18
Jesuh An Kaihnak
(Mat 26:47-56; Mar 14:43-50; Luk 22:47-53)
1 Hitiin Jesuh in thla a cam òheh hnuah dungthluntu pawl thawn an pok ih Kidron an timi tivate ralah an feh. Cutawkah hmuan pakhat a um ih Jesuh le a dungthluntu pawl cu cuih hmuan sungah an lut.
2 Cuih hmuan cu Jesuh le a dungthluntu pawl an ton awk òheunak a si ruangah a zuartu Judas in khuitawkah a um ti a thei.
3 Curuangah cuih hmuan ahcun Judas cu Rom ralkap burkhat, puithiam upa le Farasi pawl ih thlahmi Biakinn kiltu palik pawl thawn, hriamnam an keng ih mei-inn le meifar thawn an feh.
4 Jesuh in a parah ziangbangtuk thil a ra thleng ding ti kha a theih òheh ruangah hmaiah a va suak ih, “Zoso nan hawl?” tiah a rak sut.
5 Annih in, “Nazareth mi Jesuh,” an ti.
Jesuh in, “Keimah hi amah cu ka si,” a ti.
A zuartu Judas cu an kiangah cun a ding.
6 Jesuh in, “Keimah hi amah cu ka si,” a timi an theih tikah dunglam ah an siip ih leilung ah an tlu.
7 Jesuh in, “Zoso nan hawl?” tiah a sut lala.
Annih in, “Nazareth mi Jesuh,” tiah an ti thotho.
8 Jesuh in, “Keimah hi amah cu ka si, tiah ka lo sim zo. Keimah in hawl a si ahcun midang hi cu fehter uh,” tiah a ti.
9 Hitiih a tinak cu, “Ka Pa, ka kut sungih i pekmi cu pakhat hman ka hlohtermi an um lo,” a timi kha kimternak dingah a si.
10 Simon Piter in ralnam a kenmi cu a vun zuk ih Puithiam Sang salpa ih vorhlam hna a sat thlak. Cuih salpa ih hmin cu Malkhas a si.
11 Jesuh in Piter hnenah, “Na ralnam cu a kawm ah thunsal aw! Ka Pa ih i pekmi tuarnak hai hi ka in lo dingah maw si na ruat?” tiah a ti.Ref 18.11 Mat 26:39; Mar 14:36; Luk 22:42;
Annas Hmai Ah Jesuh An Fehpi
12 Cule Rom ralkap cun an hotu ralbawi le Judah mi palik pawl thawn Jesuh cu an kai; an òem hnuah,
13 hmaisabik ah Annas hnenah an fehpi. Annas cu cuih kumih Puithiam Sang a òuantu Kaiafas nupi ih pa a si.
14 Kaiafas cu mizapi ai ah mi pakhat thih a òha sawn tiih Judah hotu pawl hnenih ruahnak petu kha a si.Ref 18.14 Joh 11:49-50;
Piter In Jesuh A Phatsan
(Mat 26:69-70; Mar 14:66-68; Luk 22:55-59)
15 Simon Piter le a dang dungthluntu pakhat in Jesuh kha an thlun. Cuih dungthluntu cu Puithiam Sang thawn a thei aw zetmi an si ih Jesuh cu a thlun ih Puithiam Sang ih tual ah a vung feh.
16 Asinan Piter cu kotka lengah a rak um. Cule cuih dungthluntu cu a kir ih kotka kiltu nu cu a va biak hnuah Piter a run luhpi.
17 Kotka kiltu nu in, “Khi pa a thluntu lakah na tel ve a si lo maw?” tiah Piter kha a ti.
Piter in, “Ka si lo,” tiah a ti.
18 Khua a sik ruangah hnenum pawl le kiltu palik pawl in meihol in meipual an sep ih dinhmunin meisa an ai. Piter khal cu a va feh ve ih an hnenah dingin meisa a ai ve.
Puithiam Sang In Jesuh Thu A Sut
(Mat 26:59-66; Mar 14:55-64; Luk 22:66-71)
19 Puithiam Sang in Jesuh cu a dungthluntu pawl ih thu le a thuzirhmi thu pawl a sut ciamco.
20 Jesuh in, “Langhngan in mizapi hnenah thu ka sim ringring. Mi tampi an ra khawmnak sinakok ah le Biakinnpi ah thu ka zirh ringring. A thup in ziang thu hman ka sim dah lo.
