24
Biakinn Siatnak Ding Thu
(Mar 13:1-2; Luk 21:5-6)
1 Jesuh cu a tho ih Biakinn ihsin a feh lai ah a dungthluntu pawl a hnenah an ra ih Biakinn an rak sak daan a mak zia kha an relpi.
2 Jesuh in, “A si, hi pawl hi zoh hnik uh. Fiang tein ka lo sim: Hi lungto pakhat hman hi a umnak keel ah a um nawn lo ding; a zate in balthlak òheh an si ding,” tiah a ti.
Harsatnak Le Hremnak Thu
(Mar 13:3-13; Luk 21:7-19)
3 Jesuh cu Olif tlang parih a to lai ah a dungthluntu pawl a thup tein a hnenah an ra ih, “Hi thil hi ziangtikah so a can ding? Cun na rat salnak caan le san cemnak langtertu ziang thil so a um ding, in sim hnik?” tiah an sut.
4 Jesuh in, “Ralring uh, zohman in lo bum hlah hai seh.
5 Mi tampi ka hmin in an ra dingih, ‘Keimah hi Messiah cu ka si,’ tiah an ti dingih mi tampi an bum ding.
6 Lam naite ah siseh, lam hlapi ah siseh, raldonak thawmvang nan thei ding, asinain va phang hlah uh. Cubangtuk thil cu a um ding, asinain a netnak a thleng tinak a si hrih lo.
7 Ramkhat le ramkhat, pengkhat le pengkhat an do aw ding. Leilungtlun hmun kipah paam le linghnin a um ding.
8 Cubangtuk thil pawl cu nauhrin nat thok bangtuk a si.
9 “Cun an lo kai dingih hrem ding le thah dingah mi kut ah an lo thlen ding. Keimah ruangah miphun kip in an lo hua ding.Ref 24.9 Mat 10:22;
10 Cutikah mi tampi in an zumnak an bansan ding. Pakhat le pakhat an zuar aw dingih an hua aw ding.
11 Cule profet deu tampi an suak dingih mi tampi an bum ding.
12 Sualnak a karh dingih mi tampi ih duhdawtnak cu a òumsuk ding.
13 Sikhalsehla a netnak tiang a dinghnget theitu cu rundam a si ding.Ref 24.13 Mat 10:22;
14 Cun miphun hmuahhmuah ih theih òheh dingah hi vancung Uknak Thuthangòha hi leilungtlun khuazakip ah phuan a si ding. Cuih hnuah a netnak cu a si ding.
Tuksumza Thil Borhhlawh
(Mar 13:14-23; Luk 21:20-24)
15 “Profet Daniel in a rak sim cia mi, ‘Tuksumza Thil-borhhlawh,’ cu nan hmu ding. Cuih Thil-borhhlawh cu hmun thianghlim ah a ding ding. (Hi ca a siartu: A sim duhmi hi theithiam aw.)Ref 24.15 Dan 9:27; 11:31; 12:11;
16 Cule Judea ram ih a ummi pawl cu tlang parah tlan hai seh.
17 A inn parih a ummi cu innsung thilri lak dingah òum hlah seh.
18 Lo ih a ummi pa cu a puan lak dingah kir hlah seh.Ref 24.18 Luk 17:31;
19 Cuih caan le cuih ni ah nunau favun le naukai neimi nunau pawl hrangah ziangtlukin so a har ding.
20 Thlatang caan le Sabbath ni ngelcel ih thinphang in nan tlan ciamco lonak dingah Pathian hnenah thlacam uh!
21 Ziangahtile leilung hramthok ihsin tuih ni tiang a thlengmi òihnungza harsatnak hnakin a òihnung sawnmi a thleng dingih cuvek òihnung zet harsatnak cu tuih hnu khalah a thleng nawn lo ding.Ref 24.21 Dan 12:1; Thup 7:14;
22 Cuih tikcu caan cu Pathian in tawiter lo in rak um sehla zohman an luat lo ding. Asinan Pathian in a hrilmi pawl hrangah a caan cu a tawiter ding.
23 “Cule mi pakhatkhat in, ‘Zoh uh, hinah Messiah a um,’ asilole ‘Khinah a um,’ tiah an lo ti le va zum hlah uh.
24 Ziangahtile Messiah deu le profet deu pawl an suak dingih khawruahhar le hmuhsaknak mak ngaingai an tuah dingih a cang thei tawkin Pathian ih hrilciami pawl hman an bum ding.
