3
Kut Zengpa
(Mat 12:9-14; Luk 6:6-11)
1 Cule Jesuh cu sinakok ah a va fehsal ih cutawkah kut zengpa pakhat a rak um.
2 Jesuh kha sualpuh a duhtu pawl tla an rak um ih curuangah Sabbath ni ah a damter ding maw damter lo ding tiah òha tein an zoh.
3 Jesuh in cupa cu, “Hmailam ahhin ra suak hnik,” tiah a ti.
4 Cule mipi cu, “Kan Daan in Sabbath ni ah ziang tuah ding so in on? Mi bawm ding maw harsatnak pek ding so? Mi nunnak runsuah ding maw siatsuah ding so?” tiah a sut.
Asinan annih cu kam khat hman an òong lo.
5 Jesuh cun a thinheng in a zoh vivo hai ih an thinlung a ruh zia kha a hmuh tikah a riah a sia zet fawn. Cule mi pa cu, “Na baan hawi aw,” a ti. A baan cu a hawi ih a dam ngaingai.
6 Cutikah Farasi mi pawl cu sinakok ihsin an suak ih Herod ih milai pawl thawn Jesuh thah theinak dingah thu an ruatkhawm.
Tili Kap Ah Miburpi In An Pan
7 Jesuh le a dungthluntu pawl cu Galilee Tili ah an va feh; miburpi in Jesuh cu an thlun. Anmah tla cu Galilee peng, Judea peng,
8 Jerusalem khua, Idumea peng, Jordan tiva ihsin nisuahnak lam ram, Tai ar le Sidon kiangkap ram pawl tiang in a rami an si. Jesuh ih thil tuahmi pawl an theih ruangih a rami an si.
9 Milai an tam tuk lawmmam ih in cil ciamco pang ding ti a phan ruangah dungthluntu pawl kha lawng pakhat timtuah cia in a retter.Ref 3.9-10 Mar 4:1; Luk 5:1-3;
10 Mi tampi a damter ih mina hmuahhmuah in an tham ngah theinak dingah an nor ciamco.
11 Cun khawsia polhmi pawl in an hmuh tikah a hmaiah an bok ih, “Nangmah cu Pathian Fapa na si,” tiah an au ciamco.
12 Jesuh in cuih khawsia polhmi pawl cu amah kha zo a si, ti an rel lonak dingah thu a pek.
Jesuh In Dungthlun Hleihnih A Hril
(Mat 10:1-4; Luk 6:12-16)
13 Cule Jesuh cu tlang parah a hung kai ih a hnenah a mi duhmi pawl a ko. A hnen ahcun an ra ih,
14 minung hleihnih a hril ih ‘Tirhthlah pawl,’ tiah a ko. “Ka hnenih um dingah ka lo hril. Cule thusim dingah ka lo thlah dingih,
15 khawsia dawihlo theinak thu tla nan nei ding,” tiah a ti.
16 Hleihnih a hrilmi pawl cu hihi an si. Simon (Piter tiih hmin a pekmi),
17 Zebedi ih fapa Jeim le a naupa Johan (Jesuh in Boanerges tiah hmin a pek hai, a tican cu ‘Khuari Fa,’ tinak a si),
18 Andru, Filip, Bartholomeo, Matthai, Thomas, Alfias ih fapa Jeim, Thaddaeus, Phunòan Simon, le
19 Jesuh a zuartu Judas Iskariot tla an si.
Jesuh Le Beelzebul
(Mat 12:22-32; Luk 11:14-23; 12:10)
20 Cule Jesuh cu inn ah a tlung. A hmaisa vek thotho in mi tam ngaingai an ra ih Jesuh le a dungthluntu pawl cu rawl ei caan hman an nei lo.
21 Cuih thu cu a sungte pawl in an theih tikah, “Jesuh cu a aa zo,” tiah mi in an ti fawn ruangah amah kilkhawi dingin an feh.
22 Jerusalem ihsin a rami Daanthiam hrekkhat pawl in Jesuh cu “Beelzebul in a kai zo a si. Khawsia uktu bawi ih huham in khawsia pawl a dawi thei a si,” tiah an ti.Ref 3.22 Mat 9:34; 10:25;
23 Curuangah Jesuh cun a ko hai ih an hnenah tahòhimnak thawn thu a sim. “Ziangtinso Satan in Satan lala cu a dawi thei ding?
24 Ram pakhatkhat cu òhen tampi ah a òhen aw ih anmah le anmah an do awk ahcun cuih ram cu an òekdarh ding.
25 Innsang pakhat sungah pakhat le pakhat an to aw ih an thawi awk a si ahcun cuih innsang cu an òekdarh ding.
26 Cubangtuk in Satan in Satan lala a dawisuak a si ahcun an òhenòhek awk ruangah an ram cu rei a awh lo dingih a cemral ding a si.
27 “Micak pa cu amah an òem hmaisa lo ahcun zohman in a inn bauh tahrat in a thilri an lak sak thei lo ding.
28 “Thungaite in ka lo sim: Minung hi ziangvek in an sual ih òong siava tiang an òong hmanah ngaihthiam an si ding.
29 Sikhalsehla Thlarau Thianghlim a thangsiattu cu ngaidam a si lo ding, ziangahtile kumkhua daih sualnak a tuah a si,” tiah a ti.Ref 3.29 Luk .12:10;
30 Jesuh kha “Khawsia a sungah a lut,” tiah an ti ruangah Jesuh in hitiih a òongnak hi a si.
Jesuh Nu Le A Naule Pawl
(Mat 12:46-50; Luk 8:19-21)
31 Cule Jesuh ih nu le a naule pawl an ra. Inn lengah an ding ih inn sungah mi an vun tirh.
32 A kiangah mi tampi an rak to ih annih in, “Zoh hnik, na nu le na naupa pawl le na farnu pawl leng ah an um, nangmah an lo poi,” tiah an ti.
33 Jesuh in, “Zoso ka nu cu a si? Ka naule tla cu zoso an si?” a ti.
34 A kiangkap ih a totu mipi pawl khi zoh phahin, “Hinah ka nu le ka naule tla cu an um ko a si.
35 Zokhal sisehla Pathian duhnak a tuahtu hmuahhmuah cu ka unau, ka farnu le ka nu an si,” tiah a ti.