21 Cuti asinain ziangahso thu i sut? Ka thusimmi i theitu pawl kha sut sawn aw. Ka simmi an thei òheh ko,” tiah a ti.
22 Cutiih a ti tikah cutawkih a ummi palik pakhat in Jesuh kha a beng ih, “Puithiam Sang hnenah ziangtinso cutiin na òong ngam?” tiah a ti.
23 Jesuh in, “Ka òongsual mi a um ahcun cuih ka òong sualmi cu hitawkih a ummi hmuahhmuah hnenah hin sim hnik! Asinan ka òongmi hi a dikmi a si ahcun ziangahso i beng?” tiah a sawn.
24 Cutiin Annas in a òemnak phoih sak cuang lo in Jesuh cu Puithiam Sang Kaiafas hnenah a kuat.
Piter In Jesuh A Phatsan Lala
(Mat 26:71-75; Mar 14:69-72; Luk 22:58-62)
25 Piter cu cutawkah meisa ai-in a ding lai. Culai ah midang pawl in, “Nang khal hi a dungthluntu lakah pakhat na si ve a si lo maw?” tiah an ti.
Piter in, “Ka si lo,” a ti.
26 Puithiam Sang hnenum lakih pakhat, Piter in a hna a sahtan mi pa ih sungkhat pa in, “Hi Jesuh thawn hmuan sungah ka lo hmu a si lo maw?” tiah a sut.
27 Asinan Piter cun, “Kei ka si lo,” a ti thotho. Cutikah ar a khuang.
Pilat Hmai Ah Jesuh An Hruai
(Mat 27:1-2, 11-14; Mar 15:1-5; Luk 23:1-5)
28 Zingpit ah Jesuh cu Kaiafas inn ihsin Mangki bawi inn ah an hruai. Judah mi hotu pawl cu an daan vekin thianghlimte ih Lantak Puai rawl ei an duh ruangah Mangki bawi inn sungah cun an lut lo.
29 Curuangah Pilat cu a va suak ih an hnenah, “Hi pa hi ziang sualnak so a neih?” tiah a sut.
30 Annih in, “Sualnak nei lo sisehla na hnenah hin kan rak hruai lo ding,” tiah an sawn.
31 Pilat in an hnenah, “Cuti asile nanmah in hruai uhla nanmah ih daan vekin a thu cu va rel uh,” tiah a ti.
Annih in, “Kannih cun mithah theinak thu kan nei lo,” tiah an ti.
32 Jesuh in ziangbangtuk thihnak so ka tuar ding tiih a rak sim cia mi òongkam kimnak dingah hi vekih a cannak cu a si.Ref 18.32 Joh 3:14, 12:32;
33 Pilat cu a inn sungah a lutsal ih Jesuh cu a ko. “Judah Siangpahrang na si maw?” tiah a sut.
34 Jesuh in, “Hi thu i suhmi hi nangmah ih palung a si maw, midang in ka thu an lo sim ruangah so a si?” tiah a sut.
35 Pilat in, “Judah mi ah maw si i ruat? Ka hnen a lo thlentu hi na miphun le puithiam upa pawl sokhaw an si! Na tuahmi thil cu ziangso a si?” tiah a ti.
36 Jesuh in, “Kei ka uknak ram cu hi leilungtlun ah a si lo; hi leilungtlun ah sisehla Judah mi hotu pawl kut sungih thleng lo dingin ka dungthluntu pawl in an do ding. Ka uknak ram cu hi leilung ah a si lo,” tiah a ti.
37 Cutikah Pilat in, “Siangpahrang cu na si ngai maw?” tiah a sut.
Jesuh in, “Nang cun Siangpahrang na si i ti. Leilung ih ka suahsanmi le ka ratsanmi cu thu pakhat lawng a si: Cumi cu thutak sim ding hi a si. Thutak sungih a ummi hmuahhmuah cun ka thu simmi an ngai a si,” tiah a ti.
38 Cutikah Pilat in, “Thutak cu ziangso a si?” tiah a sut.
Cun Pilat cu misenpi hnenah a va suaksal ih an hnen ahcun, “A parah mawhnak thu ka hmu lo.
39 Curuangah daan nan neihmi vekin Lantak Puai ah thawngtla pakhatkhat ka lo thlah sak òheu. Judah siangpahrang hi lo thlah sak ningla nan duh maw?” tiah a sut.
Jesuh That Dingin A Relcat
(Mat 27:15-31; Mar 15:6-20; Luk 23:13-25)
40 Annih in, “Anih thlah kan duh lo! Barabbas thlah kan duh!” tiah an au ciamco. Barabbas cu damiah a rak si.