52
Jerusalem Tluknak
(2 Siang 24:18-25:7)
1 Zedekiah cu Judah siangpahrang a òuan tikah kum kul hluankhat a si ih Jerusalem ihsin kum hleikhat a uk. A nu ih hmin cu Hamutal a si ih Libnah khua ih ummi Jeremiah ih fanu a si.
2 Siangpahrang Jehoiakim vek thotho in siangpahrang Zedekiah khal Bawipa ih parah a sual.
3 Bawipa cu Jerusalem mi le Judah mi pawl parah a thin a heng ngaingai ih a mit hmuhlonak hmunah a dawihlo hai a si.
Babilon siangpahrang Nebuchadnezzar do duh ah Zedekiah cu ral a tho.
4 Nebuchadnezzar cu a ralkap thawn a feh ih Zedekiah siangpahrang a òuannak kum kua kum, thla hra thla, ni hra ni ah Jerusalem a do. Khuapi lengah riahbuk an sak ih khuapi phardawl leng ihsin a kimvel in leilung an dawl ih,Ref 52.4 Ezk 24:2;
5 Zedekiah siangpahrang a òuannak kum hleikhat kum tiang an kulh.
6 Cuih kum hleikhat kum, thla li thla, ni kua ni ah paam a nasat tuk ruangah khuasung mi pawl zianghman ei ding an nei nawn lo.
7 Cule khuakulh phardawl cu an balcim ih Babilon ralkap pawl in Jerusalem khuapi cu an kulh òhepòhep nain Judah ralkap pawl cu zan khawthim ah an rak tlanhlo òheh. Siangpahrang hmuan lakin an feh ih phar pahnih a pehtu kotka zin in an feh ih Jordan phairawn lamah an tlan.Ref 52.7 Ezk 33:21;
8 Asinan Babilon ralkap pawl in siangpahrang Zedekiah cu an dawi ih Jerikho khua kiang hmunrawn ah an kai ngah; a ralkap pawl in an tlansan òheh.
9 Cule Zedekiah cu siangpahrang Nebuchadnezzar hnenah an fehpi. Culai ah Nebuchadnezzar cu Hamath ram Riblah khua ah a um ih cutawkah Zedekiah ih thu cu a relsak.
10 Nebuchadnezzar in Riblah ahcun Zedekiah ih fapa pakhat cu a pa ih mithmuh rori ah a that; Judah ram bawi dangdang khal a that.
11 Cuih hnuah Zedekiah ih mit a phorh ih thir cikcin in a khih ih Babilon ah a kuat. Babilon ah Zedekiah cu a thih ni tiangin thawng sungah a um.Ref 52.11 Ezk 12:13;
Jerusalem Biakinn An Siatsuah
(2 Siang 25:8-17)
12 Nebuchadnezzar ih Babilon siangpahrang a òuannak kum hleikua kum, thla nga thla, ni hra ni ah, siangpahrang hnenih ruahnak petu le a ralkap hotu ralbawi Nebuzaradan cu Jerusalem khua sungah a lut ih,
13 Biakinn le siangpahrang inn le Jerusalem khuasung ih bawi upa pawl ih inn hmuahhmuah meisa in a ur òheh.Ref 52.13 2 Siang 9:8;
14 A ralkap pawl in khuapi kulhnak phardawl pawl an rak bal òheh.
15 Cule Nebuzaradan in Jerusalem ih a tangmi minung pawl, zungthiam pawl le Babilon ralkap pawl hnenih a relhtu pawl hmuahhmuah cu Babilon ah a fehpi òheh.
16 Cule Judah ram ahcun mifarah bik pawl le thilri zianghman a nei lo pawl kha a taan ih lo hnaòuantu dingah le sabit hmuan thlotu dingah a ret a si.
17 Babilon mi pawl in Biakinn sungih a ummi dar ih tuahmi òhuam pawl le leng pawl an denkuai òheh ih dar tikuang tumpi khal an siat òheh. A dang dar ih tuahmi thilri hmuahhmuah cu Babilon ah an phur òheh.
