. Anmah tla cu Puanthlam sungih hnaòuan an òuansuak theinak dingah ka hnenih hlanmi an si.
7 Sikhalsehla nangmah le na fapa pawl lawnglawng in biakòheng le Hmun Thianghlim Bik sungih puithiam hnaòuan pawl cu nan òuansuak pei. Puithiam hnaòuan cu laksawng ah ka lo pek zo hai ruangah nan òuanvo a si. Hi hnaòuan òuan dingih a tlak lomi pawl cu thilri thianghlim kiangih an rat asile thah an si ding,” tiah a ti.
Puithiam Pawl Ih Covo
8 Bawipa in Aaron hnenah, “Zoh hnik, mei-ur thawinak pekmi siar lo a dang laksawng ka hnenih an pekmi hmuahhmuah cu nangmah ka lo pe a si. Hi laksawng pawl cu nangmah le na fapa pawl hrangah kumkhua ih nan co dingah ka lo pe a si.
9 Biakòheng ih mei-ur thawinak ah ur lomi laksawng thianghlim cu a tanglam pawl hi an si: Thlairawl thawinak, sualthlah thawinak, le mawhnak thawinak an si. Ka hnenih in pekmi, hi thawinak thianghlim pawl cu a zate in nangmah le na fapa pawl ih covo an si ding.
10 Hi thawinak thianghlim pawl cu hmun thianghlim ah na ei pei; mipa dang khalin an ei thei pei. Nan hrangah a thianghlimmi an si.
11 “Cuih tlunah Israel mi pawl in a hleice ih an pekmi laksawng khal na ta an si ding. Nangmah le na fapa le na fanu pawl hrangah sanmureng tiang nan covo dingah ka lo pe a si. Nan innsang sungih mithiangfai pawl hmuahhmuah in an ei thei ding.
12 “Israel mi pawl in kumtin an neih hmaisabik lakih a òha bik fang, sabit le olif siti pawl in pekmi cu nangmah ka lo pek.
13 A zate in nangmah ih ta an si pei. Na innsang sungih mithiangfai pawl hmuahhmuah in an ei thei ding.
14 “Israel mi pawl in ka hnenah in pekmi hmuahhmuah cu na ta an si.Ref 18:14 Pui 27:28;
15 “Ka hnenih an pekmi minung siseh, òilva siseh, fatir hmuahhmuah cu na ta an si ding. Asinan milai fatir siseh, òilva fatir raitluan lomi siseh, an tlensal tikah a tlennak paisa cu na sang pei.
16 Naute cu a tlennak man an khiah bangtukin ngun tangka fang nga in thla khat a kim tikah an tlensal pei.
17 Sikhalsehla òilva fatir: Caw le tuu le me pawl cu tlensal ding an si lo. A pum in keimah ih ta an si ih thawinak ah pek ding an si. An thisen cu biakòheng kapah na theh pei ih an thau pawl cu thawinak pekmi rawlhun thawinak le rimthaw ah meisa in na ur pei.
18 A sa pawl, a ir le a vorhlam cawn cu a hleice ih pekmi na covo an si.
19 “Israel mi pawl in ka hnenih an pekmi, a hleicemi laksawng pawl cu kumkhua in nangmah le na fapa le na fanu pawl hrangah ka lo pe a si. Himi cu siatbal thei lomi thukamnak nangmah le na tesinfa pawl hnenih ka tuahmi a si,” a ti.
20 Bawipa in Aaron hnenah, “Co theihmi rothil na la lo pei ih Israel ram sungah leiram comi khal na nei lo pei. Ziangahtile Bawipa keimah hi na ro le na covo ka si,” tiah a ti.
Levi Mi Pawl Ih Covo
21 Bawipa in, “Israel mi pawl in ka hnenih òhenhra òhenkhat an pekmi hmuahhmuah cu Levi mi pawl hnenah ka pek zo. Himi cu ka umnak Puanthlam an kilkhawi ih a sungih hna an òuan ruangah pekmi a si.Ref 18:21 Pui 27:30-33; Daan 14:22-29;
22 Israel mi zohman in Puanthlam cu an naih lo pei. An naih asile an sualman ah thih an tuar ding.
23 Atu thokin Levi mi lawnglawng in Puanthlam cu an kilveng pei ih thil an tisual a si ahcun anmah in an tuar pei. Hi daan cu na tesinfa pawl khalin an thlun dingmi a si. Levi mi pawl in Israel mi lakah kumkhua ih comi rothil an nei lo pei.
24 Ziangahtile Israel mi pawl ih in pekmi òhenhra òhenkhat cu an co dingah ka pe zo a si. Cuti a si ruangah Israel ram sungah kumkhua ih comi rothil nan nei lo pei, tiah ka tinak a si,” a ti.
Levi Mi Pawl Pekmi Òhenhra Òhenkhat
25 Bawipa in Moses hnenah,
26 Levi mi pawl hitiih sim dingah thu a pe, “ Bawipa ih hnenah an pekmi òhenhra òhenkhat Israel mi hnen ihsin nan ngah tikah, cuih nan ngahmi sungin òhenhra ih òhenkhat cu a hleice ih pekmi laksawng a si ih Bawipa ih hnenah nan hlan pei.
27 Hi laksawng cu lothlo pawl ih fang thar le sabit thar an pekmi tluk ah ruat ding a si pei.
28 Cubangtuk in Israel mi hnen ihsin nan ngahmi òhenhra òhenkhat hmuahhmuah sung ihsin Bawipa ih hnenah òhenhra òhenkhat nan pek pei. Nan ngahmi hmuahhmuah sungin Bawipa ih hnenah nan pek dingmi cu puithiam Aaron hnenah nan pek pei.
29 Nan ngahmi sungih a òha bik miangmo nan pek pei.
30 Cutiih a òha bik nan pek hnu ahcun a tangmi cu nan ta a si pei ih nan fang cilnak le nan sabit rialnak ih suak vemi tluk ah siar a si pei.
31 Puanthlam sung nan hnaòuan hlawhman a si ruangah nanmah le nan innsang pawl in nan duhnaknak hmunah nan ei pei.
32 Nan neihmi lakih a òha bikmi Bawipa nan pek ahcun nan ei tikah mawhthluknak nan tong lo ding. Cun Israel mi pawl ih pekmi laksawng thianghlim a òha bikmi Bawipa ih hnenah pek hlanah ei tahrat in borhhlawhter hlah uh; nan borhhlawhter asile nan thi ding a si,” a ti.