5
Kawh Hmaisabik Dungthlun Pawl
(Mat 4:18-22; Mar 1:16-20)
1 Veikhat ah Jesuh cu Gennesaret Tilikap ah a ding ih culai ah Pathian thu a simmi ngai duh ah misenpi cun amah naih an cuh aw ciamco.
2 Culai ah Jesuh in titlang ih lawng pahnih an hrenmi kha a hmu. Ngakaitu pawl cu lawng sung ihsin an suak ih an sur pawl an kholh rero.
3 Jesuh cu lawng pakhat deuh sungah a lut; cuih lawng cu Simon ih ta a si; cule lawng cu titlang ihsin a hlatnak deuh ah òhawn dingin a fial. Cuih lawng sungah Jesuh cu a to ih misenpi pawl cu a zirh hai.Ref 5.1-3 Mat 13:1-2; Mar 3;9-10, 4:1;
4 Thusim a òheh tikah Simon hnenah, “Ti thuknak lamah na lawng hi òhawn awla na rualpi pawl thawn nan sur cu vun vorh hnik uh,” tiah a ti.
5 Simon in, “ Bawipa, taima zet in zanvarte kan vorh nain zianghman kan awk lo. Sikhalsehla vorh uh, in ti a si ahcun kan vorh a si pei cu,” tiah a ti.Ref 5.5 Joh 21:3;
6 Sur cu an vun vorh ih nga tam ngaingai an awk ih an sur tiangin a tlek òheh zik.Ref 5.6 Joh 21:6;
7 Cutikah lawng dang ih an rualpi pawl kha, “In ra bawm uh,” tiah an kut an hei zaap. An ra ih an lawng pahnih cu nga khat tein an ret ih an lawng cu a pil zikte.
8 Cumi cu Simon in a hmuh tikah Jesuh ih khuk kiangah a khuk a bilh ih Jesuh hnen ahcun, “ Bawipa, i fehsan hram aw; ziangahtile kei hi misual ka si!” tiah a ti.
9 Amah le a rualpi pawl cu nga tam ngaingai an awh ruangah an mang a bang ngaingai.
10 Cuvek thotho in amah thawn nga a kaitu Zebedi ih fapa Jeim le Johan khal an mang a bang ve. Jesuh in Simon cu, “Na thinphang hlah; atu thokin minung kaitu na si ding,” tiah a ti.
11 An lawng pawl cu ti kapah an dinter ih an thil hmuahhmuah fehsan in Jesuh cu an thlun.
Jesuh In Mipa Pakhat A Damter
(Mat 8:1-4; Mar 1:40-45)
12 Veikhat ah Jesuh cu phaarnat a tuartu pa pakhat ih umnak khua ah a thleng. Cupa cun Jesuh a hmuh tikah a hmaiah a bok ih, “ Bawipa, na duh ahcun i thiangter thei a si,” tiah a dil.
13 Jesuh in a kut in a tham hnuah, “Ka lo thiangter duh, thiang thlang aw,” tiah a ti. Hmakhat teah a natnak cu a dam.
14 Jesuh in, “Zohman va sim hlah, asinain va feh vurvo awla puithiam in lo zoh seh; cule na dam ti kha mi hmuahhmuah ih an lo hmuhnak dingah Moses daan vekin thawinak va pe aw,” tiah a ti.Ref 5.14 Pui 14:1-32;
15 Asinan Jesuh thuhla cu hmun kipah a thang sinsin, mi in an pan sinsin ih a thu simmi an ngai; cule an natnak khal a damter.
16 Cuih hnuah misenpi hnen ihsin feh tahrat in hlimphirnak hmunah amah lawng thla a cam òheu.
Jesuh In Mizengpa A Damter
(Mat 9:1-8; Mar 2:1-12)
17 Nikhat ah Jesuh cu thu a zirh rero lai ah Jerusalem khua le Judea ram le Galilee ram ih khuakip ihsin a rami Farasi le Daanthiam òhenkhat pawl khal an ra to ve. Mina damter theinak Bawipa ih huham cu Jesuh parah a um.
18 Culai ah mizengpa pakhat cu a ihphah thawn laangin an rak zawn ih Jesuh hmaiih vun ret dingah inn sungah luhpi an tum.
