5
Jesuh In Khawsia Ih Polhmipa A Damter
(Mat 8:28-34; Luk 8:26-39)
1 Jesuh le a dungthluntu pawl cu Galilee Tili khatlam ral Gerasene peng ah an va thleng.
2 Jesuh cu lawng sung ihsin a suah ve tein cutawkah thlaan lungkua sungih a ummi pa a ra suak ih Jesuh a ra tong. Cupa cu khawsia ih polhmi a si ih,
3 thlaan lakih a ummi a si. Zohman ih hreen thei lomi pa a si.
4 Vei tampi thir cikcin rori in a kutke an òem òheu nain an òem tin tein thirhri cu a ticat ih a ke òemnak thirhri tla cu a botcat òheh, zohman a kaihrem theitu an um lo.
5 A sun a zan in thlan lak le tlang lakah a vak ih a au phahphah ih amah le amah lungto in a sun, a at aw phah òheu.
6 Hla nawn ihsin Jesuh cu a hei hmu; a va tlan ih a hmaiah a khuk a bil ih,
7 a aw neih patawp in, “Maw Jesuh, Cungnungbik Pathian ih Fapa! Nang le kei ziangso kan seng aw? Pathian hmin in ka lo dil, i hrem hramhram hlah aw!” tiah a au ciamco.
8 Hibangtuk ih a aunak cu Jesuh in, “Thlarau siava, hi pa sung ihsin suak aw,” a rak ti ruangah a si.
9 Cule Jesuh in, “Na hmin zoso a si?” tiah a sut. Cupa cun, “Ka hmin cu ‘Burpi,’d ‘Burpi,’ ti mi cu ‘Legion,’ timi Latin òong ih lehmi a si ih ‘Tampi,’ tinak a si. Rom ralkap burkhat ah ralkap thawngruk tluk an um. a si, ziangahtile kan tam ngaingai a si,” tiah a let.
10 Cupa cun thlarau siava pawl cu cuih ram ihsin dawihlo lo dingah Jesuh cu a dil ciamco.
11 Cutawk kiangkap tlangmual ah vokrual tampi an tlang.
12 Thlarau siava pawl cun Jesuh cu, “Vok hnenah in thlah awla an sungah in lutter hram aw,” tiah an dil.
13 A dil vekin a fehter hai ih thlarau siava pawl cu cupa sung ihsin an suak ih vok sungah cun an lut. Cule vokrual cu thawnghnih hrawng an si ih khamhraap ihsin an vung dawp ciammam ih tili sungah an tla that òheh.
14 Vok khaaltu pawl cu an tlan ih cuih thuhla cu khuasung ah le lo lakah an sim ciamco. Mipi pawl cu thil cangmi zoh dingah an va feh.
15 Jesuh hnenih an thlen tikah khawsia ‘Burpi,’ ih a rak polhmipa khal an va hmu. Cutawkah cun a to ih hnipuan hruk in le lungfim in an va hmu. Curuangah an thin a phang ngaingai.
16 Cuih thil a hmutu pawl in khawsia polhmipa le vokrual parah ziang vek thil a cang ti kha mipi pawl an sim.
17 Cule an ram tlansan dingah Jesuh cu an dil ciamco.
18 Jesuh cu lawng sungih a luh zawng ah khawsia ih rak polh dahmi pa cun, “Na hnenah ka feh ve pei,” tiah a dil.
19 Asinan Jesuh in a duh lo. “Na inn ah va tlung sawn awla na sungte pawl hnenah Bawipa ih a lo tuah sakmi le a lo zangfahnak thuhla pawl cu va sim aw,” tiah a ti.
20 Cuticun cupa cu Dekhapolis ramsung hmuahhmuah ah a feh ih Jesuh ih a tuah sakmi thuhla cu a sim. Cuih thu a theitu hmuahhmuah cu an mang a bang òheh.
