PUITHIAM HNAÒUANNAK
(Leviticus)
Thuhmaihruai
Puithiam Hnaòuan (Leviticus) cabu sungah hlanlai Israel pawl, Pathian an biak tikih an thlun ding daan le biaknak puai tuah tikih thlun ding daan tla, a cuih zirhawknak bangtukih òuansuaktu dingah puithiam pawl ih thlun ding daan tla a um.
Hi cabu ih tumtah bikmi thu cu Pathian ih thianhlimnak le a miphun pawl thawn, “Israel pawl ih Pathian thianghlim,” tiih an pehtlaih awknak a nun thei ringringnak ding le a miphun pawl ih amah an biakdan ding lamzin tla a si.
Hi cabu sungah mi ih theih tam bikmi thu cu bung 19:18 sungih ta Jesuh ih a pahnihnak thukham tum bik, “Nangmah le nangmah na duhdawt bangin na innhnen na duhdaw pei,” timi thu hi a si.
1
A Pum Ih Mei-ur Thawinak
1 Bawipa in Moses cu Bawipa ih umnak Puanthlam ihsin a ko ih,
2 Israel mi pawl in Pathian hnenih thawinak an pek tikih thlun dingah a hnuailam daan pawl cu a pek.
Zokhal Bawipa ih hnenah thawinak a pek asile a cawrual sung ihsin, asilole a tuu le a merual sung ihsin a si pei.
3 A cawrual sung ihsin mei-ur thawinak a pek ahcun raitluanmi cawcang a si pei. Bawipa ih cohlanmi a sinak dingah a cawcang cu Bawipa ih umnak Puanthlam sangka ah a rak keng ding.
4 Cule a cawcang ih lu parah a kut a suang pei; cumi cu Bawipa in sual ngaithiamnak raithawi ah a cohlan sak ding.
5 Cutawkah a cawcang cu a that pei ih Aaron fapa puithiam pawl in cawcang ih thisen cu Bawipa ih hnenah an pek hnuah Puanthlam sangka ih a ummi biakòheng ih kap li ahcun an theh pei.
6 Cun a cawcang cu a vun a hawk pei ih a sa a can thluh pei.
7 Aaron fapa puithiam pawl in biakòheng parah cun zanthing an ret pei ih meisa an muah pei.
8 Cule can cia mi sa cu a lu le a thau pawl thawn meisa parah an ret pei.
9 Amah in a sungril pawl le a dunglam ke pawl cu a kholh pei ih puithiam in sa cu biakòheng parah a zate in a ur thluh pei. Himi cu Bawipa ih hrangah a rim a thaw mi mei-ur thawinak a si.
10 Zokhal a tuurual sungin, asilole a merual sungin thawinak a pek asile, raitluanmi tuucang, asilole mecang a si pei.
11 Biakòheng ihsin saklam kapah a òilva cu a that pei ih a thisen cu biakòheng ih kap li ah puithiam pawl in an theh pei.
12 Cule a sa cu a can òheh hnuah puithiam in a zate in a lu le a thau thawn meisa parah a ret pei.
13 Amah in a sungril le a dunglam ke pawl a kholh pei ih puithiam in thawinak sa cu Bawipa ih hnenah a pek pei ih biakòheng parah cun a zate in a ur pei. Himi cu Bawipa ih hrangah a rim a thaw mi mei-ur thawinak a si.
14 Mi pakhat in vate cu mei-ur thawinak ih a pek asile thuro asilole laileng note a si pei.
15 Puithiam in vate cu biakòheng ah a keng pei ih a hngawng a merhtan pei ih a lu cu biakòheng parah a ur pei. A thisen cu biakòheng ih kap ah kang ko in a thler pei.
16 A cur le a cur sung ummi pawl a lak pei ih vutcam an retnak, biakòheng ihsin nisuahnak lamah a hlon pei.
17 A thla in a kai pei ih a thla pawl cat lo tein a ruangpi cu a bauh pei ih biakòheng parah a ur pei. Cumi cu Bawipa lungawitertu rimthaw thawinak a si.