19
Hezekiah In Isaiah A Sut
(Isa 37:1-7)
1 Siangpahrang Hezekiah in cuih thu a theih ve tein a riahsia in a hnipuan a thlek ih buri hnipuan a hruk ih Bawipa ih Biakinn ah a feh.
2 Siangpahrang inn kiltu bawi Eliakim, Siangpahrang zungih sungòuan Shebna le puithiam hotu deuhdeuh pawl cu Amoz ih fapa profet Isaiah hnenah siangpahrang in a thlah hai. A thlahmi pawl tla buri hnipuan an hruk ve.
3 Siangpahrang in Isaiah hnen ahcun, “Tuih sun cu lungphang le thinpit ih kan um sun a si; kawk kan tuar ni a si ih ningzak mualpho ih kan um ni khal a si. Thazang a neih lo ruangih nau a hring thei nawn lomi nunau kan bang.
4 Assiria siangpahrang in a kuthnuai bawi lak ih upa bik a run thlah ih a nungmi Pathian cu a hmuhsuam ciamco. Bawipa na Pathian in hi hmuhsuamnak òongkam hi thei in cutiih a òongtu cu run hrem hram seh. A nung hrihmi kan minung pawl hrangah Pathian hnenah thla in cam sak hram aw,” tiah a cah.
5 Isaiah in siangpahrang ih thucahmi a theih tikah,
6 hitiin thu a khirh: “ Bawipa in, ‘Assiria siangpahrang kuthnuai bawi pawl in an lo hro ih keimah in hmuhsuamnak òong ruangah zianghman thinphannak nei hlah.
7 Assiria siangpahrang sungah thinlung ka ret ding; cutikah thuvaivuan a thei dingih a ram ah a kir ding; cutawkah amah ih ram sungih ralnam in ka thihter ding,’ a ti,” tiah a ti.
Assiria Ih Hronak
(Isa 37:8-20)
8 Cuih Assiria bawi in an siangpahrang cu Lakhish a suahsan ih a kiangih ummi Libnah khuapi a do, ti a theih tikah, a kir ih cutawk ahcun amah tong dingin a feh.
9 Cun Assiria siangpahrang in, anmah Assiria ralkap pawl do dingah Izipt ralkap pawl cu Ethiopia Siangpahrang Tirhakah ho in an ra, tiah thu a thei. Cutikah Assiria Siangpahrang in Judah siangpahrang Hezekiah hnenah palai a thlahsal ih,
10 “Na rinsanmi na Pathian cun ka kut sungih tla lo dingin thu a lo sim, asinain cumi cun lo hnangamter pang hlah seh.
11 Assiria Siangpahrang in, ‘Ka siatsuah ding,’ tiih ka ti hnuhnu cu an ram ziangti in a um òheu ti cu na theih cia a si ko. Ka luat thei ding, tiah na ruat maw si?
12 Ka pupa pawl in Gozan, Haran le Rezef khuapi pawl an siatsuah thluh zo ih Telassar ih ummi Betheden mi pawl an that òheh; an khawzing zotal in an hum thei ti na thei dah maw?
13 Atu ah Hamath, Arpad, Sefarvaim, Hena le Ivvah khuapi ih siangpahrang pawl cu khuiahso an um?” tiah a ti.
14 Siangpahrang Hezekiah in Assiria siangpahrang ih cakuat mi cu a palai pawl ih kut in a lak ih a siar. Cule Bawipa ih Biakinn ah a feh ih Bawipa ih mithmuh ah cuih ca cu a ret ih,
15 thla a cam: “Maw Bawipa, Israel ih Pathian, cherubn 19:15 Cherub: timi cu thlanei ramsa lem a si ih pakhat hnak ih tam an sile cherubim an ti. Thukam Kuang tlunah pahnih an ret ih an thla pahnih karlak ah Pathian umnak a si, tiah an zum. ih thla tlun sunloihnak bawi tohkham ih a totu, Nangmah lawng Pathian na si ih leilungtlun ih peng le ram hmuahhmuah tla a uktu na si. Lei le van hi nangmah ih tuahmi an si.Ref 19:15 Suah 25:22;
16 Maw Bawipa, atu kan parih a thlengmi thil hi in run hmuh sak hram aw. Assiria siangpahrang Sennakherib in a nungmi Pathian nangmah a lo nautatnak òongkam hmuahhmuah cu run thei aw.
17 Maw Bawipa, Assiria siangpahrang pawl in miphun tampi an siatsuah ih an ram pawl an òhingter;
18 pathian a si lomi an khawzing pawl, khawzing hman si lo, milai kut ih thing le lung tuahcopmi, milem pawl cu an ur òheh.
