3
Nan Hmurka Ralring Uh
1 Ka u le ka nau tla, mi tam tuk in zirhtu òuan duh hlah uh. Ziangahtile nan theih vekin kannih zirhtu pawl hi midang hnakin luar deuhin thurelnak kan tong ding a si.
2 Kan zate in kan palh pang òheu. Sikhalsehla a òongkam in a palh lomi cu a taksa pumpi a uk aw theitu a si ih mifamkim a si.
3 Rang cu kan thu thlun dingah rang kakharh in a kaa kan kharh ih feh seh ti kan duhnakah kan fehter.
4 Asilole tangphawlawng khi ruathnik uh: A tum zetmi a si ih a cak zetmi thli in a fehter; asinain a uktu ngaingai cu a fate zetmi lawng-hernak a si ih cumi hmangin lawng mawngtu in a duhnak ah a fehter.
5 Kaa sungih lei khal hi cumi bangtuk a si; a fate na in thuhla tum zetzet in a porh thei.
Thing le hrampi ziangtluk tupi kau a si khalle meici fate in a ur kang thluh òheu khi ruathnik uh.
6 Cuih meici bangtuk cu lei hi a si. Lei cu a òha lomi a si ih kan taksa sungah umnak hmun a rak nei ih cutawk ihsin òhat lonak cun kan ruangpum zate ah a hrawh thluh. Kan nunnak hri le hram tiangin meisa in a ur ih cuih meisa cu hell hmun ihsin a thomi a si.
7 Minung in ramsa hmuahhmuah hrem thei lomi a nei lo; hramlak ramsa le vate pawl siseh, bokvak ih a vakmi ramsa le ti sung nga pawl siseh, a hrem thei òheh a si.
8 Sikhalsehla kaa sungih lei cu a hrem theitu ngaingai zohman an um lo. Lei cu a òha lomi a si ih uk theih lomi a si; mi that thei tur a nei.
9 Kan lei cu kan Bawipa le kan Pa Pathian thangòhatnak ah kan hmang ih cule amah ih hmuihmel cuangih a tuahmi kan milaipi pawl camriamnak ah kan hmang lala.Ref 3.9 Sem 1:26;
10 Thangòhatnak òongkam le camriamnak òongkam cu kan kaa pakhat sung ihsin a suak. Ka u le ka nau tla, hibangtuk in si ding a si lo.
11 Cerh tipuut pakhat sungin ti thlum le ti kha an suak tlang dah lo.
12 Ka u le ka nau pawl, theikung ihsin olif rah a rah dah lo; sabit hri khalin theipi a rah dah lo. Cule cerh ti-al khalin tithlum a suah dah lo.
Tlunlam Ihsin A Rami Fimnak
13 Nanmah lakah fimnak le theihnak a neitu nan um maw? Nan um asile a nuncan òha in langter sehla, tangdornak le fimnak thawn a tuahmi a thil òha tuahnak in langter seh.
14 Sikhalsehla nan thinlung sungah iksiknak le mi huatnak le mah ih zawnruahnak lawng a khat asile ka fim tiin porh aw rero hlah uh; thutak parah sualnak nan tuah rero sawn a si.
15 Cubangtuk fimnak cu vancung ihsin a rami fimnak a si lo; khawvel fimnak a si; thlarau thawn a ral aw mi fimnak a si ih khawvang fimnak sawn a si.
16 Iksiknak le hamòamnak lawng a umnak hmunah cun buainak le òhat lonak a phunphun a um ve a si.
17 Sikhalsehla van ihsin a rami fimnak cu ziang dang hnakin a thiangmi fimnak a si; cuih tlunah daihnak in a khat, a lung a nem ih pawlkom a thiam. Zangfah thinpemnak a nei ih hnaòuan òha ih rah a suahter. Thleidannak a nei lo ih titerawknak khal a nei lo.
18 Cule remnak a tuahtu pawl ih daihnak thawn an tuh-mi thlaici ihsin an khawmmi rah cu òhatnak a si.