18 Cule sawhleek pawl le biakòheng thianfai tikih hmanmi vutcam khawlnak kheng pawl, meisa vanmi mei-inn ih thuam pawl, thawinak pek tikih sathi donnak maihum pawl, rimhmui ur tikih hmanmi khengkuum pawl le Biakinn sungih hmanmi dar thilthuam hmuahhmuah an lak òheh.
19 Ngun le sui ih tuahmi thilri hmuahhmuah khal an lak òheh; pakan kuum pawl, meivam laknak kheng pawl, raithawi tikih sathi khawlnak maihum pawl, vutcam retnak kheng pawl, mei-inn òhuam pawl, rimhmui urnak kheng pawl le sabitti thawinak pek tikih sabitti thletnak maihum pawl khal an lak òheh a si.
20 Siangpahrang Solomon in dar ih a tuahmi thilri pawl: Òhuam pahnih, leng pawl, tikuang tumpi le tikuang dotu cawcang hleihnih pawl cu cuai ih thlai theih lo dingin an rit.
21-22 Òhuam pahnih cu an bang aw; pakhat cu pi kul hluansarih a sang ih pi hleiriat a tum; a sung a kua ih a thir cu pi thum a sah. Òhuam ziik ah dar ih tuahmi lubo a um ih pi sarih le a hrek a sang; a kimvel ah taleti rah cuang in mawiternak sermi a um ih a zate in dar ih tuah òhehmi an si.
23 Cutiih mawiternak sermi taleti rah cu òhuam lu pakhat ah zakhat a um ih cuih sungah sawmkua le paruk cu leilung ihsin hmuh thei an si.Ref 52.23 2 Siang 7:15-47;
Judah Mi Babilon Ah An Hruai
(2 Siang 25:18-21, 27-30)
24 Cuih tlunah Babilon ralkap hotu ralbawi Nebuzaradan in Puithiam Sang Seraiah le puithiam sang sangtu puithiam Zefaniah le Biakinn ih bawi tum pipi pathum kha thawng thlak dingah a hruaihlo.
25 Khuapi sungih ralkap pawl hotu ralbawi pakhat, khuapi sungih a tang hrihmi siangpahrang ruahnak petu sungin minung pasarih, ralkap zung ih cazin kaitu le ralbawi sangtu pakhat le mi upa deuhdeuh minung sawmruk tla a fehpi a si.
26 Nebuzaradan in Hamath ram, Riblah khua ih a rak ummi,
27 Babilon siangpahrang hnenah a hruai. Cutawkah Babilon siangpahrang in a thawiter ih a thahter hai.
Cuticun Judah mi pawl cu an ram ihsin saltannak ram ah hruaihlo an si.
28 Nebuchadnezzar in sal dingih a hruaihlo mi minung cazin cu a thuailam vekin a si: Siangpahrang a òuannak kum sarih kum ah minung thawngthum le kul hluanthum;
29 A kum hleiriat kum ah Jerusalem ihsin minung zariat le sawmthum le pahnih;
30 Kum kul hluanthum kum ah minung za sarih le sawmli le panga; an zate in minung thawngli le zaruk Nebuchadnezzar in a hruaihlo a si.
31 Evilmerodak cu Babilon siangpahrang a can kum ah Judah siangpahrang Jehoiakhin parih zangfahnak a neih ruangah thawnginn ihsin a suah. Cutiih a suah cu Jehoiakhin thawng thlak dingih an hruaihlo hnu kum sawm thum le kum sarih kum, thla hlei hnih thla, ni kul hluannga ni ah a si.
32 Evilmerodak in Jehoiakhin cu òha tein a zoh ih Babilon ih thawng a tla vemi siangpahrang dangdang hnenih upatnak a pekmi hnakin tam sawn in upatnak a pek a si.
33 Cuticun Jehoiakhin cu a zoh òha ih a thawng tlaknak hnipuan a thleng awkter ih a nunsung hmuahhmuah siangpahrang cabuai ah rawl a eiter.
34 A nun sung nitin tein a òulmi leinak ih hman dingah Babilon siangpahrang in Jehoiakhin cu tangka a pek ringring.