19 Curuangah Bawipa kan Pathian, leilung pumpi in Bawipa, nangmah pakhat lawnglawng Pathian taktak na si kha an lo theih theinak dingah Assiria mi pawl ih kut sungin in runsuak hram aw,” a ti.
Isaiah In Siangpahrang Thu A Cah
(Isa 37:21-38)
20 Cule Isaiah in Siangpahrang Hezekiah hnenah thu a cah ih, “ Bawipa in na thlacamnak a thei zo.
21 Assiria Siangpahrang Sennakherib dodal in Bawipa ih òongkam cu hitiin a si:
‘Zion ih falao 19:21 Zion ih fala: timi hi Jerusalem khuapi tican a si. in a lo nautat,
Zion fala him in a lo hmuhsuam;
Dungsip ih na tlanhlo tikah cun,
Jerusalem fanu in a lu a thing.
22 Na camriam, na hmuhsuam reromi,
zo a si tiah so na ruah?
Na auh reromi hi zoso a si?
Israel ih Pathian thianghlim,
Keimah i hmuhsuam sokhaw na si.
23 Ka hnenih tluangkhawng dingin,
na palai na thlah;
Ka rangleng pawl thawn
tlang sang bik ka neh,
Lebanon tlangzim tla ka thleng,
Sidar thing sang bik ka hau thei,
Mirang farthing òha bik tla;
Tupi sungih a deng bik hmun ka thleng,
Ram netnak phuul tiang, na ti.
24 Hrindangmi ram ah tikhur ka lai;
Cutawkih tidai ka in,
Ka ralkap pawl in Nail Tiva pawl
an ke rori in an pal,
Car òheh in an pal, tiah na porh aw.
25 Hitiih na tuahmi hmuahhmuah hi,
hlanlaipi in Keimah ih tumcia mi a si,
tihi na thei dah lo maw?
Atu lawngah ka tuahsuak a si!
Ralhruang kulhmi khuapi pawl cu
siatbal thluh theinak ah
huham ka lo pek;
26 Khuasung ih ummi minung pawl cu,
Thilti theinak an nei riai lo.
Òihnak le thlaphannak in an khat.
Lo sungih a kho mi belh le
inn parih a khomi hrampi vek an si,
Thlisia a hran ih a nuai tikah
27 “Na thuhla cu a zate in
ka thei òheh zo,
Na tuahmi le na fehnak pawl thawn;
Ka parih na thinhen zia pawl thawn
kim tein ka thei òheh.
28 Ka hnenih na thinhennak le
ka parih na hngalnak pawl cu,
ka hna an thleng òheh.
Curuangah na hnar ah
sio ka thlaih dingih,
Na kaa ah kakharh ka kharh ding,
cuticun na ratnak lamzin in,
ka lo hruaikirsal ding,” a ti.
29 Cule Isaiah in Siangpahrang Hezekiah hnenah, “A cang dingmi thil hminsinnak ah hitiin a si ding: Tuih kum le hmai kum cu hramlak ih a khomi fang nan ei ding. Asinan kum thumnak kum ahcun nanmah in rawlci nan tuh pei ih nanmah in rawl nan lak ding; sabit tla nan ciing pei ih sabit rah nan ei ding.
30 Judah ram ah a nung ih a tangsunmi pawl cu a thukpi ah hrihhram a dawt ih rah a rahmi thingkung vek an si ding.
31 Jerusalem le Zion Tlang tla ah a tangmi an um ding; ziangahtile Bawipa in a kimter tengteng ding a si.
32 “Assiria siangpahrang thu ahcun Bawipa in hitiin a ti:
‘Hi khuapi sungah a lut lo ding,
Thal pakhat khal a sai lo ding.
Ralphaw thawn a ralkap pawl cu,
khuapi hmai an ra thleng lo ding.
Phardawl lengih raldonak leidawl,
khahsilh mi tla an dawl lo ding,
33 A ratnak lamzin in a kirsal pei;
hi khuapi sungah cun a lut lo pei.
Bawipa Keimah in
ka phuang zo a si.
34 Hi khuapi cu ka òan pei ih
ka hum pei.
Ka hmin thannak hrangah le
ka salpa David hnenih
ka thukammi ruangah,” tiah a ti.
35 Cuih zan cu Bawipa ih vancungmi pakhat Assiria ralkap pawl ih riahhmun ah a feh ih ralkap thawng zakhat thawng sawmriat le thawngnga a that. A thaizing zingpit ahcun an zate in an thi òheh.
36 Cule Assiria Siangpahrang Sennakherib cu dungah a siip ih Nineveh ah a kir.
37 Veikhat ah a khawzing Nisrok biakinn ih a khawzing a biak lai ah a fapa pahnih Adrammelek le Sharezer in an ralnam in an sun that ih cuih hnuah Ararat ram ah an tlan. A ai ah a fapa Esarhaddon in siangpahrang a run òuan.