20
A Lawngmi Thlan
(Mat 28:1-8; Mar 16:1-8; Luk 24:1-12)
1 Nipi Ni zingpit khua a van hlanah, Mari Magdalene cu thlan ah a va feh ih thlaankhar lungpheng òhawn cia-in a um kha a hmu.
2 Simon Piter le Jesuh ih a duhdawtmi dungthluntu hnenah a va tlan ih, “Thlan ihsin Bawipa an thiar hlo zo; khuitawkih an ret ti kan thei lo!” tiah a sim.
3 Cun Piter le a dang dungthluntu cu an pok ih thlan ah an va feh.
4 An pahnih in an tlan ih a dang dungthluntu cu Piter hnakin tlan a cak deuh ruangah hmaisa deuh ah thlan ah a thleng.
5 Thlan sung cu a vun bih ih ruak tuamnak puan nemte cu a hmu, asinain a vung lut lo.
6 A dungin Simon Piter cu a ra thleng ih thlan sungah cun a vung lut mai. Ruak tuamnak puan nemte le,
7 Jesuh ih lu òemnak puan kha a hmu. Asinan a lu òemnak puan cu ruak tuamnak puan nemte umnak ah a um lo; amah dang tein zual aw in a um.
8 Cule dungthluntu dang, thlan a thlengtu hmaisa deuhtu pa khal cu thlan sungah cun a lut ve ih a hmu ih a zum.
9 Thihnak ihsin a thosal ding tiih Ca Thianghlim ih a timi kha a tican an theithiam hrih lo.
10 Cule dungthluntu cu an inn ah an tlung.
Mari Magdalene Hnenah Jesuh A Lang
(Mat 28:9-10; Mar 16:9-11)
11 Mari cu thlan lengah a ding ih a òap rero. Cutiih òah phahin a kuun ih thlan sung cu a vun bih ih,
12 vancungmi pahnih puan raang thawn thuam aw in Jesuh ruak an rak retnak ahkhan a lu lamah pakhat, a ke lamah pakhat an to kha a hmu.
13 Vancungmi cun, “Ziangahso na òah rero?” tiah Mari cu an sut.
Anih in, “Ka Bawipa zo in si maw an lak ih khuitawkah an ret ti ka thei lo,” tiah a sawn.
14 Cule Mari cu a her ih cutawkih Jesuh a din kha a hmu; asinain Jesuh a si kha a thei lo.
15 Jesuh in, “Nunaunu, ziangahso na òah rero? Zoso na hawl?” tiah a sut.
Cutiih a betu cu hmuan kiltu a si tiin a ruat ih Mari cun, “ Bawipa, nangmah in na lak a si ahcun na retnak kha i sim awla ka feh dingih ka va la ding,” tiah a ti.
16 Jesuh in, “Mari!” tiah a vun ko.
Mari cun Jesuh lam a hoi ih Hebru òong in “Rabboni!” tiah a ti. Rabboni ti cu Sayapa tican a si.
17 Jesuh in Mari cu, “I kai hlah! Ziangahtile Pa hnenah ka thleng hrih lo. Asinan ka unau pawl hnenah va sim awla ‘An Pa a si vemi ka Pa, an Pathian a si vemi ka Pathian hnenah ka feh ding a ti,’ tiah va sim aw,” a ti.
18 Cuticun Mari Magdalene cu a feh ih Bawipa a hmuhnak thu le a hnenih a òongmi pawl hmuahhmuah cu dungthluntu pawl hnenah a sim.
Dungthluntu Hnenah Jesuh A Lang
(Mat 28:16-20; Mar 16:14-18; Luk 24:36-49)
19 Cuih Nipi ni zanlam ah dungthluntu pawl cu hmunkhat ah an tong aw. Judah mi hotu pawl an òih ruangah sangka hmuahhmuah an khar òheh. Cule Jesuh cu a ra lang ih anmah lakah a ding ih, “Nan hnenah daihnak um ko seh,” tiah a ti.
20 Cumi a òong òheh in an hnenah a kut le a hnak a hmuh. Dungthluntu pawl cu an Bawipa an hmuh tikah an lung a awi ngaingai.
21 Jesuh in an hnen ahcun, “Nan hnenah daihnak um ko seh! Ka Pa in i thlah vekin nannih khal ka lo thlah ve a si,” tiah a ti.
22 Cutiih a òong hnuah an parah a thaw a thawt ih, “Thlarau Thianghlim rak co uh!
23 Mi an sualnak nan ngaidam ahcun ngaidam an si ding; nan ngaidam lo a si ahcun ngaidam lo an si ding,” tiah a ti.Ref 20.23 Mat 16:19, 18:18;
Jesuh Le Thomas
24 Dungthluntu hleihnih lakah pakhat a simi (Faphir an timi) Thomas cu Jesuh a lang lai ah an hnenah a um lo.
25 Curuangah dungthluntu dang pawl in, “ Bawipa kan hmu sokhaw!” tiah an sim.
Thomas in an hnenah, “A kut thir in an khennak hma si ka hmuh ih ka kut in cuih hma si le a hnak kha ka tham ngah hlanah cun ka zum lo ding,” tiah a ti.
26 Zarhkhat hnuah dungthluntu pawl cu inn khaan sungah an um ih Thomas khal a um ve. Sangka an khar òheh nain Jesuh cu a ra lang ih an lakah a dingin, “Nan hnenah daihnak um ko seh!” tiah a ti.
27 Cule Thomas hnen ahcun, “Hinah na kutzung rak re hnik awla ka kut hi zoh hnik aw; na kut rak dawh awla ka hnak hi tham aw. Zum lo in um nawn hlah; zum thlang aw!” tiah a ti.
28 Thomas in, “Ka Bawipa le ka Pathian!” tiah a ti.
29 Jesuh in, “I hmuh ruangah na zum a si maw? Keimah i hmu lo nain a zumtu cu mi thluasuak an si,” tiah a ti.
Hi Cabu Ngantu Ih Tumtahmi
30 A dungthluntu pawl ih mit hmuhah Jesuh in hmuhsaknak tampi a tuahmi, hi cabu sungih ngan lomi tampi a um.
31 Sikhalsehla hi hmuah hi ka ngan ih ka ngannak sullam cu nannih in Jesuh cu Messiah, Pathian Fapa a si, ti nan zum ih amah nan zumnak thawngin le amah ih hmin in nunnak nan neihnak dingah a si.