3
Solomon In Fimnak A Dil
(2 San 1:3-12)
1 Solomon in Izipt siangpahrang fanu a òhit ih cuticun Izipt siangpahrang thawn òantlangnak cakhen a tuah. A nupi cu a hruai ih, a siangpahrang inn, Bawipa ih Biakinn, le khuapi kulhnak phardawl a sak òheh hlantiang David Khuapi ah a umter.
2 Bawipa ih hrangah Biakinn sak hrih lo a si ruangah, senpi pawl cu hmun dangdang biakòheng ah thawinak an pek.
3 Solomon in Bawipa cu a duhdawt ih a pa David ih daan pekmi pawl cu a thlun. Asinan biakòheng dangdang khalah òilva pawl a that ih thawinak a pe vivo.
4 Veikhat ah Solomon cu Gibeon ah thawinak pe dingah a feh. Ziangahtile Gibeon cu hminthang bik biakòheng umnak a si. Cutawkah mei-ur thawinak cu a thawng a za in a rak pe zo.
5 Cuih zan cu a mang ah Bawipa a hnenah a lang ih Bawipa in, “Ka lo pek dingah ziangso na duh?” tiah a sut.
6 Cutikah Solomon in, “ Bawipa, ka pa David na salpa, hnen ahcun na duhdawtnak catbang lo in na langter ih na hmaika ah rinsan tlak le òha zet le fel zet in a nung a si. Amah na duhdawtnak cu a cat cuang lo ih tuih sun khalah na langter ih amah ai ah a fapa cu ram uktu ah na tuah.
7 Maw Bawipa, mino ka si hrih ruangah ram uknak thu zianghman ka thei lo nain, ka pa ai ah siangpahrang i cangter.
8 Atu ah na ta dingih na hrilmi na miphun, zohman ih siar cawk lomi minung lakah ka um.
9 Curuangah hi na minung pawl òha zet le ding zet ih ka uk theinak dingah le a òha le a sia ka thleidan theinak dingah ka òulmi fimnak i pe aw. Culo ahcun hitluk a tammi na minung hi ziangtinso ka uk thei ding?” tiah a ti.
10 Cumi a theih tikah Bawipa cu a lung a awi ngaingai ih,
11 Solomon hnen ahcun, “Nun saunak le lennak le na ral pawl thihnak dil lo in, na minung pawl dingteih uk theinak ah fimnak i dil ruangah,
12 na dil vekin ka lo pe ding. Fimnak le theihthiamnak ka lo pe dingih nangmah hlanah siseh, nangmah hnuah siseh, nangmah vekih fimnak le theihthiamnak a neitu zohman an um lo ding.
13 Na dil lomi khal ka lo pe cih ding: Na nunsung hmuahhmuah ah lennak le hminthannak na nei dingih zovek siangpahrang hman in an lo bang lo ding.
14 Cun na pa David vekih ka thu i thlun ih ka thukham le ka daan pekmi pawl na tuah a si ahcun na nunnak khal ka sauter ding a si,” tiah a ti.
15 Solomon cu a hung òhangih Pathian in a mang ah thu a sim kha a thei. Cule Jerusalem ah a feh ih Bawipa ih Thukam Kuang hmaiah a ding ih Bawipa ih hnenah mei-ur thawinak le remnak thawinak a pek. Cuih hnuah a kuthnuai ih hnaòuantu pawl hrangah rawl eitlangnak puai a tuah sak.
Solomon In Thuharsa A Òhen
16 Veikhat ah hlawhhlang nunau pahnih Siangpahrang Solomon hmaiah an ra thleng.
17 Nunau pakhat in, “Maw siangpahrang bawipa, hi nunaunu le keimah cu inn pakhat ah kan um. Cuih inn ih kan um lai ahcun faate ka hring ih mipa a si.
18 Nau ka neih hnu ni thumnak ah anih khalin faate a hring ih mipa a si ve. Cuih inn ahcun midang zohman an um lo. Kanmah pahnih lawng kan si.
19 Zankhat ah a fapa te cu a nen pang ih a thi.
20 Cule zan ahcun a tho ih ka ihthat sungah ka naute cu ka hnen ihsin a la ih a ihkhun ah a ret. Cule a thimi a fapa cu ka ihkhun ah a ret.
21 A thaizing zingpit ah ka tho ih ka faate cu pawhte fawh ka tum tikah a thi ti kha ka hmu. Òhateih ka zohsal tikah a thimi cu ka faate a si lo ti kha ka thei,” a ti.
22 Cutikah a dang nunaunu in, “A si lo! A nungmi hi ka faate a si ih, a thimi kha na fa a si,” tiah a ti.
A hmaisatu nunaunu in, “Si hlah ee! A thimi hi na fa a si ih a nungmi kha ka fa a si,” a ti ve.
Cuticun siangpahrang hmai ahcun an el aw rero.
23 Siangpahrang Solomon in, “Nan pahnih in a nungmi fa cu ka fa a si, nan ti veve ih a thimi cu ka fa a si lo, nan ti veve,” a ti ih,
24 ralnam run keng dingah thu a pek. Ralnam cu an run ken tikah,
25 Solomon in, “A nungmi naute hi òhenhnih ah òhen awla, hi nunaunu pahnih hnenah òhenkhat veve pe aw,” tiah a ti.
26 Cutikah a nu ngaingai a simi nunaunu cun, a fapa hrangih duhdawtnak a neih ruangah siangpahrang hnenah, “Maw Siangpahrang bawipa, naute cu that hram hlah aw. Hi nu hnenah pe sawn aw,” a ti.
Asinan a dang nunaunu cun, “Zohnen hmanah in pe hlah. Òhenhnih ahcun òhen aw,” tiah a ti.
27 Cutikah Solomon in, “Naute cu that hlah. Pakhatnak nunaunu hnenah pe aw. A nu a si,” a ti.
28 Solomon thuòhennak cu Israel mi pawl in an theih tikah dingteih thu òhen thiamnak cu Pathian in a pe a si, ti an thei ih Solomon cu an upat ih an òihzah ngaingai.