2
Elijah Cu Vancung Ah A Lak
1 Bawipa in Elijah cu phusing in vancung ih a lak tikcu a thleng. Elijah le Elisha cu Gilgal in an suak ih,
2 an feh lai ah Elijah in Elisha hnenah, “Nang hitawkah rak um aw. Kei cu Bawipa in Bethel feh dingah i fial a si,” a ti.
Asinan Elisha in, “ Bawipa ih hmin saal in le nangmah ih nunnak thawn thu ka kam aw: Ka lo kirsan hrimhrim lo ding,” a ti. Curuangah an pahnih in Bethel ahcun an feh.
3 Cutawkih a ummi profet pawl cu Elisha hnenah an ra ih, “ Bawipa in na bawipa hi tuih sun ah na hnen ihsin a lak ding, tihi na thei maw?” tiah an sut.
Elisha in, “A si, ka thei. Asinan cuih thu cu rel hlah uh si,” tiah a ti.
4 Cule Elijah in Elisha hnenah, “Nang hitawkah rung um aw. Kei cu Bawipa in Jerikho feh dingah i fial a si,” a ti.
Sikhalsehla Elisha in, “ Bawipa ih hmin saal in le na nunnak thawn thu ka kam aw: Ka lo kirsan hrimhrim lo ding,” a ti. Curuangah Jerikho ah an feh tlang.
5 Cutawkih a ummi profet pawl cu Elisha hnenah an ra ih, “ Bawipa in na bawipa hi tuih sun ah na hnen ihsin a la ding, tihi na thei maw?” tiah an sut.
Elisha in, “A si, ka thei. Asinan cuih thu cu rel hlah uh si,” tiah a ti.
6 Cule Elijah in Elisha hnenah, “Nang hitawkah rak um aw. Kei cu Bawipa in Jordan Tiva ih vung feh dingin i fial a si,” a ti.
Asinan Elisha in, “ Bawipai” hminsal in le ka nunnak thawn thu ka kam aw: Ka lo kirsan hrimhrim lo ding,” a ti. Curuangah an pahnih in an feh ih,
7 profet sawmnga in Jordan Tiva tiang an vun thlun. Elijah le Elisha cu Jordan Tiva kap ahcun an ding ih profet sawmnga pawl cu a hlat nawn ah an ding.
8 Cule Elijah in a korfualpi cu a hlit ih a zual hnuah cumi cun tidai cu a vuak; hmakhat teah tidai cu a òhen aw ih Elijah le Elisha cu leihul par in khatlam ralah an feh.
9 Cutawkah Elijah in Elisha hnenah, “Kei cu na hnen ihsin lak hlo ka si thlang ding. Cutiih lak hlo ka si hlanah ziangso i tuah sak seh ti na duh?” tiah a sut.
“Nangmah ai awhtu ka sinak dingah ka covo dingih let hnih in na huham i pe aw,” tiah a ti.Ref 2:9 Daan 21:17;
10 Cutikah Elijah in, “I dilmi cu lo pek dingah a har zet a si. Asinan na hnen ihsin keimah lak hlo ka si lai i hmu a si ahcun i dilmi cu na ngah ding; i hmulo a si ahcun na ngah lo ding,” tiah a ti.
11 Thu rel phahin an feh ih rinlopi ah an karlak ah meisa rang pawl ih hnukmi meisa rangleng a rung thleng ih Elijah cu phusing in van ah a zuanpi.
12 Cumi cu Elisha in a hmu ih, “Ka pa, Ka pa! Rangleng le rang ralkap bangin Israel hum theitu!” tiah a au. Cuih hnu cun Elijah cu a hmu nawn lo.
A riahsia in Elisha in a hnipuan òhenhnih ah a thlek.Ref 2:12 2 Siang 13:14;
13 A hlitta mi Elijah ih korfualpi cu Elisha in a sar hnuah a kir ih Jordan Tiva kapah a ding.
14 Elijah ih korfualpi cun tidai cu a vuak ih, “Khuitawkah so Bawipa, Elijah ih Pathian cu a um?” tiah a ti. Tidai a vuak tikah a òhen aw ih Elisha cu khatlam ralah a hei tansuak.
15 Jerikho ih ummi profet sawmnga in amah cu an hmuh tikah, “Elijah ih huham cu Elisha parah a um a si,” tiah an ti. An va hmuak ih a hmaiah an kun ih,
16 “Micak hlir minung sawmnga hinah kan um a si. Kan feh pei ih na bawipa kan hawl pei. Bawipa ih thlarau in a cawi ih tlang parah maw, horkuam ah maw, hmun khatkhat ah a tanta a si ding,” tiah an ti.
Cutikah Elisha in, “A si lo, nan feh lo pei,” a ti.
17 Sikhalsehla an ngen tuk ruangah a fehter hai. Minung sawmnga cu an feh ih a suk le a so ramkip ah ni thum sung an hawl. Asinan Elijah cu an hmu lo.
18 Elisha in Jerikho khua in a rak hngak ih a hnenih an rakir tikah, “Feh hlah uh ka lo ti tho lo maw?” a rak ti.
Elisha Ih Mangbangza Tuahmi
19 Jerikho khuasungmi hrekkhat pawl cu Elisha hnenah an ra ih, “Bawipa, na theih vekin hi khua ih hmunram cu a òha zet a si. Asinan tidai a òha lo ih fa siatnak a suahter ringring,” an ti.
20 Cutikah Elisha in, “Kheng thar sungah cite ret uhla ka hnenah rak keng uh,” a ti. A ti vekin an rak keng ih,
21 an khua dawhhna ah a feh ih cite cu a va paih hnuah, “ Bawipa in, ‘Hi tidai cu ka thiangfaiter zo ih thihnak le fa siatnak a suakter nawn lo ding,’ a ti a si,” tiah a sim.
22 Cuih thokin Elisha ih a sim bangtukin cuih tidai cu tidai thiangfai ah a cangta.
23 Elisha cu Jerikho ihsin a suak ih Bethel lamih a feh lai ah khua pakhat sungin mipa nauhak an ra suak ih hnihsuak sainak ah an hmang ih, “Feh aw, lu thlung kolh pa, feh aw,” tiah an auh.
24 Elisha cu dunglam a her ih met phahin Bawipa ih hmin in a cam hai. Cule hramlak in savom pinu pahnih an hung suak ih mipa nauhak sawmli le pahnih cu an bauhthlek thluh.
25 Cuih sin Elisha cu Karmel Tlangah a hung feh ih cuih hnuah Samaria ah a kir.