Jairas Fanu Le Jesuh Puanfem A Thamtu Nunau
(Mat 9:18-26; Luk 8:40-56)
21 Jesuh cu Tili khatlam ralah a va fehsal. Cutawk Tilikap ahcun mi tampi Jesuh kiangkap ah an khawm aw.
22 Sinakok uktu pakhat a simi Jairas cu a ra ih Jesuh a hmuh tikah a kehram ah a bok ih zangfahnak a dil.
23 “Ka fanute besia zet in a na. Ra hram awla a parah na kut ra suang aw, cule a dam dingih a nung ding a si,” tiah a dil.
24 Cule Jesuh cu Jairas hnenah feh dingin a pok. Mitampi in Jesuh an thlun ruangah a kilkip in an run eng cupco.
25 Mitampi lakah cun thidok nat in kum hleihnih a na zomi nunau pakhat a um.
26 Sibawi tampi in an tuah zo nain a dam cuang lo. A neihmi tangka hmuahhmuah a hmang zo nain a òha lam si lo in a besia deuhdeuh.
27 Cunu cun Jesuh thu a rak thei ih miburpi lakin Jesuh dunglam in a ra.
28 “A puan ka tham thei ahcun ka dam ko ding,” tiah a ruat.
29 Curuangah Jesuh puan cu a tham. Cutiih a tham ve tein a thisuak cu a reh ih ka natnak ihsin ka dam zo ti kha a thei.
30 Jesuh in a sung ihsin a huham a suah kha a thei lohli ih miburpi lamah her in, “Zoso ka puan a tham?” tiah a sut.
31 A dungthlun pawl in, “Miburpi in an lo nor cupco hi na hmu ko. Ziangtinso ‘Zoso ka puan a tham?’ na ti,” tiah an ti.
32 Sikhalsehla Jesuh cun ka puan a thamtu cu zo bik so a si, tiah a zoh rero.
33 Cutiih thil a cangmi cu nunaunu in a theih tikah òih le òhia phahin a ra ih Jesuh kehram ah a khuk a bil ih thudik kha a sim.
34 Jesuh in a hnenah, “Ka fanu, na zumnak in a lo damter zo. Dai tein va feh aw, na natnak cu damta seh,” tiah a ti.
35 Jesuh cutiih a òong rero lai ahcun Jairas inn ihsin thlahmi zualko an ra thleng ih Jairas cu, “Na fanu a thi zo. Ziangahso Sayapa cu na hnaihnok duh nawn rero,” tiah an ti.
36 Jesuh in cuih thu an simmi cu zianghman ah a siar lo ih Jairas hnen ahcun, “Zianghman phang hlah, a zum lawng zum aw,” tiah a ti.
37 Cule Jesuh in Piter le Jeim le a nau Johan siar lo zohman amah a thlunter siang nawn lo.
38 Jairas inn cu an va thleng ih òaprak le hnok celcel ih an um kha Jesuh in a hmu.
39 An hnenah a vung lut ih, “Ziangahso hnok celcel ih nan um? Ziangahso nan òah nan raak! Hi nauhaknu hi a thih ual lo; a itthat a si,” tiah a ti.
40 Annih in Jesuh cu an hnihsan men. Curuangah an zate in khualeng ah a suahter òheh. Nauhaknu ih nu le pa le a dungthlun pathum cu a ko ih nauhaknu an retnak khaan sungah cun an vung lut.
41 Nauhaknu cu a kut in a vun kai ih, “Talitha koumi,” tiah a ti. Cumi cu, “Nute tho aw ka lo ti,” tican a si.
42 Hmakhat teah nauhaknu cu a tho ih a feh thei. (Amah cu kum hleihnih mi a si.) Cumi an hmuh tikah an mang a bangtuk lawmmam.
43 Sikhalsehla Jesuh in zohman sim lo dingin thu a pe ih, “Ei ding ziangmaw tal pek uh,” tiah a ti.