25 Ciing ringring uh! A hlankhan in ka lo sim cia a si.
26 “Mi in, ‘Zoh uh, ramòhing ah a um,’ tiah an lo ti a si ahcun va feh hlah uh. ‘Hitawkah hin a thup aw,’ an ti khalle va zum hlah uh.Ref 24.26-27 Luk 17:23-24;
27 Ziangahtile nisuahnak ihsin ni tlaknak tiang hmakhat ih a tleu zukzomi nimthlakau vekin Milai Fapa cu a ra ding a si.
28 “Miruak umnak kipah langta an khawm aw ding.Ref 24.28 Luk .17:37;
Milai Fapa Ratnak Ding
(Mar 13:24-27; Luk 21:25-28)
29 “Cuih harsat caan a cem hnu ahcun ni a thim ding, thlapi a vang nawn lo ding, van ihsin arsi pawl an tla dingih van ih a ummi cahnak huham pawl cu an fehnak lamzin ihsin an pial ding.Ref 24.29 Isa 13:10; 34:4; Ezk 32:7; Joe 2:10; 31; 3:15; Thup 6:12-13;
30 Cutikah Milai Fapa rat ding theihthiamnak van ah a lang ding; Milai Fapa cu vancung mero parin cahnak huham le sunlawinak tumpi thawn a rat kha an hmu dingih leilungtlun miphun zakip an òap ding.Ref 24.30 Dan 7:13; Zek 12:10-14; Thup 1:7;
31 A ring zetmi tawtawrawt an tum dingih leilung kil li ah a vancungmi pawl a thlah ding; vanhram khatlam deng ihsin khatlam deng tiangih ummi hrilciami pawl a finkhawm ding.
Theipi Kung Ihsin Zirnak
(Mar 13:28-31; Luk 21:29-33)
32 “Theipi kung thuhla in fim lo zirh seh. Theipi cu a hnge pawl an hung hring ih a hnah no tete tla an hung cerh tikah òhal tikcu a nai a si, ti nan thei.
33 Cuvekin hi thil hmuahhmuah nan hmuh tikah a tikcu a naizet thlang ih a thleng cing ding ti nan thei pei.
34 Ciing òha uh: Atu san ih a nunglai mi hmuahhmuah an thih òheh hlanah hi thil hmuahhmuah hi an kim òheh ding.
35 Lei le van cu an cemral ding nain ka òongkam cu a cem dah lo ding.
Zohman In A Tikcu An Thei Lo
(Mar 13:32-37; Luk 17:26-30, 34-36)
36 “Cuih ni le caan cu van ih a ummi vancungmi in siseh, Fapa in siseh, zohman in an thei lo; Pa lawng in a thei.
37 Noah san lai ih thil a cangmi vekin Milai Fapa ratnak caan ahcun a cang ve ding.Ref 24.37 Sem 6:5-8;
38 Tilik a tlun hlanah cun minung pawl cun an ei an in ih nupi an òhi, pasal an nei; Noah lawng sung a lut ni tiang nuam zet in an um.
39 Cutiin tilik in a fen hlo òheh hlan tiang ziang a cang ding ti zohman in an thei lo. Cuvek òhiamòhiam in Milai Fapa a rat tik khalah a si ding.Ref 24.39 Sem 7:6-24;
40 Cuih caan a thlen tikah lo ah mi pahnih hna an òuan dingih pakhat cu lakhlo a si dingih pakhat cu tanta a si ding.
41 Nunau pahnih sum an deng ding; pakhat cu lakhlo a si dingih pakhat cu tanta a si ding.
42 “Curuangah ralring in um uh; ziangahtile ziangtikah nan Bawipa a ra ding ti nan thei lo.
43 Inn neitu pa in fifir a ratnak ding tikcu a theih ahcun it lo in a kil dingih fifir pa cun a inn bauh in a lut thei lo ding, ti cu nan theihmi a si.
44 Curuangah ralring tein um uh, ziangahtile Milai Fapa cu nan rin lo laifangah a ra ding a si.Ref 24.44 Luk 12:39-40;
Hnenum Fel Le Fel Lo
(Luk 12:41-48)
45 “Cuti asile zo bik so rin tlak le a fimmi hnenum cu a si ding? Rin tlak le a fimmi hnenum cu a bawipa in hnenum dang pawl hotu ah òuanvo a pek ih a tikcu hmantein hnenum dang pawl rawl a pe theitu pa kha a si ding.
46 Òhateih a hna a òuan rero laifangah a bawipa a rakir a si ahcun ziangtlukin so cuih hnenumpa cu a lung a awi ding?
47 Thungai in ka lo sim: Cuih hnenumpa cu a bawipa in a thilri hmuahhmuah kilkhawitu ah a ret ding.
48 Sikhalsehla hnenum fel lomi a si ahcun, ka bawipa cu a ra tlung hrih lo ding, a rei lai paam ding tiah a ti dingih
49 hnenum dang pawl kha a hmuhsuam, a thawi pei ih zuri pawl thawn ei le in, in an um ding.
50 Cule a bawipa cu a rin lo ni le a theih lo caan ah ruah lopi in a rakir ding.
51 A bawipa in cupa cu a dawi dingih mititeraw pawl umnak hmunah a kuat ding; cutawkah òap-ai in a hacang a rial ding a si,” tiah a ti.