47
Bawipa In Filistin Thuhla A Sim
1 Izipt siangpahrang in Gaza a do hlanah Bawipa in Filistin ram thuhla i sim;
2 Bawipa in, “Zoh hnik!
Saklam ah tidai a òhang ciamco;
Tilian bangin tiva kap ah a liam ding.
Leilung le a par ummi hmuahhmuah
a khuh thluh ding;
Khuapi le a sung ummi
milai pawl tla a khuh ding;
Cupawl in bomnak duh ah an au ding.
Leitlunmi hmuahhmuah nasa zet in
an òap ding an ai ding.
3 Rangcang pawl ih ke vuak thawm
an thei ding;
Rangleng tlan thawm le
lengke ril thawm tla.
Pale pawl in an faale pawl bawm
dingah an kir hnawh lo ding.
An kut cu an siir ah tha nei lo in
an thlai aw ding.
4 Filistin ram siatsuahnak tikcu
a ra thleng zo,
Òaiar le Sidon ihsin bomnak
an ngahsunmi sahtannak tikcu cu!
Keimah Bawipa in
Filistin pawl ka siatter ding,
Krete tikulh ihsin a rami pawl cu!
5 Gaza mi hnenah riahsiatnak tumpi
a ra thleng;
Ashkelon mi pawl cu an dai ziarzi.
Ziangtik tiang so Filistin ram
hrekkhat pawl cu mithi ngai in
an um ding?
6 ‘ Bawipa ih ralnam,
Ziangtik tiang so mi na sat vivo hrih ding?
Na kawm sungah kirsal awla,
cutawkah dai tein um thlang aw,’
tiah na au!
7 Sikhalsehla ziangtinso
dai tein a um thei ding?
Tuah ding òuanvo ka pek hnu ahcun?
Ashkelon do dingah le tipikap ih
a ummi pawl sat dingah
thu ka pek zo a si,” a ti.Ref 47.7 Isa 14:29-31; Ezk 25:15-17; Joe 3:4-8; Amo 1:6-8; Zef 2:4-7; Zek 9:5-7;