19 Sikhalsehla mi an tam tuk ruangah an fehpi theinak ding lamzin a um lo. Curuangah inn parah an kaipi ih diphun an bauh hnuah misenpi lak Jesuh hmai rori ahcun a ihphah thawn an vun thlak.
20 Zumnak an neih zia kha Jesuh in a hmuh tikah mizengpa hnen ahcun, “Ka rual, na sualnak cu ngaithiam a si zo,” tiah a ti.
21 Daanthiam pawl le Farasi pawl cun, “Pathian thangsiatnak hibangtuk a òong theitu milai cu ziangvek milai so a si? Pathian pakhat lawng sual ngaithiam theitu a si,” tiah pakhat le pakhat an ti aw.
22 Jesuh in an ruahmi cu a thei ih an hnenah, “Hibangtuk in ziangahso nan ruah?
23 ‘Na sualnak hi ngaithiam a si zo,’ ti maw, asilole ‘Tho awla feh aw,’ tiso a ol sawn?
24 Mi Fapa hi leilungtlun ahhin sualnak a ngaithiam thei a si, ti nan hnenah ka langter ding,” tiah a ti. Cule mizengpa cu, “Ka lo sim: Tho aw! Na ihphah la awla na inn ah tlung aw,” tiah a ti.
25 Hmakhat teah mizengpa cu mipi hmai ahcun a tho ih a ihphah cu a lak ih Pathian thangòhat phahin a inn ah a tlung.
26 Mipi cu an mang a bang ngaingai! Òih phahin Pathian cu an thangòhat ih, “Ziangbangtuk khawruahharza thil so tuih sun ih kan hmuh mi hi!” tiah an rel ciamco.
Jesuh In Levi A Ko
(Mat 9:9-13; Mar 2:13-17)
27 Cuih hnuah Jesuh cu a feh ih siahkhongtu Levi an timi pa a zung sungih a to kha a hmu. Jesuh in a hnenah, “I thlun aw,” tiah a ti.
28 Levi cu a tho ih ziang hmuahhmuah tanta in Jesuh cu a thlun.
29 Cule Levi in a inn ah rawl einak puai tumpi Jesuh hrangah a tuah ih a sawmmi pawl lakah cun siahkhongtu pawl le midang tampi an tel.
30 Farasi mi òhenkhat le Daanthiam òhenkhat anmah ih bu sungtel pawl cu Jesuh dungthluntu pawl hnenah an phunzai. “Ziangahso siahkhongtu le misual tla thawn rawl nan ei ih ti nan in tlang?” tiah an sut.Ref 5.30 Luk 15:1-2;
31 Jesuh in, “A harhdammi pawl in sibawi an òul lo, a nami pawl lawngin an òul.
32 Miding pawl ko dingah ka ra lo; misual pawl an sual sir awter dingah ka ra a si,” tiah a ti.
Rawl Ulh Thu
(Mat 9:14-17; Mar 2:18-22)
33 Mi òhenkhat in Jesuh hnenah, “Johan dungthluntu pawl cu rawl an ul òheu ih thla khal an cam òheu; cule Farasi pawl ih dungthluntu pawl tla in cuvekin an tuah ve òheu. Asinan na dungthluntu pawl cu an duhduh in an in an ei,” tiah an ti.
34 Jesuh in, “Mopuai a ra zawhtu pawl cu mopa an hnenih a um sungah rawl lo in an um ding maw?” tiah a sut. “An um lo ding!
35 Sikhalsehla mopa an hnen ihsin laak a si caan a ra thleng dingih cutikah rawl cu an ul leh ding,” tiah a ti.
36 Cuih hnuah Jesuh in an hnenah hitiin thuòhimnak a sim, “Zohman in hnipuan hlun belhnak dingah hnipuan thar an thlek dah keel lo. An thlek a si ahcun hnipuan thar cu a tlek laklawh dingih hnipuan hlunih an belh tikah a kaih aw fawn lo ding.
37 Cule zohman in sabitti thar cu savun thawl hlun sungah an thun lo ding, ziangahtile sabitti thar in thawl hlun cu a pahkuai dingih sabitti cu a bung lak dingih thawl khal cu a siat òheh ding.
38 Cuhnak cun sabitti thar kha savun thawl thar sungah thun sawn ding a si.
39 Cun sabitti hlun an in hnuah zohman in sabitti thar an in duh lo. ‘A hlunmi a òha sawn,’ an ti,” tiah a sim.