19
A Kuaimi Beel
1 Bawipa in tlak beel va lei dingah i fial. Upa hrekkhat pawl le puithiam upa deuh pawlkhat hruai aw i ti.
2 Hlamphei Kotka ihsin Hinnom Phairawn ih va feh dingah Bawipa in i sim. Cutawkah i simmi thu va phuang ding ka si.Ref 19.2 2 Siang 23:10; Jer 7:30-32; 32:34, 35;
3 Bawipa in hitiin sim aw a ti: “Judah siangpahrang pawl le Jerusalem mi pawl, Cungnungbik Bawipa, Israel ih Pathian Keimah ka simmi hi ngai hnik uh. Hi hmun ahhin vansiat malmaknak nasa zet in ka thlenter dingih a theitu hmuahhmuah mangbang in an um ding.
4 Hibangtuk thil cu ka thlenter ding, ziangahtile misenpi in, in dungtun ih khawvang hnenah thawinak pek tahrat in hi ram hi an baalter zo a si. Cuih khawvang pawl cu anmah le an pupa pawl in siseh, Judah siangpahrang in siseh, an theih dah lomi a si. Hi ram cu mawh nei lomi ih thisen in an khahter ih,
5 an faate pawl cu thawinak meisa ih ur dingah Baal khawvang hrangah biakòheng an dawl a si. Hibangtuk tuah dingah thu ka pek dah lo; a ruah hman ka ruat dah lo.Ref 19.5 Pui 18:21;
6 Curuangah tikcu a ra thleng dingih hi hmun cu Tofeth asilole Hinnom Phairawn tiah an ti nawn lo ding. Cumi ai ah Mithahnak Phairawn ti a si ding.
7 Hi hmun ahhin Judah mi le Jerusalem mi pawl ih tumtahnak cu ka phelhsolh òheh ding. An ral pawl cu nehtu ka siter dingih an ral pawl in an that hai ding. An ruak cu van ih vate le leilung ih ramsa ei dingah ka pe ding.
8 Hi khuapi parah a nasa zetmi siatsuahnak ka thlenter dingih a kiangih a feh suksotu hmuahhmuah an mang a bang ngaingai ding.
9 Ral pawl in khuapi cu an kulh dingih minung pawl cu thah an tum ding. Khuapi an kulh cu a nasa tuk dingih khuasung um mi pawl pakhat le pakhat an sa an ei aw dingih an fanu le an fapa pawl ih sa tiangin an ei ding a si,” tiah a ti.
10 Cule Bawipa in keimah thawn a feh tlangtu upa pawl ih mithmuh ah tlak beel cu khuai aw i ti.
11 Cun an hnenah Cungnungbik Bawipa in, “Hi minung pawl le hi khuapi cu kom theih a si nawn lomi hi beel kuai bangtukin ka khuai òheh ding. Mi pawl in an ruak cu Tofeth hmun ah an phum ding. Ziangahtile hmundang khui hmanah anmah phumnak a um lo ding.
12 Hi khuapi le khuasung mi pawl cu Tofeth vekah ka tuah ding, tiah ka lo tiam cia a si.
13 Jerusalem inn pawl, Judah siangpahrang ih inn pawl le inn dangdang, a tlunah arsi hnenah rimhmui an urnak le khawzing dang hnenih thawinak sabit an thletnak inn pawl hmuahhmuah cu Tofeth vekin a thiang lomi ah an cang ding,” tiah a ti.
14 Bawipa in a thusim dingih i thlahnak hmun Tofeth ihsin ka fehsal. Biakinn sungah ka dingih misenpi hnenah a thu cu ka phuang.
15 Cungnungbik Bawipa, Israel ih Pathian in an hnenah, “Ka thlenter ding ka timi hremnak hmuahhmuah cu hi khuapi le a kiangkap khuate pawl parah ka thlenter ding; ziangahtile mi lungruh an si ih ka simmi an ngai duh lo a si,” tiah a ti.